الإمتداد
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

حنان سكليب

+3
أمير فضل فضل محمد
بدر يعقوب
yousif saeed
7 مشترك

اذهب الى الأسفل

حنان سكليب Empty حنان سكليب

مُساهمة من طرف yousif saeed الثلاثاء يونيو 09, 2009 9:40 am

حنان سكليب

http://www.alfatihgabra.net



ملاح قرع وباميه مفروكة وكسرة وصحن سلطة و(ملاحة) ... ده كان الأكل فى بيوت البكا قبل أن يصبح (البكاء ذاتو) مظهر إجتماعى ونوع من أنواع (الفشخرة) بعد أن إجتاحت البلد أعداداً مهولة من (المليارديرات الجدد) أصبحت تؤثر سلوكياً على بقية الطبقات الأخرى حتى صارت (الفاتحة) هى الفرق الوحيد بين الأتراح والأفراح !

عندما توفى رجل الأعمال (حسن يورو) قامت أسرته بفتح أبواب (الفيلا) الفاخرة لأفواج المعزين علاوة على (صيوان) ضخم نصب بطول الشارع العريض مزود بعدد مهول من مكيفات الهواء تغطى أرضيته (السجاد) لزوم (عدم الغبار وكده) !

عند موعد الغداء إنتشر أفرادا يرتدون زياً موحداً يحملون (صوانى الأكل) النيكل الناصعة التى ترتاح بداخها أطباق المشويات والمحمرات والمقبلات وقطع الرغيف الفاخر بينما وضعت امام كل صينية عددا من زجاجات المياه المعدنية الباااارده !

فى صالون النساء جلست سوسو (فى الأصل ست البنات قبل أن يصبح حسن يورو رجل عمال)

جلست على سرير خشبى مستورد عليه ملاية قطيفة تتلقى التعازى من جاراتها وصويحباتها اللواتى جئن وهن فى كامل زينتهن (ناقشات) الحنة الما خمج يرتدين ثياب (الشيفون) المطرزة والشباشب ذات الكعب (البلية) تمتلئ أياديهن ورقابهن بآخر صيحات سوق الدهب فى (دبى) وبقية العواصم الخليجية !

- كلمتى (عوضية ردحى) ؟

همست (سوسو) لجارتها وصديقتها (نوسة) والتى مالت قريبا منها وهى تجيبها :

- والله (عوضية ردحى) دى قالو عندها مناسبت بكاء فى (مدنى) سافرت مشت ليها، قمت مشيت لى (هاجر حى ووب) قالو ليا عندها إرتباط خارجى فى (دبى) فى واحد من ناس الجاليه مات هناك أها فى الأخير مشيت كلمت ليكى (حنان سكليب) لقينا ما عندها إرتباط ووقعت العقد مع مدير أعمالا ! وأديتو مليون عربون مقدم

- وشالت منك البيانات !

- أديتا ليها كووولها .. المرحوم كان شغال شنو ؟ وعندو كم عمارة ؟ وقاعد يتبرع لى ياتو (نادى) وإشترى ليهم كم (لاعب) ؟ وعربيتو الراكبا نوعا شنو؟ وموبايلو الشايلو موديلو كم؟

أنتهت مجموعات النساء من تناول طعام الغداء الفندقى (الما خمج) ثم جئن لهن بالتحلية (باسطة وبسبوسة وكنافة وعين جمل وأم على) شئ باللوز وشئ بالجوز وشئ يالما بعرفو شنو داااك وبعد أن (ضربن) بدأن فى زحزحة الكراسى (البامبو) والجلوس كيمان كيمان (للشمارات) وهن يمسكن بثرامس الشاى (المذهبة) المتشابهه (الكبيرة حقت الشاى والصغيره للجبنة) التى تفوح من (فناجينها) رائحة (المستكا) .

وفجأة دخلت إلى الصالون شابه (آخر شياكة) ذات مظهر يطابق كثيرا مظهر مغنيات هذا الزمان يمشى خلفها ستة (شابات آخريات) من نفس الشاكلة يرتدين زياً موحداً وهن يرفعن أياديهن عاليا فى حركات متتابعه ويصحن بصوت كالجرس يشق عنان السماء :

ووووب ووووب ووووووووووووووووووووووووووووووووووووووووووووووووووب ...

ثم تبدأ (حنان سكليب) فى السكلى و(الوصف) وهن يرددن خلفها :

- ووووب عليا والله ليا يا حسن يوروو يا البتدى البتدورو والما بتدورو

ووووب عليا والله يا صغير وجاهل يا البتجيب القروش بالساهل

يا ود امي.. هيء يء يء يء ..
الكورس : وووب ... وووب ...ووووووووب

الليله يا حليلك يا زين الرجال ياملك الدولار يا البتستر الحال

الليله يا حليلك يا البتشيل من البنوك وتشتت قبال ما يلحقوق

يا ود امي.. هيء يء يء يء ..
الكورس : وووب ... وووب ...ووووووووب

الليلة وينك إنتا يا الإسبليت هبوبك والهمر ركوبك

الليله وينك إنتا يا البنيت المقصورة وركبت النافورة

الليله وينك إنتا يا أب جيوب منفخة وأب عربية مصفحة

يا ود امي.. هيء يء يء يء ..
الكورس : وووب ... وووب ...ووووووووب

يا حليلك الليله يا البتفك الصعيبة ويا البتسجل اللعيبة

يا حليلك الليله يا جوكى البنوك يا التهريبك بالسنبوك

يا ود امي.. هيء يء يء يء ..
الكورس : وووب ... وووب ...ووووووووب

ثم تعدل (حنان سكليب) توبا الشفون (الترانسبيرنت) الكان واقع وتنظر للكورس خلفها نظرة الفنان الذى يود أن (يختم) الأغنية فيبدأن فى (تحرير) البكاء ويرفعن أصواتهن ويضربن بأياديهن ليبدين زينتهن (دهب دبى وكده) ...ووووووووووووب وب وب وب ووووووووب ثم يتوقفن فى لحظة واحده بإشارة من (حنان سكليب) ! التى تجلس على أقرب كرسى وتتناول علبة مناديل الورق وتخرج منديلين تمسح بهما جبات العرق التى تساقطت بفعل المجهود رغم برودة التكييف ثم تلتفت إلى النسوة اللواتى كن فى الصالون يتابعون (فاصل السكليب) قائلة :

- قبلكن وحدكن ..جنس بخلن عليكن .. أول مرة أمشى ليا (بيت بكا) ما ينقطوا ليا فيهو !!

yousif saeed

عدد المساهمات : 9
تاريخ التسجيل : 07/06/2009

الرجوع الى أعلى الصفحة اذهب الى الأسفل

حنان سكليب Empty رد: حنان سكليب

مُساهمة من طرف بدر يعقوب الثلاثاء يونيو 09, 2009 12:46 pm

يوسف سعيد بقي شمارك حار ,, زمان كنت راجل رزين من مدرسة الامتداد واحد الي مربع واحد وبعدها
من الرحول من واحد الي شارع ناس عماد عويس ماكنا بنعرف ليك انك كنت بتعرف ناس حنان سكليب
دي جديدة بكون بعد مامشيت بلاد الفرنجة اتعلمت الشمارات ومبارات ناس حنان سكليب .
قصة جميلة ومعبرة للواقع بتاع زمن سجم الرماد ده
الشوق بحر ومطر ومحيطات ياود سعيد
والرحمة والمغفرة للجميل التقي ذو الاخلاق النيلة علي سعيد طيب الله سراه

بدر يعقوب
كبار الشخصيات
كبار الشخصيات

عدد المساهمات : 484
تاريخ التسجيل : 06/06/2009

الرجوع الى أعلى الصفحة اذهب الى الأسفل

حنان سكليب Empty حنان سكليب

مُساهمة من طرف أمير فضل فضل محمد الثلاثاء يونيو 09, 2009 6:08 pm

العزيز يوسف سعيد اخبارك حقيقة ده الواقع المعاش الان وربك كريم بعباده اخر الزمن

أمير فضل فضل محمد
إمتدادي أصيل

عدد المساهمات : 33
تاريخ التسجيل : 06/06/2009

الرجوع الى أعلى الصفحة اذهب الى الأسفل

حنان سكليب Empty رد: حنان سكليب

مُساهمة من طرف الفاتح الجوص الثلاثاء يونيو 09, 2009 9:22 pm

والله يا يوسف اول مره اضحك فى بكه لكن السودان الشفنه ده ممكن اى حاجه تحصل فيه
تحياتى لك وكل التعازى لك والاسره فى المرحوم الدكتور على
ان شاء الله تكون عرفتنى
الفاتح الجوص
الفاتح الجوص
وسام الإبداع
وسام الإبداع

عدد المساهمات : 256
تاريخ التسجيل : 08/06/2009
الموقع : مربع 4

الرجوع الى أعلى الصفحة اذهب الى الأسفل

حنان سكليب Empty رد: حنان سكليب

مُساهمة من طرف yousif saeed الثلاثاء يونيو 09, 2009 11:48 pm

السلام عليكم بدرالدين وأمير والفاتح نعم واقع السودان كده الله يكون
في العون والله مشتاقين الفاتح معليش الكبر والغربه هدتنا الواحد والله
بقى ينسى أسماء الأولاد بالله عليك ذكرني بدرالدين الف مبروك مقدما
أنا حاليا بالسودان وحأصلكم إنشاءالله والرحمه والمغفره لكل موتانا

yousif saeed

عدد المساهمات : 9
تاريخ التسجيل : 07/06/2009

الرجوع الى أعلى الصفحة اذهب الى الأسفل

حنان سكليب Empty رد: حنان سكليب

مُساهمة من طرف الفاتح الجوص الأربعاء يونيو 10, 2009 1:03 am

yousif saeed كتب:السلام عليكم بدرالدين وأمير والفاتح نعم واقع السودان كده الله يكون
في العون والله مشتاقين الفاتح معليش الكبر والغربه هدتنا الواحد والله
بقى ينسى أسماء الأولاد بالله عليك ذكرني بدرالدين الف مبروك مقدما
أنا حاليا بالسودان وحأصلكم إنشاءالله والرحمه والمغفره لكل موتانا
سلامات عزيزى يوسف والله انا زاتوه الكبر حصل لى الغربه بتلحس الراس بس ربنا يرجعنا اهلنا سالمين
عشان اشعتفك شويه امشى لى صفحة التواصل بتلقى اسمى بالكامل والعنوان والتلفون
الفاتح الجوص
الفاتح الجوص
وسام الإبداع
وسام الإبداع

عدد المساهمات : 256
تاريخ التسجيل : 08/06/2009
الموقع : مربع 4

الرجوع الى أعلى الصفحة اذهب الى الأسفل

حنان سكليب Empty رد: حنان سكليب

مُساهمة من طرف محمد مصطفى الأربعاء يونيو 10, 2009 3:42 pm

يوسف آآخوي .. والله أنا ودرتك تب ..
أتاريك أخو المرحوم علي سعيد ...
ألف رحمة ونور عليه ..وربنا يعوض شبابه الجنة

اما عن موضوع البكا بي (بكاية مؤجرة) .. فدي ظاهرة تستحق البث المباشر ...
وكمان سكليب عايزة نقطة ؟ سوتو شين والله
وعليها جنس أوصاف .. تستحق فيها النقطة ( قسم البوليس)

وانت الآن في اجازة يايوسف .. طيب محل إقامتك وين؟
أرجو إنك تشارك في بوسط التعارف بتاع أخونا عماد العاقب
اهو يساعد ذاكرتنا الخربة في تجميع شخصياتنا الامتدادية
وياريت لو لقيت ليك صورة كمان
محمد مصطفى
محمد مصطفى
.
.

عدد المساهمات : 310
تاريخ التسجيل : 06/06/2009

الرجوع الى أعلى الصفحة اذهب الى الأسفل

حنان سكليب Empty رد: حنان سكليب

مُساهمة من طرف عمادالدين العاقب الأحد يونيو 14, 2009 10:21 pm

[quote="yousif saeed"]حنان سكليب

http://www.alfatihgabra.net

والله يا يوسف طرح جرئ لما يحدث في مجتمعنا السوداني من تغيرات بقالب فيه الذكاء والتلميح والفطنة .. أهنيك عليه وأتمني أن تستمر في هذه اللونية وهذا البوست قمة في الجمال والروعة ومناقشة قضايا حيوية عموماً ذكرتني قبل سنوات كنت كتبت في صحيفة الخرطوم مقال تحت عنوان ( مدائح فيديو كليب ) وصورت المداح يستخدمون الآلات الموسيقية ويصبح المديح علي طريقة الروك أند رول أو الرقي وغضب من نشرة الصديق العزيز د. الباقر أحمد عبدالله وأخطر العم الأستاذ محمد الأخيدر المدير السابق لثانوية حنتوب وزميلنا بالشركة والذي هزأني وقال لي ( خليك في كورتكم الشينة دي ) ولازالت أحتفظ بهذا المقال ولكن بعد مرور السنين حدث ما تخيلته ودخلت المدائح في عالم الفيديو كليب وإستخدام الآلات الموسيقية وحقاً نعيش أكثر نشوف أكثر .
لك حبي وتقديري ،،،،،
عمادالدين العاقب
عمادالدين العاقب
إمتدادي مبدع وفنان

عدد المساهمات : 128
تاريخ التسجيل : 08/06/2009
الموقع : الإمتداد مربع ( 10 ) منزل ( 101 )

الرجوع الى أعلى الصفحة اذهب الى الأسفل

حنان سكليب Empty رد: حنان سكليب

مُساهمة من طرف Majdi AbdulRahim fadul Mo الأحد مارس 28, 2010 8:48 am

يوسف سعيد قريبي الخلوق يعني نسكلب ليك ولا كيف ؟ تعال زور البيت غربتك طالت في بلد الضباب وسحب شوقنا ليك تعالت فوق سماء الغياب.

،،،،أبوقصي،،،،
Majdi AbdulRahim fadul Mo
Majdi AbdulRahim fadul Mo
وسام التميز
وسام التميز

عدد المساهمات : 673
تاريخ التسجيل : 08/06/2009
الموقع : الأمتدا

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى