ظرفاء الامتداد

استعرض الموضوع السابق استعرض الموضوع التالي اذهب الى الأسفل

ظرفاء الامتداد

مُساهمة من طرف alfnan في الإثنين نوفمبر 02, 2009 1:57 pm

كما قال اخي طارق جبريل الامتداد حي متفرد في كل شي وظرفاء الحي لون اخر من التفرد .فالامتداد يعج بالظرفاء في كل مربع بل كل شارع .وهم ملح الحي كما يقال يملوؤن حياة الناس بالبهجة والسرورمن خلال مواقفهم الكوميدية الطبيعية الغير مصنوعة ورغم السنتهم اللاذعة ومساخة كلامهم احياناالا ان الكل كان يحبهم ويستمتع بردودهم البتموت من الضحك.والاهم ان الناس معهم تنسي مشاكل الدنيا وقساوتها لمن يلتقو بيهم. والغريب ان الظرفاء توارثو فكاهة الحياة وسرعة البديهة جيل بعد جيل فهناك جيل خواجة والصيني وسخانة وعمك محمود والطاهر محمد عثمان وصلاح العطا مرورا بميرغني ابقيقية وعوض ابنعوف ومصطفي سكووالهادي شهرذاد وخالد عثمان وجميل وياسر الحاج وجمال سعد واحمد جمعة والمرحوم جكسا واللاذع سمير عبدالرحيم وعابدين جنتووتنقو وعلم العاقب وعمرالخيروشماسي وحمدو سلام4 وغيرهم كثروللامانةكان لمربع 4 القدح المعلي في الظرفاء ودا من اسباب صحبتنا معاهم والركلسة طوالي في مربعم . ولظرفاء الحي مواقف كتيرة جدا نحكي ليكم بعض منها.
في مرة ماشين شباب الامتداد نلعب كورة في توتي بدعوة كريمة من اخونا عادل توتي لاعب المريخ السابق وبعدين بعد المباراة ماانتهت وبفوزنا 4/2 دخل عوض ابنعوف في اغنية الغلبو منو ياناس والامتداد دا سربالي وماقصرياسرالحاج وجمال سعد رقيص شديد وهجيج ودا كلو مكاواة لاخونا عادل توتي والراجل اتغاظ وراح يشتم فينا في اطار فكاهي هو ياامتداد شنو انتو جمب العشش يابتاعين العرقي ياسكارة انحنا توتي الحضارة والرقي وووهاك يامديح في توتي المهم اخونا عوض لسانو اجارك الله تشمر وضرب كف بكف وقال ليهو توتي توتي شنو يااخ!دا انتو شدة ما فهمكم ضيق بتشيلو الخضار الصباح تودو الزنكي. الساعة 2 كلو واحد بجي راجع بيه توتي في كيس وتقولي توتي وقال ليهواتحداك كان ناس بيتكم ركبو عربتك المشتريها ليك سنتين دي واقفة جمب قاعة الصداقة زي الراجية الفلم الهندي توتي شنو يااخ .وطبعا لمن نجيب سيرة عوض لازم نجيب توام روحو اخونا اللذيذ ميرغني ابقيقة صاحب الصوت المميز.اخونا ابقيقة اجاركم الله كان مشتري عربة لاندروفر قديمة شوية وكل مايمشي محل الجماعة هاك ياتريقة وضحك خاصة اخونا مصطفي سكوواولاد تيتاوي وشباب 4 و8 وبعدين اللاندروفر لمن يمشى كلو دخاخين زي الشغال بي طلح وشدة ابقيقة ما شبع تريقة بقي لمن يجي ماشي مابسلم يقوموا الجماعة القاعدين يلفتوه بعبارات التريقة زي بنزينا شاف وواحد يقول ليه دي قاعدة في حفرة دخان المهم زولنا اخد يومين غياب وفي اليوم التالت جاء زعلان من الشلة واللاندروفر اخر نظافة والذ شي كاتب بي وراء في الصندوق بي خط انيق ومزركش ورائع
(ومن خلفهم يتغامزون)
اخونا الطاهر محمد عثمان مرة حاكم مباراة بينا وبين الهلال العاصمي في دوري السودان سنة92ولسوء حظه الهلال العاصمي كان سي جدا وبحكم هلاليته قدر ماحاول يساعد الهلال ما قدر المهم في الدقيقة 88 عندنا لاعب حريف اسمو عادل محمد صالح انفرد بي هشام الطيب حارس الهلال فب الوقت داك ولمن دخل عادل خط 18 صفر الطاهر نهاية المباراة قمنا اتلمينا وجرينا عليه وبحكم معرفتي به اتكلمت معاه وبالحرف الواحد قلت ليه حرام عليك الله مابرضي ظلمك دا رد بكل برود وقال لي برضي عشان هو ذاتو بحب الهلال عشان كدة خلاهم 17 مليون وخلاكم انتو بي مدربكم 17 نفر وما ممكن ازعل 17 مليون هلالي وافرح 17 نفر هي امشو ساكت وافرحو بالدرون وفعلا ضحكت ومشيت.
اخونا عابدين جنتو بحب الصيد والقرود والافاعي وكان مغرم بي حاجات كدة عجيبة المهم اخونا ياسر الحاج لاعب الاهلي بكره الحاجات دي وبخاف منها جدا يوم جاء عابدين نحن قاعدين في الظلط جوار بيت ناس ياسر وشايل سنارة ولابس طاقية اول ماياسر شافو قال لااله الاالله المجنون جاني وبدا يتعوذ ويبرطم في كلام غير مفهوم المهم عابدين قال ليه ابو الياء ابو الصحب ماشين نصطاد سمك تمتم ياسر وقال وين انشالله رد عابدين قال ليه في الحزام الاخضر طنطن ابو الياء وقال ليه نصطاد سحالي ولا شنو؟ اتكوع عابدين وقال ليه انت ماشفت ترعة الحزام دي مليانة سمك وسالنا بي ثقة صح ياشباب طبعا نحن لاعارفين سمك ولا سمعنا بالترعة دي لكن عشان نزيد النار كلنا انا وعادل جادالله والقحف وعادل شاويش قلنا ايوة وكمان الصيد فيها ساهل .
المهم ابو الياء جهز موترو الهوندا وردف عابدين ومشو وما مقتنع بس خايف الكلام دا كان الساعة 11 ص وفي نفس اليوم كان عندنا مباراة في الصحافة واتلمينا الساعة 4 قدام بيت ناس ياسر كل الشباب وصلوالا ابو الياء وعابدين وشوية نلمحم من بعيد جاين فى الموتروابوالياء قمة الانهاك والتعب وعابدين ميت من الضحك سالناهم شنو وين السمك يا ابو الياء؟ردابوالياء بي سخريتو المعروفة سمك والله عابدين وداني حتي فيها شجر تزحو كدة تشوف سنار تقول لي سمك .سالناه تاني برضو وين السمك ؟رد وقال انا الحق علي البباري لي واحد مجنون لمن وصلنا هناك وقبل ما يعمل اي حاجة شاف ليه قرد بشبهو ساب السمك وبقي ساكي القرد . 3 ساعات وهو ساكي القرد وانا كمان زي الاهبل معاه ساكي القرد لمن فترنا ولمن رجع يصطاد لقي السمك رجع الري المصري . تدخل ود العطا قاطعا الحديث بي لكنته الغريبة كان تجيبو لينا عمي الحزام طيب. ونواصل

alfnan
إمتدادي جديد

عدد المساهمات : 12
تاريخ التسجيل : 19/10/2009

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف بنقوري في الإثنين نوفمبر 02, 2009 8:36 pm

hgالاخ العزيز .. الفنان ..سلام الله عليكورحمة الله وبركاته
ماشاءالله انت فنان في الكورة وفنان في لعب الباص وفنان في تسجيل الاهداف وفنان في الكتابة وربنا يعطيك الصحة والعافية واتمنى من الله ان لا تنقطع عن المنتدى لان والله يا عصمت سعدنا بوجودك ولك عاطر الاشواق .ولك جزيل الشكر والتقدير وانت تمدح ابناء مربع (4) وارجو منك ان تدخل مكتبة الصور وتشوف الاخ الغالي عوض ابنعوف ..مع تحيات بنقوري
avatar
بنقوري
كبار الشخصيات
كبار الشخصيات

عدد المساهمات : 619
تاريخ التسجيل : 09/06/2009
الموقع : مربع (4

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف عمر شيخ الدين الزبير في الإثنين نوفمبر 02, 2009 10:21 pm

ظرفا مربع 8 في العيد

بطه
صلاح مليشيا
محجوب مامون
خالد اندراوي
محمد نوبه
قاسم الوقيع
اشول
خرطوش
عاطف فرح
الخير كوج
ابو البنج
عم اندراوي
عم عبد الرحيم
هواري
علي حناطه
علي لورش
ديل الظهرين في الصوره


ستاره قال ليك اتصل عليه في السودان

سلام
avatar
عمر شيخ الدين الزبير
وسام الإبداع
وسام الإبداع

عدد المساهمات : 275
تاريخ التسجيل : 06/06/2009
الموقع : فرنسا

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف alfnan في الثلاثاء نوفمبر 03, 2009 1:02 am

لك التحايا اخ احمد جعفروكلامي في شاب 4 كلام في محلو ولك شكري وتقديري علي مداخلتك وكلامك الظريف وحقيقي الامتداد مليان ظرفاء ونوادرهم كثيرة وشيقة نتمني من الجميع المشاركة

alfnan
إمتدادي جديد

عدد المساهمات : 12
تاريخ التسجيل : 19/10/2009

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف alfnan في الثلاثاء نوفمبر 03, 2009 1:04 am

اخ عمر التحايا لك واكيد مربع 8 مليان ظرفاء وما نسيناهم لكن القصص قادمة انشالله وتحياتي لي ستارة

alfnan
إمتدادي جديد

عدد المساهمات : 12
تاريخ التسجيل : 19/10/2009

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف muneer idrees في الثلاثاء نوفمبر 03, 2009 5:23 pm

عصمت الفنان
تحية اجلال ومحبة
يحكى ان احد الظرفاء من الذين ذكرتهم في بداية موضوعك الرررررررهيب جدا وبالتحديد من مربع11 جا داخل الحلة وهو(ملطط) لطة شديدة كالعادة واصر انو يعزم اولاد الحلة اكلة سمك في محطة سبعة وفعلا تم ذلك بعد الحاح شديد منو ومشوا المطعم وطلب من الراجل اكبر سمكة موجودة عنده وجلسوا حول السمكة .الجماعة ياكلوا وهويتكلم ويحكي والجماعة شغالين في السمكة لحدي ماقلبوها وهو مامنتبه ليهم وفي هذه اللحظات ابتدأ ياكل معاهم وياكل الى ان قلب السمكة فوجد انها خاوية تماما من اللحم فالتفت للجماعة وقال ليهم انتو كنتو بتاكلو بكربون ولا شنو.(عرفتوا الزول ياجماعة .........العارف يرفع ايدو)
هذه واحد من عشرات الطرف التي اشتهر بها زولنا صاحب الطرفة السابقة

عصمت الفنان اعتقد مادام فتحت البوست دا انك تملك الكثير لتحكيه فهيا نحن في انتظارك لتمتعنا اسفيريا كما متعتنا كرويا في تلكم الايام الخوالي .


منــــــــير

muneer idrees
إمتدادي أصيل

عدد المساهمات : 48
تاريخ التسجيل : 08/06/2009
الموقع : jeddah

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف alfnan في الأربعاء نوفمبر 04, 2009 1:11 am

شكرا اخي منير وانا طبعا عرفت الزول دا وحكاويه كتيرة مع الناس واشكر لك اهتمامك واتمني من الجميع مشاركة حكاوي ظرفاء الحي .واخي منير ستقراء كتير عن حكاوي ظرفاء الحي انشالله في اليومين القادمين اوعدك

alfnan
إمتدادي جديد

عدد المساهمات : 12
تاريخ التسجيل : 19/10/2009

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف طارق جبريل في الأربعاء نوفمبر 04, 2009 4:49 am

عصمت كيفنك
ما تنسى حسن جهبوز من مربع 3
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف الفاتح الجوص في الأربعاء نوفمبر 04, 2009 4:48 pm

الاخ عصمت حكايت الظرفاء ما ليه نهايه وسردك يعطى الانسان وكانه موجود فى الحكايه ومعايشه .....
طبعا صحبك طارق قال ما تنسى حسن جهبوز وطبعا عامر تيتاوى بكون عنده كميات كده لى جهبوز المهم انا عندى حكايه كنته حاضره
طبعا كان الشباب بتلمه فى ركن ناس تيتاوى والايام ديك كان فى حصر تجول بعد ما يتمه ونسته فى الركن لمن يدخل الحصر بقومه بدخله الدكان جوه وبغلقه الباب يوم انا كنته واقف مع فاروق سعيد (الواحه ) جنب بيتم ونحنا واقفين جه مصطفى سكه والفاضل اخوى حتى فاروق سالهم الليله مالكم بدرىكده قالوه ليه نحنا عاوزين نعمل مقلب فى جهبوز فاروق كيف قالوه ليه اصبر بس المهم شويات كده وقال ادسه طبعا فاروق ايام كان عندهم الفيديو فى البيت وقدامه حديقه وفوق المحل يافطه كبيره مضويه وضاربه على الميدان الصغير قبل الجامع جرينا ادسينا فى الحديقه تحت الشجر شويه كده وسمعنا جهبوز ومشيتوه الغريبه ماشى على بيتم بس ما دخل شويه الميدان بتاع الجامع طلعوا الجماعه ومصطفى بصوت عالى ثاببببببببببببت يازول
وجهبوز نزل الواطه (طبعا جهبوز لو اتلفت لانه الشاشه المضيه بتاعت الفيديو بتكون ضاربه ليه فى وشه ما بقدر يفرز الناس ديل منو )
مصطفى منو انته
انا حسن جهبوز
الفاضل ساكن وين
انا ساكن فى مربع 3
مصطفى انته ماعارف فى حصر تجوال الممرققك شنو فى الليل ده
حسن انا والله كنته عند اختى عاوز تلد وتعبانه شديد قولته امشى اشوفه هنا فى مربع 4 (طبعا هو ما عنده اى اخت فى مربع 4 )
الفاضل اه واسع ماشى وين
حسن انا والله ماشى البيت طوالى
مصطفى والله تانى نلقاك بعد الحصر بس اسع ده ما نتحرك من هنا نلقاك وصلته بيتكم ....
ومصطفى لسع ما كمل كلامه
حسن مسك جلابيته وجره جرى ماعادى
ونحنا هنا متنننننننننننننا من الضحك
انا قولته اساعدك شويه عشان تسترجع الحكاوى واكيد الناس هنا كل زول عنده حكاوى ومواقف من الظرفاء فى الامتداد
ونرجو المواصله
مودتى
avatar
الفاتح الجوص
وسام الإبداع
وسام الإبداع

عدد المساهمات : 256
تاريخ التسجيل : 08/06/2009
الموقع : مربع 4

الرجوع الى أعلى الصفحة اذهب الى الأسفل

تحياتى عصمت الامتداد الفنان

مُساهمة من طرف kamal في الأربعاء نوفمبر 04, 2009 5:55 pm

تعرف يا عصمت انا لو كنت مكان عادل توتى كنت رجعتكم الخرطوم عوم اوبعد ما تركبوا البنطون اوقفة فى نص البحر واشوفكم بتعملوا شنو
avatar
kamal
إمتدادي مميّز

عدد المساهمات : 67
تاريخ التسجيل : 26/08/2009

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف عبدالله عوض عبدالله كع في الخميس نوفمبر 05, 2009 9:48 am

عصمت الامتداد - لا حولة ولا قوة الا بالله العلي العظيم -
اخبارك - ؟
لو تزكر اخر مرة اتقابلنا فيها في بورتسودان ايام - حي العرب - اكيد بقيت خرده والله اعلم تتزكر عموما كان الكلام سنه 1994 -
وحاتك ناس الامتداد ديل اروع مخاليق الله تصدق عابدين جنتو ده في كل ثانيه تلقاهو بي حاله - مرة انا هو ماشين في امان الله - وصاحبك كان ياااااااااادوب ركب ماكينة انصار السنه المهم لقينا ليك واحده لابسه اسود في اسود - ((انصارسنة )) وحاتك زي كيس الزباله -
وبدون ما شعر صاحبك جنتو برااااااااحه قالي البت عجبتني
وسالني السؤال البجنن الجن زااتو
(( بالله البت دي منو ))

يا خي اديك العافيه تحيات عاطرة - عبدالله كع باك النجوم   Shocked Shocked
avatar
عبدالله عوض عبدالله كع
وسام الإبداع
وسام الإبداع

عدد المساهمات : 486
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف alfnan في الخميس نوفمبر 05, 2009 8:58 pm

وهل يخفي كع .كيفك والله عاجبني نشاطك ومواصلتك للكل ودا حال شباب الامتداد بالذات الاكبر مننا زيك كدة انت دفعة اللورش صح .طبعا بمزح معاك بس انت ماعارف الخردة منو صحبك س عبدالرحيم انا ماقلت حاجة .تحياتي لك ولكل الشباب .بمناسبة عابدين يوم جاين هو واللورش من مربع 6 كانوا في حفلة هناك الوقت كان الساعة 2 صباحا المهم لمن وصلو الرابطة وقصاد الشارع البودي مركز سمير . عابدين ودع اللورش وقال ليهو باي. اللورش خواف طبعا قال ليه بس وصلني بيت ناس عجالي وامش . عابدين خرخر ورفض المهم عابدين في نهاية الشارع جمب دكان اليماني جري سريع ولف ومش دخل في شجرة ناس اللورش القصاد بيتم وصاحبنا اللورش جاي ويدندن مش انتشا لكن خوف . المهم مع وصولو الشجرة عابدين قام وشال ليه لبخة طين وفكاها في ضهر اللورش ولبت واللورش بين الواقع والخوف وبين الرعشة والارتباك بدا بسملة وتعوذ ووقف مندهش محتار يعمل شنو يلتفت ولا يفتح وقبل ما يفكر كويس وقف عابدين من داخل الشجرة وبيصرخ بااصوات غريبة وحركات اغرب والدنيا ضلام وصحبك اللورش هاك يافتح ما وقف الا جمب القسم وعابدين وراه ميت من الضحك لمن العساكر الفي القسم اتخلعو وعلى قولة يازول مالك كان عابدين راقد في الارض قدام القسم وهاك يادردقة في الواطة وقرقرة من الضحك .ولمن زولك اللورش نفسو راق ووعي للموقف سب ونبذ وجاط و قاطع عابدين كم يوم لمن صالحنهم انا وصلاح طه واووووك من مقالب عابدين ربنا يديهم الصحة والعافية.وياحليل 8 وشلتها ومواقفها الكتيرة المضحكة وتسلم .

alfnan
إمتدادي جديد

عدد المساهمات : 12
تاريخ التسجيل : 19/10/2009

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف alfnan في الخميس نوفمبر 05, 2009 9:03 pm

تحفة ياجوص اخونا جهبوز عندو موقف مع عابدين جنتوومعاه شوكت وطلال لذيذ جدا بحكي ليك اكيد .

alfnan
إمتدادي جديد

عدد المساهمات : 12
تاريخ التسجيل : 19/10/2009

الرجوع الى أعلى الصفحة اذهب الى الأسفل

رد: ظرفاء الامتداد

مُساهمة من طرف راشد ابنعوف في الثلاثاء ديسمبر 22, 2009 5:24 pm

وينك ياعربي

فتحت البوست ده وكبيت الزوغه

جبت ليك البوست ده هنا عشان عندي ليك طرائف

بس خليك قريب
avatar
راشد ابنعوف
الشعلة
الشعلة

عدد المساهمات : 179
تاريخ التسجيل : 10/10/2009

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى