جكسيهم وجكسينا

استعرض الموضوع السابق استعرض الموضوع التالي اذهب الى الأسفل

جكسيهم وجكسينا

مُساهمة من طرف طارق جبريل في الخميس نوفمبر 05, 2009 2:46 am

انتو يا الحبان ولاد الزمن دة يا كافي البلا حتى الحب آآآبيعرفوهو
الله اداهم الماسنجرات والفيس بوك والياهو والتوتر والموبايل والاس ام اس
بعد دة كله حبهم دراب دراب
النبي شوفوا جنس كلامهم في الشريط التحت في قناة النيل الازرق داك
وحات الله يسولوم في جنس نضمي يمين الغنمايي ما يأثر فيها
والله لاهن عارفين يحبوا ولاهم قادرين علي النخجي والجوعير
بالله الواحدة تكتبلو: انا بحب المريخ عشان لعيبتهم ظريفين
يقوم يردلا: ظريفين شنو ياخي ديل وهم ساكت
يمين ان كنت انا ان بقت قالتلي بحب مريخ أم علقة
كنت قلتلا: أنا أصلي غير كورتهم ما قاعدة تعجبني كورة ولا حتى برشلونة
ديل بُطان شنو ديل

يا حليل أيامنا وأيام ود شيقوق
بالله البني تحرن ليها قدام حلتهم لامن الشمس ترقدك كداد
وتقعد تحاحيلا من هني لا هني
واصلو حلتهم دي كلها تبقى اهلك وتسوي الدرب ساساقا ضُمة ضمة
والعجب ان بقى الله اكرمك بي بكاء في حلتهم ولا في بيتهم زاتو
يمين يدينك يبقبقن من حفير الصيوانات واصلك لا تقول اح
والعجب ان دخل لا جوة وجبتلك ترمسة ألت شاي وايدها دقشت في ايدك
يمين تجي منفوخ من لا جوة وماشي شايل ترمستك وتتقدل بي طرف اصابعينك علي النعامة
واصلو ان خلوك يمين في بيت البكاء دة تقرب تفكلك زغروتي
والعجب لو عندهم عرس في حلتهم ولا في بيتهم زاتو
يمين تجيب فرشك وبهيتك وتقعد تضرب في بيبان العرس ديل لامن تلمعن
وتطلع تفتش السباليق ان بقى فيهن شي مكدب
وان بقى عندهم غنم تسقيهن وتجيبلهن القش
ودة كله بس فشان تحاحيلك شوفتا منها

هسي بالله الواحدة تقول ليه: يا تامر يلاكا معاي ياخي عايزة اشتري ملابس داخلية وفوط صحية
وهو يقولها: خلاص لمن تكوني جاهزة مسكلي لي
يمين نحن الملابس الداخليي دي تبقالنا قدحة لا شفناها لا رأيناه
وحتى ان بقينا شفناهن وكتنا داك يمين علي ننهق زي الحمير اكرمكم الله
وكمان جابتلها فوط صحيي... وحات نضري القطن دة شفناهو بعد دخلنا الجامعة
وكتين تنجرح ويقشطولم قطنايي ملياني صبغة يود في الجرح
ديل نصايب شنو ديل

بالله هسي البني تقعد تنتظر في الولد وتشتريلو في الهدايي
جملة الأيمان وكتنا فشان بس تشوفها تسويلك في جنس عمايل
ان بقى عندها اخو يقطع الخميرة من البيت تصاحبو
وان بقى عندها بت خالتا ليها تعرف بنات ود عمك تمشي توصيهن
وبعد دة كله ان بقيت شفتها بعد تلاتة شهور انت كسبان وتعيش عليهن
لامن تجي تاني تحاحيلا من أول جديد واصلو لا تخليلك الجابري ولا زيدان
ولا احمد المصطفى.. بس تقعد تسمع في اغاني النخجي والجوعير ديل
وتتوجع في حوش بيتكم لامن الله يعدلها عليك وتلم فيها تاني وتاخدلك حنك حنكين معاها
والعجب ان بقيت داير تكتبلك ليها جواب
بالله تقعد تحاحي في ابوك لامن تصل الدولاب أليلو وتسرق الريحي ألتو وتبخها في الفلسكاب
وتسويلك وريقات زي البخرات تكتب وتشطب فيهن لامن يجنك الكلمات السمحات
ويخلنها وكت تقراهن تتبسم..
ووكتين تنتهي تقعد اسبوعين تفكر في النصيبة التوصله ليها
وترجع لي المحاحا من جديد.. والعجب ان لقيتها قدامك
من الخلعة تديها الجواب وتقولها اديهو لي اخوكي

وبالله تنتظر عيد الفطر دة من السنة للسنة فشان تجي داخل لاااجوة وتباركلهم العيد
وأصلو الكعكايي الادتك ليها دي لا تاكلها لا تضوقها.. تختها في دولابك وسط الهدوم لامن تعتت وتنشف
وكل يوم تجي تشمها من تحت الهدوم وترجعها تاني.. والقميص الختيت فيه الكعكايي دة
تلبسو من المناسبات للمناسبات...

هسي الله بيسألكم داك حب وأليل البُطان ديل حب
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: جكسيهم وجكسينا

مُساهمة من طرف kamal في الخميس نوفمبر 05, 2009 9:00 pm

يا طارق نحن فى عصر الحب فى زمن الشات والموبايل ياخى زمان الواحد كان بحب واحدة هس بقى الواحد يحب ست وكل جيل بى حاجتوه بعدين الجيل بتاع الشباب الموجود الان فى السودان جيل صغير من حيث الحجم والعمر على مستوى الجامعات وهى ظاهرة غريبة فعلا ياخى زمان ما بتفرز الطالب من الاستاذ الا بالرداء الطالب فى المتوسطة تلقهوا بى شنب وهسة الواحد ولدهوا امبارح كرة تلقهوا فى الجامعة
avatar
kamal
إمتدادي مميّز

عدد المساهمات : 67
تاريخ التسجيل : 26/08/2009

الرجوع الى أعلى الصفحة اذهب الى الأسفل

رد: جكسيهم وجكسينا

مُساهمة من طرف مدثر قرجاج في الجمعة نوفمبر 06, 2009 1:38 pm

يا ود ج جبريل والله الحب انتهى مع الجيل الجديد قال ليك واحد قاعد ليه مع واحده جوه الجامعه وبحبها وبشرح ليها فى الظروف بتاعتو قام قال ليها (والله انا عارف نفسى ماعندى قروش زى مروان صحبى ولاعربيه زيو ولا ربع العند مروان لكن رغم ده بحبك من جوه قلبى) البت قامت طوالى مشت عليهو ومسكتو من يدو وهمست ليه فى اضانو وقالت ليه(لو بتحبنى بالجد عرفنى على مروان صحبك) ده ياهو حب الزمن ده اول مايرتبط يرتبط بالماديات وينشأ على الموبايلات ويكبر بالهدايا التقيله ويتوسد على تلفونات الليل بعد الساعه 12 ...لكن حب زمان كان بينبع من قلب المعاناه عشان كده كان ليهو طعم خاص وكمان كان لقيت ليك ازيار جنب بيت الحنان بتاعك يكون ابداع عديل لانو الناس زمان بتشرك بالازيار الواحد يقيف بالساعات يقطع ليه زير كامل فى انتظارالجكس بتاعو انشاالله يكشح مويه ويرجع ولمن يروى ولسه تكون ماطلعت يبدا يشطف وبعدين يرش الازيار وفى ناس كان بتدعك الازيار بالحيموره وفى ناس كانو يرجو الغنم لمن تجى تشرب من الازيار الجنب بيت الجكس بتاعتو يبدا يرفع فى صوتو تك اش ياخى الغنم ديل كرهونا ويشيل الحجار ويفلق ومرات كده بيجع ليهو حجر فى الباب عسى ولعل تفتح تشوف الحاصل شنو......

مدثر قرجاج
الإدارة العامة
الإدارة العامة

عدد المساهمات : 212
تاريخ التسجيل : 08/06/2009

الرجوع الى أعلى الصفحة اذهب الى الأسفل

رد: جكسيهم وجكسينا

مُساهمة من طرف مدثر قرجاج في الجمعة نوفمبر 06, 2009 1:55 pm

بعدين ياطارق عجبتنى حكايه الصيوانات دى والله كان فى ناس بموتوا فيها موت العجب لو طلعت وجات جنب الصيوان فى واحدين يقربو يمشوا يقول ليه ياريتنى بدل المرحوم زاتو ...لكن نحن كمان كان عندنا حاجه تانيه البوماستيك يعنى كان عندنا ناس الحله كلو يوم والتانى بيضربو بوماستيك ولو البيت فيه بنات سمحات والله فى ناس بضربو نفسهم اول شى بعدين بيمشوا على الحيط والعجب كمان كان نصت نهار كده جابت ليهم شاى عاملاهو بيدها يعنى ساوه ليهم بى ايدينا شاى زى مابقول ابو عركى الواحد يشطف فى الشاى ده وكل شطفه وراها اهة وتعليق ورقاد واطه عديل... تانى الواحد مابدخل شى فى خشمو لى تانى يوم وبعدين كان عندنا غيره من بتاعين الدكاكين يعنى الواحد يكون واقف فى الهجير منتظر الجكس تجى لمن تطلع تكون ماشه الدكان مابيقدر يعمل شى لانو المكان ملغم ومن بعيد يشوفه ليك بتبتسم ابتسامه عاديه مع بتاع الدكان وهو بجاى تلقاهو زعلان ويبدا يشتم والله عمك ده انا يوم بخنقو الزول ده مايبيع ليها وينساها مالو داير يقفله معانا وطبعا الحاجه تجى راجعه شايله ليها صابونتين ولابسه التوب ومغطيه وشها وتمشى الهوينه وتشعلل ليك المكان كلو والنهار اصلا مشعلل خصوصا اللفته الاخيره قبلى ماتقفل الباب دى بتكون قاتله وبتجيب ليها كواريك عديل وناس تصرخ والكانوا قاعدين برقدوا ...ياخ حب زمان جميل وفيه معاناة وفيه مشاعر ساخنه وصادقه .....وراجع ليك تانى اكلمك عن حب هسه
مودتى

مدثر قرجاج
الإدارة العامة
الإدارة العامة

عدد المساهمات : 212
تاريخ التسجيل : 08/06/2009

الرجوع الى أعلى الصفحة اذهب الى الأسفل

رد: جكسيهم وجكسينا

مُساهمة من طرف طارق جبريل في الخميس ديسمبر 24, 2009 12:35 pm

كمال ومدثر الفيكم عرفناها
دايرين نعرف الباقين بجكسوا كيف
ههههههههههههه
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: جكسيهم وجكسينا

مُساهمة من طرف سائر الخير في السبت ديسمبر 26, 2009 7:29 am

ياود جبريل يديك العافية
موضوع في الصميم ذي ماقلت

تحيييييياتي

سائر الخير
إمتدادي جديد

عدد المساهمات : 10
تاريخ التسجيل : 15/07/2009

الرجوع الى أعلى الصفحة اذهب الى الأسفل

رد: جكسيهم وجكسينا

مُساهمة من طرف طارق جبريل في الأحد ديسمبر 27, 2009 11:40 am

سائر الخير كتب:ياود جبريل يديك العافية
موضوع في الصميم ذي ماقلت

تحيييييياتي
تسلم يا حبيبنا
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى