أي بت شديدة بتحب ليها طُلبة (صبي بناي)

صفحة 4 من اصل 5 الصفحة السابقة  1, 2, 3, 4, 5  الصفحة التالية

استعرض الموضوع السابق استعرض الموضوع التالي اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الإثنين يوليو 13, 2009 11:08 am

الفاتح الجوص كتب:طرووقى واصل والله متابع بشده
اه لقيت التزاكر ولا لسع
تحياتى
الجص ازيك ياخي
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الإثنين يوليو 13, 2009 11:09 am

(14)
أها يا الحبيبين مرت الاسبوعين وبقينا في الكلام الجد
شفنالنا تلات عربيات وبوكسي عشان البلتون أليل عوض دة
انا اندرعتلي في بنطلون وقميص كان عاجباتني جايبن معاي من مصر
ومشيت من دولاب الحاج اتريحت ومشيت بيت ناس عوض
أها الرجال جاهزين.. خيلانه واعمامو اتنين واخوانه الكبار علي النسوان
ما جهزن لي هسا وأبوهو ينقنق في التأخير... ونحن ما عايزنه يحرِن...
- فجأة: يا طارق... طارق تعال... اخت عوض نادتني
- شنو يا حنان مالكم ما جهزتو لي هسا
- ياخي امي قالت إلا تشيل معاها حُقة الصعوط
- يا حاجة صعوط شنو كمان التشيلي معاك في العمارات
- نان يا ولدي إن بقيت خرمت هناك أسوي شنو
- كمان عايزة في يوم خطوبة ولدك تقنطري سفتك زي الكبريتة المفتوحة
- الله يقلعك.. نان ان خرمت اسوي شنو
- عضي طرف توبك
- طيب بدل ما اعضيهو ما اختلي فيهو سفايي فرد ويحيدي
- انت قايلاها حلاوة كرملي... امرقي انا اصلي عارفك خرفتي
- هو الشي الهسا ماشين نسوي دة ما ياهو الخرف ذاته
- سمح امرقي لامن نجي بوريك الخرف كيفنهو
... ومشينا يا الحبان.... تيت تيت تيت... لامن وصلنا العمارات
... اهلا مرحب شرفتو
... اتفضلوا اتفضلوا
دخلنا لقينالكم الدنيا هايصي... والبيت مليان رجال غلاد غلاد
يمين حسين الجسمي بالنسبة ليهم ناعومي كامبل
النصايب تقول بياكلوا تِبِنْ منفخين زي شواويل الكاويق (شواويل مليانة بي ورق شجر المنقة)
... والنسوان سمحات ومتمرات عكس رجالن.. شوف عيني الواحدة فيهن تقول
للقمر قوم وأنا أقعد مكانك وباين عليهن مستلمات رجالن...
أما إن كان للقرمبوز أليلُم يمين من سماحتن
قلب الواحد ينتِل دق دق دق دق زي مروحة الطربيزة...
أماني صحبي ما وقعلو وقعتن سمحي خلاص...
أنا علي العلي مشيت أعاين في الحيط البنيناهن وبقلَنا سبب في الشي الحاصل دة
... جات جنبي خالة البنية: إنت ما عايز تنسى إنك طُلبة؟؟
- أنسى كيفن وهي كانت سبب الشي دة...
- امشي اقعد انا بعدين عايزاك
... يا سيدي الحسن تنجدني من المرة دي
شكلها كدي ناويالي علي نيي....
عوض انجعص جنب ابوهو... الحقيقة شكله اتغير بس يكتل من الضحك
لابسلو بنطلون رمادي وقميص ابيض وبابيون احمر وجكيت رمادي
انا الكاتلني من الضحك البابيون المشنط في رقبتو دة لأنه ذكرني عيد الضحية
لامن يختولك دهن الكرشة وفوقه اب دمام ويقولولك ودو للنسوان...
... اتوهطو الرجال وبدوا الكلام..

avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف عبد الرحمن الخواض في الإثنين يوليو 13, 2009 12:35 pm

والله يا طارق شلت حال صحبك ده ما خلتلو جنبة

والغريب أقابلو أقولو شوف طارق شايلك حالك

يقول لي شفته زمان كنا كيف Laughing

عبد الرحمن الخواض
إمتدادي جديد

عدد المساهمات : 11
تاريخ التسجيل : 05/07/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الأربعاء يوليو 15, 2009 11:17 am

عبد الرحمن الخواض كتب:والله يا طارق شلت حال صحبك ده ما خلتلو جنبة

والغريب أقابلو أقولو شوف طارق شايلك حالك

يقول لي شفته زمان كنا كيف Laughing

بس منو القاليك انه انا قاصد عوض اسماعيل
هههههههههههههههههههههههههههههه
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الأربعاء يوليو 15, 2009 11:19 am

(15)
واحد من خيلان عوض قعد يفلعص في الكلام ويعوج فيهو...
انا في سري اقوله: ياخينا اكشح كلامك فسراع خلنا النمش نشوف بوشنا.. الفلهمة العليك شنو انت جايي ايد ورا وايد قدام
المهم الزول قعد يطول في الكلام ويعوج فيه لامن وصل حتة: يشرفنا ويسعدنا إننا نناسبكم
يمين ابو البت بس قال: مرحب بيكم وشرفتوا... النسوان فقعن الزغاريد .... ايويييييييييي يو يو يو
انا طوالي عرفت إنه الرجال ديل قاعدين دلاليك ساكت..
وووب عليك يا عوض اماني ما وقعت وما سميت... انا خايف اجي القاك مزرزر زي أبين كروش ديل لا تهش لا تنش
... مبروك مبروك ربنا يكمل على خير
... شرفتونا والله بي وجودكم
... د. عوض في عيونا إن شاء الله
سبحان الله هو عوض متين بقى دكتور وهو لليلي الاسبرين ما كملو
.. المهم يا الحبان صواني الخبايز والعصاير بقن ينطاقشن وانا اسكت ابلع واشرب
اخدنالنا صني كدي عشان الجماعة يتعارفوا وجات خالة العروس قالت الشباب لازم يلبسوا الدبل
بس يا الحبان يجن خالات العروس وبنات خالاتها وبنات عمها مقدمات العروس والدنيا هاصت تاني
النصيحة لي الله البنيي سمحة سماح يكتلو زول
قعدوها هي وعوض في كراسي ماهلات كدي
وخالة العروس طلقت البخور وجابوا الدبل والحاجات
وعوض من شدة الفرح عيونو يتحركن زي البليي الخاتنها في كوريي
لبسوا دبلم
وفجأة دخلت غنايتا غليييدي قالوا اسمها حواء قندران ولا ترلا ما عارف
الزولة دي قعدت تلعلع والشباب دة هاص وختوا عوض وخطيبتو في النص وهاك يا رقيص
خالة البنية جات جرتني من يدي ودخلتني الدائرة واختلي قلدي مع عوض شديدي والله من قلبي
وبدينا نسكسك وخالة العروس تلزني وسط البنات
وانا اقول يا ربي تمرقني سالم الليلي
وفجأة شفتلي واحدا ليه فقهة كدي زي التلكي (الخشبة البيكسروا فيها الجزارين اللحم)
زولكم منجعصلو في كرسي واللحم عليه كتير لامن مدفق من الكرسي بس تقول عجين خميرتو زايدي نازل من الماعون
الولد عيونه محمري وشكل وشه ينعل قفاهو
ونحن في الهجيج دة وسط البنيات السمحات ديل
همست في اضان خالة البنيي: انت الزول المنفخ ابو نخرة كبييري زي وحيد القرن دة منه ومالو فارز عيشتو بعيد من الناس كدي
ياخي حرام عليك... دة ما ود عمها الكان عايزها
اتاريهو يشرب في العصاير يبرد في جوفه وعيني ليهو قزازة الببسي يشرب فيها زي الماسورة المفتوحة في زير
حمدتك يا مالك روحي الما حبيت
- انت ما حبيت لكن في ناس عينها عليك
أهااا قمنا تاني... يا سيدي الحسن تمرقني لي أهلي سالم من العيلة دي...

avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الجمعة يوليو 17, 2009 6:49 pm

(16)
واصلنا سكسكتنا وسط النسوان القاهرات ديل..
.. حاجة سكينة جات مسكت ولدها وقلدتو وبكت بي حرقة شديدة خلاص
والله تقول عوض مات....
انا سبيت لي عوض ولي قلبو ولي العمارات وللفقر
... خالة البنية غمزت لي عشان انقذ الموقف
جيت مسكت حاجة سكينة من يدينها وجبتها لي وسط الجكس البيرقص
وقعدت ارقص معاها وقلتلا: انبسطي في خطوبة ولدك عشان اجيبلك سفة من أبان كروش ديل
والله قعدت ترقص وتضحك بي دموعها وطبعا الناس كلها مستغربة انا قلتلا شنو
خالة العروس جاتني: النبي فوقك نسيبتنا دي قلتلا شنو
- ياخي مالك مخصماني بالنبي الشي القلتو ليها آبيتقال.. انت موش كنت عايزها تنبسط اها انا خليتا ليكم تحتو قرض
- (ضاحكة) انت باين عليك داهية... أها مافي واحدة من الشباب ديل ملت عينك
- انا عيني مليانة مصائب وبناتكم السمحات ديل ما بقدر عليهن... انا وليد ربراب وماني زول حب
وشيت عوض دة ان بقيت سويتو ابوي بيقطع راسي... هو جيتي معى عوض دي عندو فيها كلام
- بس نسوي شنو جيتو خليتو بناتنا يهضربن
يا ود الكرسني تحلني الليلة دي من الزرزير دة
انا كان عارف القصي حا تصل لي كدي كان شفتلي بناي جالوص واشتغلت معاهو
- شايفة الزولة اللابسة احمر ديك... شايفها متابعاك كيف
يا سيدي الحسن... اقولك حاجة... تعالي نرقص انا ما مني فايدي
- يلا... بس ما بنخليك
عوض يوزع في البسمات وغاتس في بدلتو زي قلم البيگ
مشيت قعدتة بينه وبين العروسة
- والله بي طريقتي دي بتكتلي ليكي زول... ليك حق تجهجهي عوض
- بس هو الجهجهني... وعوض دة حاجة روعة
عوض يتبسم ساكت زي الماسكين جضومو بي مشبك
- انت الزول الهناك دة ياهو الاخد الشاكوش...
- ايوة هو زي اخوي
- اتاريهو يلوغد في الخبايز كدي بي حرقة....
- انا غايتو من قبيل اعاين للباب كويس قلت كان قامت شكلي اقوم فاكي البيرك
ناسكم الغلاد دي ما بقدر عليهم وصحبي عليه العوض ومنه العوض ان بقى هبدوهو
- ياخي مافي زول حا يسألكم خلاص القصة اتحسمت
- انا خايف من خالتك دي تجيبلي دقة الليلة كلما ازوق تجي تجرني وسط البنات واعمامك ديل يحمرولي
- ضاحكة يا زول ما في زول شغال بيك
- كدة كويس
عوض ضحك ضحكة خبيسي كدي
- انت والله ما قعد تشوف
يا ود الكرسني تحصلني....
نقوم نهجج

avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

اى بت شديدة بتحب ليها طلبة(صبى بناى)

مُساهمة من طرف اسامة محمد الحسن محجوب في الإثنين يوليو 20, 2009 1:11 am

الاخ , طارق جبرين
انا متحاشى قصتك الرهيبة دى من زمن
عشان فوت علينا بكرة والكلام ده
هسه تقطعه لى فى ال16
الليل ده نتمو خنق
اصحى معانا شوية
تحياتى ..
avatar
اسامة محمد الحسن محجوب
إمتدادي أصيل

عدد المساهمات : 43
تاريخ التسجيل : 10/07/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف ازهري محمد موسي في الأحد يوليو 26, 2009 6:11 pm

ود جبريل ازيك - لحقتك هنا
والله ذهجان من صباح الرحمن لكن دي عجبتني وفكت الزهجة للطويلة (على باليمين قايلين نفسنا دخلنا الجنة عديل...)

ازهري محمد موسي
إمتدادي جديد

عدد المساهمات : 15
تاريخ التسجيل : 26/07/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف الفاتح الجوص في الأربعاء يوليو 29, 2009 10:02 pm

يا دكتور تحياتى
قالوا السنه دى رمضان عندكم 45 يوم عشان كده نشوف ليك الحجز من اسع للامتداد ........
طبعا عارفنك مشغول لكن بتصلو على شباب من الامتداد معانا هنا وقالو لى اشكر طارق وقول ليه واصل هم طبعا شويه التقنيه العاليه دى عندهم فيه مشاكل
انا غايتوه قولته ليهم الزول ده مشغول شويه وما لقى حجز لى السودان شوفه ليه حجز من هنا اه قصرته معاك
avatar
الفاتح الجوص
وسام الإبداع
وسام الإبداع

عدد المساهمات : 256
تاريخ التسجيل : 08/06/2009
الموقع : مربع 4

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الأربعاء يوليو 29, 2009 11:23 pm

اسامة محمد الحسن محجوب كتب:الاخ , طارق جبرين
انا متحاشى قصتك الرهيبة دى من زمن
عشان فوت علينا بكرة والكلام ده
هسه تقطعه لى فى ال16
الليل ده نتمو خنق
اصحى معانا شوية
تحياتى ..
اسامة كيفنك ياخي
يا سيدي والله بس الوقت ممحوق
ويسعدني ان تكون احد قراء البت الشديدة
ارقد عافية
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الأربعاء يوليو 29, 2009 11:25 pm

ازهري محمد موسي كتب:ود جبريل ازيك - لحقتك هنا
والله ذهجان من صباح الرحمن لكن دي عجبتني وفكت الزهجة للطويلة (على باليمين قايلين نفسنا دخلنا الجنة عديل...)


ازهي يا حبيبنا كيفنك ابوي
عاد الجني ألت العمارات اماني ماها سمحي يعلم الله
ههههههههههههههههههههه
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الأربعاء يوليو 29, 2009 11:30 pm

الفاتح الجوص كتب:يا دكتور تحياتى
قالوا السنه دى رمضان عندكم 45 يوم عشان كده نشوف ليك الحجز من اسع للامتداد ........
طبعا عارفنك مشغول لكن بتصلو على شباب من الامتداد معانا هنا وقالو لى اشكر طارق وقول ليه واصل هم طبعا شويه التقنيه العاليه دى عندهم فيه مشاكل
انا غايتوه قولته ليهم الزول ده مشغول شويه وما لقى حجز لى السودان شوفه ليه حجز من هنا اه قصرته معاك

الجوص يا حبيبنا
ياخي ما تشوفلي زياري لي المانيا دي
الناس الصنعوا المارسيدس ديل ماهن هينين
نفسي اشوفها والله
بالله سلم لي علي الشباب ديل واحد واحد
وقولهم بنتمها ليكم ان شاء الله
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الأربعاء يوليو 29, 2009 11:48 pm

(17)
بناتن السمحات ديل شغالات رقيص... ورجالن أبين كروش ديل جابلوم شيتن مقرطس كدي باقيلي كوكتيل شغالين يلوغدوا فيه
انا شفت ام اعوض دفرتو من يدها في الطربيزة وقلت لي عوض كدي خلني اللشوف امك دي واجيك صادي
- انت مالك دفرتي الشي دة
- يا ولدي ما فهمت فيهو شي
- انا عارفك في الزيفي دي دايرالك حرف أليل قراصي ومعاهو بصلتا خدرا تمسكيها زي المايك وتقعدي تلوغدي
- (ضاحكة) اي والله يا ولدي... الناس ديل شيتن كلو كُتُر
- انت مالك عليهم اسكتي اكلي البتعرفي والباقي ضوقيهو بس
- يا ولدي قلبي ماكلني علي ولدي ما بيقدر على الناس ديل... باين عليهم نسوانم قدرات ورجالن قاعدين طراطير
- هو وكر نفسي عندهم ... بعدين ما تخافي البنيي قاعدة تريدو شديد وباقية عليه عشرة
- أيي والله يا ولدي... باين عليها قاعدة تريدو ،سميحي صديرا زي الوزين
- انت قايلاهو متل أليلك علي المعلاق كدي
- ( ضاحكة) لامن دموعها جرن.... شكيتك علي الله يا ولدي والله الا امسكك ابوسك في جضومك ديل
- يلا سمح اكلي عشان الناس ديل عينهم عليك
... شويي كدي الفنانة الاسمها حواء قطر ولا شنو دي بدت تلعلع تاني والدنيا فارت من جديد
وقبل ما خالة البنية تصلني سوقت ام عوض وقعدت ارقص معاها وجن بناتم زي البلوم حاوطونا وهاك يا كشف
وام فستان احمر المري دي جات قاصداني عديل
قامت ام عوض قالتلي: انت يا طارق يا ولدي البنات ديل من قبيل انا شايفاهن وخالتن يحاحين فيك باقيلي دارنك لي واحدة فيهن
دحين يا ولدي ما تغتس انت ذاتك عشان الاتنين بتقدروا عليهن
- دايرة توكريني انا كمان ... والله جبيرين ان بقا سمعك علي يرصصك
- (ضاحكة) أييي ابوك صعب شديد
خالة البنية فكتني من ام عوض ومسكتني ترقص معاي
- الليلة ما عندك طريقة تزوق لازم تحسم حاجاتك
يا سيدي الحسن تنجدني
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف محمد عبد الصادق في الأحد أغسطس 23, 2009 1:37 pm

ود جبريل التحيات لله
ياخي قصتك دي كل ما القاها اقول خلاص هنا بتكون الحلقه الاخيره اجي القاها في نففففس الحته الفي المكان التاني بس قول لينا باقي كم حلقه و خلاص بعد كده بننتظر ما مشكله

محمد عبد الصادق
إمتدادي أصيل

عدد المساهمات : 28
تاريخ التسجيل : 08/08/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الأحد أغسطس 23, 2009 6:15 pm

محمد عبد الصادق كيفنك ابوي
رمضان كريم ياخي
القصة والله بقت زي الماسورة المحلوجة

Laughing Laughing Laughing Laughing
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الأحد أغسطس 23, 2009 6:27 pm

(18)
ونحن بنرقص مع غناء الخرابة الاسمها حواء دي قربت مني خالة العروس....
- أها يا طارق كيف الخطوبة بالله ماها سمحي..
- والله ما قصرتوا تب... واحسن شي خليتو الامور مغتغتة كدي
فشان اهل عوض ديل انت باقي عارفاهم ناس عندهم عزة نفس وكدي..
- يا زول عوض دربوا مرق وخلاص بقى ولدنا ومننا وفينا..
دة الكلام أماني ما وقع راجل..
- لكن لسة الدرب ماهو طويل..
- يا زول الأيام بتمشي زي البرق
- أيي ما قلنا شي بس لامن يشتغل ويكوِّن نفسه القصي دايرالا صبرا كتير
- ياخي مالك جنك حسيب كدي
- نان مو ياهو كدي ولا انتو كمان دايرين تعرسولوا..
- يا زول هوي نحن بنعرف كيفن نسويلُن شيتُن...
- أها إنت كيفن قصتك
... يا ود الكرسني.. بدينا..
- أنا لاني عندي قصي ولاني بتاع قصص.. أنا يا دوب أشوفلي كفاي أليل جداد
ولا مراح أليل غنم وأقعد أربرب جنبو... العرس والحب ديل ماني قادر عليهن..
- ياخي نحن عديل كدة عايزنك لي سحر بتنا.. وهي عينها عليك وانت باين عليك ود ناس...
... يا الوراريق يحلني الليلي..
- اقولك حاجة راجلك العامل زي فنطاز الجاز داك قاعد يشوف فينا
وإن بقا اللبع قام ماني قادر عليهو... دحين خليني اللمشي ارقص مع خالتي سكينة دي
- (ضاحكة) يا زول راجلي شباب وروحو شباب ما تقعد تزوق..
- انتو مالكم شيتكم كله كتور كدي
- (تضحك لامن دمعت) ياخي لا شيتنا كتور لا شيتين بس نحن بناتنا مربنهن على الصراحي
ونحن حسينا انها مايللاك وقلنا انت صاحب عوض وهو يشكر فيك وخالتك سكينة تشكر فيك
قلنا خلاص زيادة الخير خيرين... يا سحر تعالي جنبنا هنا..
... يا سيدي الحسن تنجدني..
البنيي جات تمشي بي مهلي... والله سمحي سماحةً تحرق في المصارين وعيونها غلاد وحواجبينا علي الهلال
وصديرها يعوم قداما زي الوزين.. وخصيرا يمين أصغر من السبلوقة.. أما إن كان لي الرجلين متمسحان زي
مِرِق العرِش أليل الأُوّض...والكفين شكلهن ناعمات بس حلاوة قطن.. والشي التاني ماني قادر أوصفه..
يمين ريقي نشف وقعدت أبلع فيهو تقول متغدي تركين ومتعشي فسيخ...
جسمي بقى يرجف زي المورود(الحمى) ورجليني بقن ينطاقشن علي ضنب الضب وعيوني اتلصقن
في نص راسي بس بقيت زي القعويي(القعونجة).. وصوف جلدي كله قام بس أبو القنفذ..
- سلام يا دكتور...
يمين غلبني أرد وأحناكي بقن يكركبن زي الهبابة ولساني تقل تقول هاجرنو بي عتلة..
أهلا.. دكتور شنو ياخي نحن يا دوب في الأرانب... كيف...
- والله تمام.. عقبالك إن شاء الله
- وعقبالك كمان... أنا لسة بعيد
- مافي حاجة بعيدة
يا ربي أنا هسا أقبل وين... يمين الغنا في حِتي وانا رقصي في حِتي.. اشتر كله كله..
- اجازتك طويلة...
- والله زي تلاتة شهور كدة..
- وحا تقضيها كيف..
- والله حا اشوف البناي وبرنامجه كيف..
- تاني حا ترجع للبنا...
أها قمنا لي حركات الحناكيش...

avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف بنقوري في الأحد أغسطس 23, 2009 11:33 pm

الدكتور ...طارق جبريل ..مبروك عليكم شهر رمضان الكريم وتصوموا
وتفطروا علي خير واعاده الله عليكم وعلينا باليمن والبركات
وشكراً ليك كتير على القصة الجميلة ....
على فكره يا طارق والله ضحكت كتير في راجلك الزي فنطاز
الجاز .... المهم نحن منتظرين بقيت الحلقات بلهفة وشوق
وجزاءك الله الف خير ................ بنقوري
avatar
بنقوري
كبار الشخصيات
كبار الشخصيات

عدد المساهمات : 619
تاريخ التسجيل : 09/06/2009
الموقع : مربع (4

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف محمد عبد الصادق في الأربعاء أغسطس 26, 2009 3:10 pm

الله اكرم حبيبنا طارق عموما حا نساسق وراك لمن نصل للنهايه

محمد عبد الصادق
إمتدادي أصيل

عدد المساهمات : 28
تاريخ التسجيل : 08/08/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف بنقوري في الأحد سبتمبر 20, 2009 10:11 pm

الاخ العزيز ...... طارق جبريل ... السلام عليكم ورحمة الله وبركلته
عسسسسسسسسسسسسسسسسسسسسسسساكم من عواده\
كــــــــــــــــــــــــــــــــــــــــل انت طيب وربنا يعوده
عليكم وعلينا باليمن والخير والبركات وكل سنة وانت
انت والاهل طيبين وسالمين ....مع عاطر التحايا والاشواق
%%%%%%%%% بنقوري %%%%%%%%%%
avatar
بنقوري
كبار الشخصيات
كبار الشخصيات

عدد المساهمات : 619
تاريخ التسجيل : 09/06/2009
الموقع : مربع (4

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الأربعاء سبتمبر 30, 2009 12:22 pm

سلام يا شباب

(19)
والله يا بت الناس أنا ماني عندي شيتا أسويهو غير البنا..
- ياخي انت راجل دكتور بُنا شنو العليك..
- ما قلنا شي علي أنا لازم اشتغل فشان أرتب حاجاتي واطلع مصاريفي وكدي..
- عجيبة.. المهم عايزين نشوفك في الاجازة دي
- إن شاء الله بنتقابل...
- خالتي سكينة: هيا طارق انت بي هني وانا افتش فيك
حمدتك يا مالك روحي... جيتي في وكتك يا خالتي.. أماني ما كنت مزرزرلي جنس زرزير..
- بعد إذنك بس أشوف الخالة عايزة شنو
... يمين البنية لوّت بوزها شبرين وكان في طريقي كانت رصصت أم عوض دي
- انت يا ابن الهرمة انا خرماني وانت اتاريك غاتس هني بين البنوت...
وتتلوى وتترقص علي الدابي..
- بنوت شنو وحاتك جيتي مرقتيني من خازوقا الله لا يوريك ليه..
- الرسول آآولدي ما تغتس مع أخوك دة.. والبنيي حلاتا..
- هسا إنت في السفي ولا في الغتسي عاملة شلاليفك زي غِتيات الكوريي كدي
- (ضاحكة).. بري بري يا ولدي شوفلي سفي
- ليه حق عم عبد الله يعرس فوقك انت مسوياها صعوط وهجيج
- إي عمك مطرطش وحا يقعد يربي في البُطان لامن يموت..
دحين شوفلي سفي وخلي كلامك المسيخ دة...
- مسيخ شنو.. بقيتي تكشفي كمان..
انطلقتي علي كُبرِك.. انت دحين قبُل دة أُمِك ما سِكرَت..
- أيي (ضاحكة).. أيي يا ولدي جدك مُحُمَد كان خاتيلو قزازي ألت شري تحت الازيار
ومعاها كم قزازيي ألت بيرة الجمل...
جن هي وعمتي ستنور قدرها كدي وقالن يضوقن الشي دة.. وكبايي وراء كبايي
لامن طشمن ورقدن خَل وانبطحن في الرملة..
قامت عمتي سألتها: انت يا الزهرة نحن وين
قامت ردت عليها: إنت نحن وين ولا نحن ذاتنا مِنِنْ (من نحن)
واللذيذ يا ولدي عمتي كان عندها شافع ترضع فيهو قامت قلبتو بي
صُلبو وعايزة ترضعوا وقالت لي أُمي: إنت الولد دة مالو شلاليفو بقن كبار كدي
- (ميتة من الضحك) الله يرحمن.. كدي قوم شوفلي سفي أنا خلاص اتكهربت
شفتلي سفي وغمتها بيها ومشيت اهجج مع عوض
وفجأة قام أبو عوض قال: يا جماعة كتر خيركم وربنا يجمعنا في ساعة خير
- شرفتو كتير والله
- جات خالة العروس: يا جماعة ما بدري
- لا والله نمشي والليلة نحن ذاتو ساهرنا
- شرفتونا والله.. حبابكم عشرة
ونحن طالعين علي عرباتنا جرتني خالة المرة من يدي:
- انت وعوض ما تقعدوا
- عوض كان داير يقعد أليقعد علي أنا أبوي بيكون هسا شايلوا
كلاشنكوف ومنتظرني.. دحين هو إن بقا داير يقعد خليهو
... عوض حمر لي واعتذرلهم..
- خلاص انت وعوض تجو تفطروا معانا يوم الجمعة الجايي
- إن شاء الله
بيني وبينكم اتلفتَ وشفت في البنيي... يمين قمرة في العمارات
الشعر أسود يقول يا ليل.. والفستان الأحمر ملصقلو في جسم
زي القمردين.. والعيون وااارمادي والتراب في خشمي أنا من العيون..
انعل ابوك يا الامتداد بس برضو بنحبك..
شفتها وشافتني...
ومشينا لي بيوتنا...

avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الخميس ديسمبر 24, 2009 12:44 pm

(20)
رجعنا لي بيوتنا وخيلان عوض واعمامو كل زول مشى علي بيتو...
- عوض: اسمع اقلع هدومك وتعالي نتونس برة..
- كويس كدي نشوف الجو كيفن لا جوة وبطلعلك..
دخلت لقيت جبيرين منقطر في سريرو وخالف رجلينو تقول شِعب ألات كَرِقِي (عيدان الراكوبة)
والرادي تحتو تلعلع فيهو مذيعة اسمها المدفعجي من لندن.. وانا خايف من مدافع كلامه ارمش في عيوني..
- أها مشيتو لي خطوبة الجن دي..
- أيوة.. (ماني قادر ازيد كلمي تاني يقوم يهيج فوقي لا ايدي لا كراعي.. عوض يخطب وانا اتزرزر)
- والله مسخرة وشغل نسوان وكلام فارغ وعمك عبد الله ذاته مطرطش
-......
دخلتلي في سروال وعراقي ومرقت علي عوض..
وقعدنا في الحجرين القدام البيوت... ياهم مكانا المفضل من زمن بعيد..
- هسا اليشوفك هسا ما يشوفك قبيل..
- ليه...
- قبيل مهندم وعندك قيمي شوف هسا بي بنطلونك المقطع دة لاهو لامي ردا ولاهو بنطلون
وفنيلة الحمالات المقدقدة علي سلك كفاي الجداد كدي...
- (يضحك) ياخي هسا نحن في شنو وانت في شنو..
- شنو تاني كمان خطوبة وخطبت وورطني سبعين ورطي... شنو تاني...
- هسا الجمعة الجاية كيف؟
- لا جمعة ولا خميس تموت موتك يا ابو الشباب... انا عايز اشوف البنا عشان نبدأ ندور تاني
- أها وبعداك..
- بعداك امشي اشوف قرايتي كمان..
- انت ما عايز تقعد مع سحر لي؟؟
- أها يا مرسال الشوق... شوف يا عوض انت عارف رايي كويس في الحتة دي..
انا لاني فاضي لي حب ولاني قادر علي خطوبة والأيام دي اسمع نصيحتي
إن بقيت لاقيت عمك جبيرين لا تكتر معاهو الكلام شي..
- ياخي والله البت حلوة وشكلها بتريدك والناس ديل ناس كويسين...
- (غلبني أقوله سمحة لامن تخلي الزول يتقلَّم حتت حتت).. ما قلنا شي.. انت الناس
ديل العاجبهم فينا شنو... لانا زينين متل الناس ولا اهلنا منغنغين... شي يحير..
- ياخي يضع سره في أضعف خلقه..
- إيي سر شنو إنت باقيلي بوم... هسا نحن سرنا شنو؟؟ اماتنا مقابلات الصيجان
ليلِن ونهارِن... وابهاتنا يعافروا من تصبح لامن تشرق وياهو قدح القراصي
وصحن الفول ولامن يقدحولنا بيض زي العندنا كرامي... نقرب نزغرد.. تقولي سِر...
- ياخي بي حالتنا البنيات عايزاتننا وراقدات خل... انت بس باركها وبتتعدل..
- عوض... انت باقيلي جنيت... انا جنس شيتك دا آآبسوي... يمين جبيرين علي
يطردني من البيت وانت بيتكم مافيهو محل لي إبري... وقتين داك أقبل وين انا...
- ياخي هي قالت بس نفسها تقعد معاك وتتونس معاك... لاها دايري خطوبي
لا شيتين.. وهي عارفاك سنيح وراسك دمق... دحين ياخي اجبر بي خاطرها بس
- انتو باقيلي حددتولي اعرسها متين... اتاريهو ضحكك القبيل عندو معني
وانا اقول عوض مالو يتبسم لا قعر اضانو...
- والله الكلام دة من زمان بس انت عامل اضان الحامل طرشة...
- عوض اقولك شي قوم نوم واحلم زي ماك عايز... انا خلني ماني وش نعمي..
وانت اصبر ساكت علي الراجيك...
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف عوض كمباء في السبت ديسمبر 26, 2009 7:22 am

*
avatar
عوض كمباء
الإدارة العامة
الإدارة العامة

عدد المساهمات : 156
تاريخ التسجيل : 05/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الأحد ديسمبر 27, 2009 11:39 am

عوض كمباء كتب:*

شكرا يا حبيبنا علي عتالة البوست
شكله كدة مافي زول شغال بي
ههههههههههههههه
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف عوض كمباء في الإثنين ديسمبر 28, 2009 5:13 am

لا يا رئس بس كان من مجرد تثبيت الموضوع
avatar
عوض كمباء
الإدارة العامة
الإدارة العامة

عدد المساهمات : 156
تاريخ التسجيل : 05/06/2009

الرجوع الى أعلى الصفحة اذهب الى الأسفل

رد: أي بت شديدة بتحب ليها طُلبة (صبي بناي)

مُساهمة من طرف طارق جبريل في الإثنين ديسمبر 28, 2009 11:54 am

عوض كمباء كتب:لا يا رئس بس كان من مجرد تثبيت الموضوع

تسلم يا حبيب
بس الناس شايفها بتجي تقرأ وتفحط
ههههههههههه
ياخي ادونا حنك حنكين لله
avatar
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

صفحة 4 من اصل 5 الصفحة السابقة  1, 2, 3, 4, 5  الصفحة التالية

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى