الإمتداد
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

الهضربة بتودي التوج

4 مشترك

اذهب الى الأسفل

الهضربة بتودي التوج Empty الهضربة بتودي التوج

مُساهمة من طرف طارق جبريل الأربعاء أبريل 21, 2010 5:46 pm

الحبيبين كيفنكم
الله يستركم ويبعد منكم العوارض والمرض يا رب
دحين لا قدر الله ان بقى واحدا فيكم داير يشيلو مرارة ولا لوز
يشوفلو ابعد حِتي ممكن يكوجن فيها الشي دة فشان ما يقعلكم الوقع لي واحدا قريبي
ويقعد يهضرب ويفتو كله لامن العكاكيز تتضارب فوقه..
احمد راجلا زين... من قام وشبى وهو رياد ويحب البنوت زي عيونه
اصله قلبه دة رقده خل.. بالله زي الركشة.. اي بت عجبتو يشعلقها في قلبه
حتى ان بقى من طرف واحد...
امه حلفت بي ايمانها علي يتزوج بت خاله..
- يمة انا رايدلي بت من زمااان ودايرا
- يا ولدي بت خالك ان اديت فيها كلمة وماني قادري اتراجع منها
- نان يمة ما تشاوريني.. موش يبقى عندي فهما تاني
- انت عاد ماك ود رضاي عارفاك آآبتقولي لا
- نان يمة فشان ود رضاك تدفنيني
- يا ولدي لا تكتر الحجي بتخالك ياها غتاك وماني شايفالي زولتا غيرها بتنفعها
زولكم اتوكر في بت خاله وعرسها.. وبقى مهَضْلِم علي فُراق حبيبته
الدنيا ساقته معاها وجابلو منها شافعين
يوم حسالو بي ألما في بطنه.. من دكتور لي دكتور
من فحص لي فحص:
ياخي ضروري نشيل ليك المرارة
قال يقوم يمشي مصر يشيلا
اقنعوه يسويها في الخرطوم
اتوكل ودخل العملية والحمد لله العمليي نجحت وطلعوهوا في العنبر.. البنج ما فكة منه
اخواته ومرته واخوانه كلهم متلمين فوقه..
اها والبنج لليلي ما فكة منه قوم يا شقي الحال هضرب وسط الناس:
- يا حنان انا كنت دايرك علي امي عرستلي الكُوهني بت خالي
- وحات الله يا حنان عضم الشيطان أليلا علي راس الكُونش ان بقت نغزتك بيهو علي يجيك تتنوس
اخواته بقن يضحكن وامه تعضعض في لسانها ومرته وشها حمر وهو مرة مرة يديها هضربة
- وحاتك يا حنان رُكبتها علي رجل العنقريب الكافينلهم فيها كوريي
- يا حنان انا وِكِر ضُمة ضُمة
اخوه مشى مسكه من راسو وصاقعلو: احمد قول بسم الله... احمد.. احمد
زولكم ياخدلو صني وتاني يقوم يهضرب:
- يا حنان الضرعات ألاتها زي رُقاد العنقريب من غير لحاف
اصله اخواته ديل بقن يزحن بالضحك.. وأمه اتمحنت ومسكت سبحتها وتدعي في ربها: يا ربي يبقى كويس ود حشاي احمد
المهم المسكيني ما خلالا جنبي تنوم عليها:
- يا حنان شعرها مكبوس كركار زي لساتك القندران المشحمات
- يا حنان انا غيرك اصلي ما ردتة
ساعتين وهو في الحالة دي لامن فاق من البنج
وكتين فاق كويس اخواته اتزرقن ومرقن من الأوضة وطلَعَن اُمَهِن معاهِن واخوانه مرقوا
شويتين المرة شالت سير الدِرِب وبقت تمعط فيهو في رجلينه وتكورك:
انا جضومي زي لستك العجلة المنفس يا احمد... وطاااااق تجلد فيهو بي سير الدرب
انا ستيانتي علي خورتاية الغنم البعلقوها في ضرعاتن... وطاااااق تجلد فيهو بي سير الدرب
الرجل بقى يكورك لامن اهلو جوا منكبسين عليهو.. وبي الله ويامين فكوا منه المرة

دحين يا الحبان ان بقى فيكم واحدا هضراب اليقول للدكتور في البنج تقلي لساني

طارق جبريل
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

الهضربة بتودي التوج Empty رد: الهضربة بتودي التوج

مُساهمة من طرف امير الجمري الخميس أبريل 22, 2010 11:26 am

هههههههههههههههههههههههههههههههههههههههههههههههههههههههههههههههههههههههههههههها
ههههههههههههههههههههههههههههههههههههههههههههههههههههههههههههههههههههههههههههههه
والله انت كان نصيح انا الحس المكواة حااارة

لكن الهضربة قاعدة نحصل .. وانا قبل كده حصلت لي لكن الزمن داك كان زمن كورة سااااااكت يعني مافي تعريجات

امير الجمري
إمتدادي جديد

عدد المساهمات : 17
تاريخ التسجيل : 19/04/2010

الرجوع الى أعلى الصفحة اذهب الى الأسفل

الهضربة بتودي التوج Empty رد: الهضربة بتودي التوج

مُساهمة من طرف طارق جبريل الخميس أبريل 22, 2010 11:57 am

امير الجمري كتب:هههههههههههههههههههههههههههههههههههههههههههههههههههههههههههههههههههههههههههههها
ههههههههههههههههههههههههههههههههههههههههههههههههههههههههههههههههههههههههههههههه
والله انت كان نصيح انا الحس المكواة حااارة

لكن الهضربة قاعدة نحصل .. وانا قبل كده حصلت لي لكن الزمن داك كان زمن كورة سااااااكت يعني مافي تعريجات
عاد انت هضربتك برااااااااها

Laughing Laughing Laughing Laughing Laughing
طارق جبريل
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

الهضربة بتودي التوج Empty رد: الهضربة بتودي التوج

مُساهمة من طرف بدر يعقوب الخميس أبريل 22, 2010 12:09 pm

دكتور سلام

دائما بتتحفنا بالجديد والقصص المعبرة
ود الجمري ده مهضرب سايييييييييييي ده متوفش عديل

واصل ياجميل

بدر يعقوب
كبار الشخصيات
كبار الشخصيات

عدد المساهمات : 484
تاريخ التسجيل : 06/06/2009

الرجوع الى أعلى الصفحة اذهب الى الأسفل

الهضربة بتودي التوج Empty رد: الهضربة بتودي التوج

مُساهمة من طرف طارق جبريل الخميس أبريل 22, 2010 12:45 pm

بدر يعقوب كتب:دكتور سلام

دائما بتتحفنا بالجديد والقصص المعبرة
ود الجمري ده مهضرب سايييييييييييي ده متوفش عديل

واصل ياجميل
بدر البدور يا حبيبنا
ياخي امير دة اسألني منه انا من زمن الاسواق الحرة مهضرب
ههههههههههههههه
طارق جبريل
طارق جبريل
الإدارة العامة
الإدارة العامة

عدد المساهمات : 236
تاريخ التسجيل : 06/06/2009

الرجوع الى أعلى الصفحة اذهب الى الأسفل

الهضربة بتودي التوج Empty رد: الهضربة بتودي التوج

مُساهمة من طرف بنقوري الأحد أبريل 25, 2010 8:43 am

الدكتور .. طارق ... التحية لك يا رائع يا جميل
وانت دائماً والله تتحفنا بالجميل ووالقصص الرائعة

انا بلقبك بجنون اللغات وانت فعلاً جنون اللغات ماشاء الله عليك

لك كل التحايا والسلام يا رائع
بنقوري
بنقوري
كبار الشخصيات
كبار الشخصيات

عدد المساهمات : 619
تاريخ التسجيل : 09/06/2009
الموقع : مربع (4

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى