باعوضـــــــــــــــة

أنا جعلي على السكين ومن فصيلة البشير وأحمق من أبوالدقيق .. أمبارح بعد صلاة الجمعة ناس البيت كلهم مشوا حديقة.. كنت قاعد زي الشيطان براي في البيت ... المهم شغلت التلفزيون والبوتجاز والمكنسة والثلاجة كمان و أي آلة كهربائية أو ميكانيكية في البيت وكنت مبسوط آخر إنبساطة أضحك وأغني في وقت واحد .. ما مافي إزعاج لا ضربني ولا ضربتو .. لغاية ما سمعت لي صوت أنين ضعيف فوقي .. عاينت جاي وجاي وشفت لي باعوضة زي الأباتشي ركت في الحيطة .. شكلها كده مليانه من الجيران متعددي الجنسيات ... صراحة خفت تنقل لي دمهم وأقوم أرطن ولا آكل لي ضفدعة ولا ضبً ... سريع جداً فتحت شبابيك البيت ووقفت قدامها وقلت ليها بكل أدب عليك الله أمشي ... عاينت لي بعين واحدة وبإحتقار وطارت لجوه !!!!!!!!!
الولد عامل حريف .. عندي مركوب من جلد الأصلة نمرة واحد جبتو معايا لمن كنت في إجازة ... شلّت فرده ومشيب أدّبا على أطراف أصابع كرعيني وبراحة أفتش على الملعونة دي .... دخلت أحد الغرف الفيها تلفزيون ولقيتها راكه في الشاشة ... إقتربت بشويش .. كان في واحد من ناس الحكومة عاملين معاهو لقاء وكان بيتكلم ... الباعوضة راكه في نخرتو الكبيرة دي !!! بت الكلب دي أتاريها معارضة ومرسلة من الناس ديك القاعدين في لندن في العمارة ديك وفي الدور (00) رسلوها عشان تقّرص الراجل ....
عقلي الباطني جاتو تعليمات لابدّ من قتل وعصر هذه الباعوضة وتشتيتها على كيمان وبكل قوتي جدعتها بالفرده .. شاشة التلفزيون بقت زي الدقيق الدراش لمن كانت حبوبتي بتدرش حبوب العيش في المحراكه .... ما مشكلة التلفزيون فداء الحكومة ... فرحت شديد أهي ماتت وشبعت موت ولكن فجأة سمعت صوتها ماري جنبي ... سكيتها لقيتها راكه في مشلعيب التحف ومن بعيد صوبت ورميت الفرده والفرده زي الطلقة جات في المشلعيب وإتشقلب المشلعيب وإتدشدشت التحف وإتكسرت حته حته ... برضو ما مشكلة عشان جماعتنا ديل يهون كل شئ .. صفرت ودنقرت شلته الفرده ودخلت غرفة النوم علشان أديها بخة من ريحة من عطور زوجتي المرصوصة بالتسريحة زي طابور الصباح ......
صرخت بهستيريا لمن لقيتها قدامي راكه في المراية وبتحرك لي جناحاتها يمين وشمال .. يعني شنو ؟ إنت ما بتموتي .. أصبري لي الدوره دي ما في ليك أي طريقة وبأقصى سرعة رميت الفرده عليها .............................!!
التسريحة والريحة وكل الدنيا الجنب التسريحة راحت شمار في مرقة ... وفضلت ساكيها من مكان لمكان .. البوتجاز إتكسرت قزازة الفرن بتاعو ة والثلاجة بقت سحارة والدولاب بقى عشرة ضلف وإختلط الحابل بالنابل والبيت بقى زي فتة الميرغنية .....!!!!!
بأمانة تعبت وإستسلمت وقلت أعقد معاها معاهدة صلح والصلح خير .. مشيت عليها ولقيتها إتمرغت في ريحة زوجتي البنية وقلت ليها خلاص نتسالم !!!!!!!!!!! صفقت وتفضت الريحة وعاينت لي عين الحسود فيها عود وطارت طلعت من الشباك بكل هدوء ...............
أقول ليكم والله ما زعلت على حاجة إلا فردة مركوبي اللقيتها مخرمة ومقطعة من الجوانب لمن جيت أطلع ........

كان الأجدر أن تزداد دماءً أجنبية دون خسران الصناعات المحلية
أضف إلى ذلك أن حرب البعوض القاتل فيها والمقتول في النار

خسارة المركوب وتباً لما أتلف إلكترونياً

الاخ الكريم فتح الرحمن لك التحيه وكثير الاحترامات ورمضان كريم تصوم وتفطر علي خير
السرد جميل ومافي شك استراحه تغير وترويح للنفس بس ذي ماقال ليك شاعرنا الجميل الهميم ابوقصي خليك بعيد من معارضه وحكومه,لآن المكان مكان اجتماعي انساني بحت لاعلاقة له بالمعارضه ولا بالحكومة كما اسلفنا من قبل
علي كل حال اشكرك كثيرا واتمني ان تكون فهمت ما اقصده
اتمني لك ولاسرتك الكريمه دوام العافيه
التعديل في كلمة

ابو الروس ..
زكرتني توم اند جيري .. يا عزيزي من عاشر المستحيلات محاربت الباعوض في السودان - تتخيل انفصال الجنوب كان اسهل من محاربة الباعوض العايش معانا من يام المهدية واظن كمان قبل حملة عبدالرحمن بن السرح .. يا خي الباعوض بقي زي وزيك عندو حقوق وواجبات. يعني بالعربي الفصيح (( مواطن درجه اولي )) فياااااااااخي حربك هذه تعد تصفيه عرقيه ... برجع ليك تاني