الإمتداد
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

يوميات ذهجان

4 مشترك

اذهب الى الأسفل

يوميات ذهجان Empty يوميات ذهجان

مُساهمة من طرف محمد عبد الرحيم قسم الله الجمعة أبريل 02, 2010 10:01 am

وانت منتشى وعايذ ترد جمائل بعض الاصدقاء ونظام كرم تقوم تعذم واحد من الناس ديل وتكون من الصباح شغال جرى لا خليت سوق الندى ولاخليت بقاله سليمان و ما لقيت حاجه عند سليمان تجرى الذلط عند بابكير وانت راجع اغشى فرن نذار جيب معاك العيش خلاص الامور كلها تمام ..الله نسيت ذيت السمسم !!..مامشكله جيب من دكان حسن ( يا ابو قصى فضفض لينا شويه فى دكان حسن ) المهم الامور ظابطه .... اخ الذول اتاخر المفروض يجى لفطور الجمعه لحدى الساعه 12 ما جا ..الباب دقه ..ولد افتح الباب لعمك ..يا ابوى دى بتاعه النفايات ..يااخ العن ............. تانى الباب دقه ..ولد ..يا ابوى هسع انا ما فتحت الباب خلى الدور ده تمشى لينا .. يا ود افتح الباب ..يا امى بتاع اللبن جاء ..تلفح توبا نص فى الواطه ونص فى راسها وهى ماشه للمطبخ تشيل حله اللبن قوم ادينى قروش الاسبوع لبتاع اللبن ..! اخخخخخ كل منك هسع لو جيت كان فطرنا واتخارجنا من جيب جيب دى .
وانت ماشى للصلاه يعمل ليك مس كول ترجع ليه ..الله ترد ليك المفعوص عفوا ليس لديك رصيد لاجراء هذه المكالمه ..طلعت ليك جنيه وشحنت .. يا ذول خير مالك ..ابدا والله بس جونا جماعه كده اخرونى لكن جايك غدا !!!! ترجع البيت تسبسب ياااااا مرأ الذول ده جاى غدا .. اها نان نعمل شنو ..ختى ليه الفول ده ..اجى اجى فول شنو انت جنيت ..خلاص الجبنه لو ما عملتيها فى الفول اعملى مكرونه بالجبنه وختى ملاح الشرموط .. مش فى كسره ؟؟ لالا ..! يلوى حن.... من قبيل ما تتكلمى .. هى انت قلت فطور ما غدا.
الضيف جا ومويه فى عصير لحدى ما الغداء يجهذ ..من المطبخ الوليه تاشر ليك خلسه ..عن اذنك لحظه ..بهمهمه مالك فى شنو ..الغاذ قطع ..وتكون عملت ساتر منك ..تقوم تعضى شلاليفك وتتلفت يمين شمال ..تشيل الانبوبه وتبقى مارق .. بتاع الركشه قال الا 3 جنيه .. ما مشكله انا ذاتى غلطان ..وانت راجع قابلك عمك على وحاج حسن عاملين كشف لعمك خير الله لانه راقد فى الاسبتاليه خلاص هسع ما معاى بخليها عند الاولاد ..!!
اخيرا الغدا ختوه ملاح شرموط بتاع الفطورمع كسره الفوق بس جديده التحت بايته .!!وحبه دمعه فيها ذى عضم واحد ولحمتين صغار وصحن سلطه خضراء وسلطه اسود ومكرونه بالجبنه ..الام تنادى يا نادر نادى اخوانك للغدا الشفع قعدتهم فى الصينيه كل واحد ختف ليه لحمه وانت تحمر للشافع علشان يرجع العضم ولكن هيهات ..
الحمدلله الغداء انتهى والتحليه سرويس بتاع بطيخ وطوالى الشاى منعنع ..الونسه جرت دخلنا فى شاى المغرب شاى الصباح بتاع بكرة الا يكون شاى احمر .. وانت مقدم الضيف عند الباب يقابلك عمك على اه قروش الكشف ودى اخر عشرة ..
غايو انت فى الجمعه دى بتكون صرفت ليك ذى 150 جنيه و17 شلوت فى الشفع وامهم و12سب وشتم
الجمعه البعديها تقابل نفس الذول وبى بجاحه يقول ليك ...شنو ياخى ما فيها غدا تانى ؟؟؟
وانت من غير ما تشعر تقول ليه يا عوض الله عذبتنا ..!!!!!!
محمد عبد الرحيم قسم الله
محمد عبد الرحيم قسم الله
إمتدادي مميّز

عدد المساهمات : 88
تاريخ التسجيل : 19/06/2009

الرجوع الى أعلى الصفحة اذهب الى الأسفل

يوميات ذهجان Empty رد: يوميات ذهجان

مُساهمة من طرف يحي حمد سعيد حامد النضيف السبت أبريل 03, 2010 7:15 pm

::
تـعــرف .. يــا .. مـحـمــد .. نـفـســي .. فـي مـلاح الـشــرمـوط .. دهـ.
:
هـهــهـــــااااي.
أعـمــل.. حـســابك .. عــوض الله .. قــاعـد .. يـوزع .. شــمــار .. المـلاح.
::

يحي حمد سعيد حامد النضيف
وسام الإبداع
وسام الإبداع

عدد المساهمات : 586
تاريخ التسجيل : 07/06/2009
الموقع : مـربع 3

الرجوع الى أعلى الصفحة اذهب الى الأسفل

يوميات ذهجان Empty رد: يوميات ذهجان

مُساهمة من طرف Majdi AbdulRahim fadul Mo الأحد أبريل 04, 2010 1:50 am

يااااا الله يا أب شيبة والله كل شيبة في رأسي مشت لحته أنت زكرتها من سليمان الزول الجميل وبقالتو لبقالة حمندي وبابكير وحتي بقالة الجملة حقت علي القريش وفرنوا المحسن خليك من مخبز نزار الآلي ربنا يرحم أخونا حمندي الزول الرائع وحتي علي القريش رحلوا في صمت ونحنا هنا في الغربة نشد سلك العزاء لمن مضو ونتحسر لدكان حسن ومحمد العريس وحتي فاطمة حسين مراكز الزاكرة بقت تودي وتجيب في قفة الخضااار من العُشرة وربع اللحمة أو نص بالكتير وفي العدم من بحيري الجزار والتقي تشيل منو سلطة وليمون والدكوة من حاجة آمنة أو عائشة زراع أو سعدية ولا ثريا بانقا رموز يامحمد محفورة في المخيخ والشرموط الناشف معلق في سلك الغسيل وتجيب الفندق وتقعد تدق ومحمصة عصام وطه ود الكول والله يامحمد الواحد بيزكر سوق الندي بفريق الكورة حقنا ولويس وناااس قرنق والسر حق الخضار ديل كلهم كانو حرفه بشكل وعبدالمنعم حمندي وعمر بروتشاقه ووليد وسراج وناااس أبواسكندر وركس والبوش حق ركس ويقعد يدينا المقاولة ويشتت ويكون شال نص المقاولة ولمن تتنتهي وتجئ تحاسب يقول ليك المعلم شال نص المبلغ وياحليلك ياعتر زكريات واصل تجلي يا محمد يعني كستر بالرز مافي بطيخ وشاي ساده لكن الكسرة البايته دي أمنقا حاجة وكمان لو أديته رشوشة بالبصل والشطة الحمراء والشمار والله توفر الشرموط لرمضان الجاااااااي .
،،،،أبوقصي،،،،
Majdi AbdulRahim fadul Mo
Majdi AbdulRahim fadul Mo
وسام التميز
وسام التميز

عدد المساهمات : 673
تاريخ التسجيل : 08/06/2009
الموقع : الأمتدا

الرجوع الى أعلى الصفحة اذهب الى الأسفل

يوميات ذهجان Empty رد: يوميات ذهجان

مُساهمة من طرف فريني الأحد أبريل 04, 2010 1:57 pm

يا أبو شيبة شكلو ضيفك دا مع نارد أخوان ما لمه في كسره بايته ذاتو . 
فريني
فريني
عضو مميز
عضو مميز

عدد المساهمات : 209
تاريخ التسجيل : 17/02/2010
الموقع : الرياض

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى