إهداء إلى بنقوري

الاخ الغالي ..وجاري العزيز ....محمد مصطفى
شكراً لك وكتر خيرك وجزاءك الف خير للهدية الغالية
وربنا يجمعنا بك على الخيروالمحبة ولك كل الود والاشواق
ونديك شعر حلمنتيشي ......الشاعر عبد الرحيم الصادق حسن

قول يا لطيف !!!

يازول اقيف ..قبال تمش
اذكر معاى قول يالطيف
واسمع كلاماً مو نبش
من زول كبير...جرب كتير
ضاق العسل ضاق الحناضل والبصل
ضاق اللفخ .. ضاق الطرش
شاف الشنا شاف السمح زي الشمس
قول يا لطيف !!!
×××××××
قال العرس .... ما بنهبش
لي زول مفلس مندرش ..
داير شنط مكضوضة كض
داير عطور .. داير بخور
داير تسعتاشر كبش ...
داير جلاليباً مكان ابعد بعيد
درب الوعر يا وليدي ليك ما بندقش
وان كان وقع وسط الدرب ..اذكر دوام .. قول يالطيف
ما بتلقى ليك زولاً يمد ايديهو ليك ..
ما بتلقى ليك لهمة رغيف .....
وان كان شبع يوماً رغيف .....
حتا كان قروض.......
حمدله لي رب العرش ..
قول يا لطيف !!!
××××××××
يا وليد تعال ....
عاين معاى لي ناس مجربه تنكرش
هدامه خيش ......
مليانه بالشرا والقمل !!
زي الوحوش ساكنه الهويش
تاكل غباش تاكل حشيش
وين تلقى قبضات الدريش
ناساً ضعاف بايته القوا ..
عادمة الغطا .. عادمة الفرش
متوسدة الليد والبرش .....
قول يا لطيف !!!
×××××××
وصبية زي وش القمر
ما راجيه ليها خريف عمر
شايفاهو زي موية الرهاب
شايفه الحياة زي الكضب زي السراب
فاقده الامل سلكت دريبات العذاب ..
لاقاها زول غشاها بالمال والبنين ...
بقاها زي بت ام لعاب
باعت امل شان القرش
قول يا لطيف !!!
×××××××
ياوليد تعال عاين هناك
داك الوليد المنبرش ...
شاحط البطن زي السعن
كرعين رقاق ..يشحد قرش
يسطل كمان ...
بنزينو اهم من الشراب ..
وريالتو سايله على السور
وقضاهو زي بوستك ملصق في العيون
طوحال وكلزات في البطون ...
ديدان تفقع في الكرش ......
عوار كتير .. ضفار طوال ...
ساكن الكوش .. يخمش خمش
قول يا لطيف !!!
قول يا احد .. قول يا صمد
من قبل تعين معتمد ...
وانده معاى رب العباد ..
يصلح حويل هذي البلاد
من الرشاوي من الفساد
من البوار من الكساد ..
من الجفاف ... من التصحر والجراد
يديها خير الصالحين .....
ويكفيها شر اب كرش
واختم دوام بي يالطيف
قول يالطيف !!!


مع تحيات ... بنقوري