كل عام والشماشة بخير!!(لايوجد سلسيون..يوجد تعاطف)

واحِد شَقِي....
محروم دَوامْ.....من عاطفة من قولة سلام..
الليل أخوك....
وأبوك أشباح الظلام....
تتوسدْ الحَسرة وتنوم....
بالهَمٌ تقوم..
تلقاهو حارسَكْ وفي إنتظارَك؟
بي لهفةَ جاييك يحضُنكْ....
يقرقِشْ عُضامَكْ....يَهْرِسَكْ..
وبرضو يخدَع فيكْ ويقول:
(ما ليك بَلايْ شايِف أنيس في حُضني ليكْ!..
لا كِلمَة تحرِق في الحَشا!..
لا نظرَة تنخٌر في العَضُم....
لا غيري يا بخْتي يكْجُم فيك كَجِمْ!).......
وقَعدتَ يا محروم تنوحْ....
والهم مُكحٌِل مُقلتيكْ...
ستفتُ حُذنَك وستٌفك؟..
وإتحَكٌرتَ ما بين ليل تجيهو وليل يجيك...
تعشَم إنٌو يهدهدك...
أو يخفِفْ مِحنَتكْ..........
ومرات تشوفو بينقُلكْ..
لدروب ما فيها جُور...عامرة بىْ ألوان حُبور..
باقاتْ زُهور..
زحمَة أريجْ....وعِطر بخور..
وتلقاهو إجتاحَك...ذُهول؟!!
وتطفُر دموع...
تغسل أساكَ وتمسحو....
وزغرودة تعلن عن ولادة زول جديد....
وشعور مَجيدْ...
وليل بِشيل في جناحو عِيد...
وبُشارة اليوم السَعيدْ...
لكِنْ!!.....
فجأة في لَمح البَصَر...
يمرُقْ عليك اليَصفَعك؟......
ويقول بلاشْ شَطحات وَهمْ!..
خِداع سَرابْ!!
أضغَاثْ حُلم؟...
وليلَكْ الكان خِلتو فاتكْ...........؟
تلقاهو مُتعورِضْ في زورَكْ....
وفايِق يخنِق في براءتك..
وإبتسامتَكْ......؟
ومن صَفاك......يَجْغُم ...جَغِمْ...!
ما إنتَ من ولدوك عديلْ....
أدٌوكَ للشَقَى والمِحَنْ...
واحِد شَقي!؟.......
(مَحْروم دَوامْ مِن عاطْفَة مِن قولَة سَلامْ)..............................؟!

(القصيدة للأخ الشاعر المبدع الرشيد أحمد عباس - أمدرمان/أبوروف...له عاطر التحايا)

أهلنا العامرين...
هبوط الإمتداد....سيول جدة...أخبار الوفيات....المظاهرات والبمبان...وأحزان كتييييييرة ودعنا فيها السنة الكُج الإسمها 2009 دي!...
أسفنا للإنقطاع...نتمني شوية فرح في السنة الجديدة....وكل عام والأحبة بالداخل والخارج بألف خير.....
تضامني للعام الجديد مع أبناء الشوارع....ومعاً لسودان يخلو من المتشردين...

الأخ المرهف بدر الدين .. قرأت موضوعك الضاج بهموم الآخرين وأسعدني جداً احساسك بما تعانيه تلك الفئة أحييك على هذا الإدلاء وأضم صوتي لصوتكم لإنتشال هذه الفئة المشردة من موج الضياع ..
وعام سعيد إن شاء الله علينا جميعاً ولكم مودتي

أخوك عادل عوض بلال

ود الإمتداد كتب:الأخ المرهف بدر الدين .. قرأت موضوعك الضاج بهموم الآخرين وأسعدني جداً احساسك بما تعانيه تلك الفئة أحييك على هذا الإدلاء وأضم صوتي لصوتكم لإنتشال هذه الفئة المشردة من موج الضياع ..
وعام سعيد إن شاء الله علينا جميعاً ولكم مودتي

أخوك عادل عوض بلال

أخي عادل عوض بلال......
ينزلق من مجرى خرافي في المدينة الآثمة..من كوة منسية في غابة الأسمنت..مساكن الكبار..ومصدر القرارفي المحافظة..تلفظه الطرقات كهلاً دون السادسة..ويحضنه الرصيف الأب...يعتلف الجوع قوتاً من زبالات الطريق..تجره دوامة الخبز الحرام للإفتتات قسراً من جيوب الآخرين ..من أسهموا في الإنفلات..يغطي عريه الفاضح بنشوة إبتعادهم الزائف خوف الرائحة الهجين..يستكين الكهل..يعبئ صدره شهيق المادة الخطرة..ينتفض..ويشق بأثماله البالية قلب المدينة من جديد.. في عينيه بريق لإنتقامٍ قادم ..أو تسامح..ليس يدري؟!.. يهيأ لمن يراه أنه سيملأ الطرقات سهواً بنشيج وبكاء لم يسمع من قبل..فيصم آذانه.. يجرجر مسئوليته..ويتعامى (عمداً) عن المشهد الكلي..يعلن خيبته بوضوح!!.......وينتظر..وينتظر..وين....ت.....ظ.....ر........؟!
كل عام ..أنت وأنا..وهم والجميع...بخير

Majdi AbdulRahim fadul Mo كتب:بدر إطلالت 2010

عام جديد في كل شئ يارب

موضوع يملئ كل زهرة قطن وتبلله بزبرتو يضمد جرح كل شماسي وبدل قطنة السليسيون والبزين نضع وردة حياة جديدة لهولاء الشريحة المجتمعية التي تحتاج رعاية



،،،،أبوقصي،،،،

مجدي...يا صديق الخال..
ما بين الرعاع الجياع..والهمج الغوغاء..
تتجلى روعة التلاعب بلأحرف....في وصف متناقضات الكون..المختلفة في كلٍ..المتفقة في آنٍ..
ويا بكرة....يا بكرة
يا بكرة الفرح يوماتي
بيكاتل حزن أطفال.....
بتتشابا..عشان تعرف..
شنو الفي إيدنا لى بكرة..
شنو الداخرنو للسكة ؟..
عشان تشرق صباحاتك...
عشان تقصر مسافاتك..
عشان تبرق غماماتك...
عشان تخضر مساحاتك..
عشان بكرة.....وبعد بكرة..
...............رد الله غربتك وحقق أمنياتك يا صديق....

مدخل ثاني:-
ما من مكان يحتويه فيستريح..تعب هو حد الوجع..فشل زريع حين يغرقه التأمل لا يطاق.. والبحث سر الإختلاف..للآخر المنبوذ منه..ظلاً يليق بالألم الذي لا يشتهيه...
ماذا فعلت فتزدحم كل القواميس البذيئة بإتهامي في الشوارع والبيوت؟!...يا للظلام...سيسأل أمه - فيما بعد - تلك التي تهدلت أثداؤها دون الرضاعة ألقمته على الطريق...
ماذا جنيت لأستحق الثأر والتنكيل في جسدي الهرم قبل الأوان؟!.. يا للحرام....سيسأل والده - إن هو إعترف - بفعلته التي قبل الهروب.. عرته في حالة شبق.....؟!..
( ظل الظلام مشكاة تشرق وتغرب بظلم أيامهم بدعة!!.هههههههههه..أسير حربٍ يجهل أسبابها؟!)...............!!
بالرندوك!!...أعمل قريبك.....

مدثر قرجاج كتب:

بدر الدين

جميل هذا الشعور

ليته يعم كل البشر

اكيد سنسعد

اكيد سنلتئم

ياخى نورت من جديد وانشاالله اسباب الانقطاع زالت

ربنا يستر من 2010 فقد دخلناها وقد امتلئنا بالجراح

ليتها فقط تكون سنه للتضميد بدل من تلك الجراحات

التى لا تنتهى البته

محبتى

Thanks Mudethir..
Every thing is be ok..

((السنة الكُج الإسمها 2009 دي!..))

دي صدقته فيها يا بدر الدين ........... والحمدلله

نشوف 2010 فيها سنه ...

تحياتي