شباب وربيع 3 ودورة الوفاء

عادل محمود كتب:

طارق جبريل كتب:سلام يا احبابنا


اخبار الدورة:
سلام11يبدع ويصقع الدنمو5-2
الاهداف: شلبى ثلاثة واشرف ولوى

يا دكتور والله اتزكرت ازايا لاعب الدينمو وسعيد واخوانه الله يطراهم بالخير مافى واحد لاعب من ديل
ومن سلام 11 تزكرت خواجه ووهبة وحافظ قرف ياسلام على زمن الرابطه الجميل
وشكرا ياود جبريل يامبدع
كنا نتمنى سلام 4 بلقيادة مرغنى ابقيقا مرغنى على موسى وفتاح كرتوت
وكنا نتمى النجوم الحمراء( الرد استار بقيادة ابوزيد جاد كريم وعوض كوكه
وياسلام على الزمن الجميل
وشكرا شباب 3 وشكرا طارق على المتابعه الجميلة

يا حبينا المهم انه الناس فكرت تعمل حاجة
ودي ضربة البداية وان شاء الله الامور لي قدام ممكن تكون اجمل
وحقيقي جهد مقدر من الاخوان بابكر يوسف ومعتصم زومو

فريني كتب:مشكور يا دكتور علي هذه الصور الجميلة وتابع و نحن في انتظارك
لكن اكيد في سبب و انت تبدأ بصورة الأخ / عادل أوووف ثم بقية الفرق المشاركة بالدورة ؟

وحاتك يا حبيب مافي اي سبب
بس انا نزلتها حسب التسلسل الجاتني بيهو
ههههههههههههه

يا طارق الدينمو ده كان تامى ولا ناقص بعدين ناس سلام 11 ديل من ذمان بلعبو بالكواديك انتو الدوره دى ما كان تعملوها فى الاجاذه علشان العبيد الكبار يكونو فى.

عرفتوا الناس ديل


الاصدقاء


الدينمو حرق دايرلو سلك
هههههههههههه


فريق الزيوت

اللواء ضد الزيوت 1-0
الدينمو ضد الاصدقاء 3-0

محمد عبد الرحيم قسم الله كتب:يا طارق الدينمو ده كان تامى ولا ناقص بعدين ناس سلام 11 ديل من ذمان بلعبو بالكواديك انتو الدوره دى ما كان تعملوها فى الاجاذه علشان العبيد الكبار يكونو فى.

تعرف يا محمد والله انا نص الناس دي ما اتذكرتها
ياخي الامة كبرت خلاص
هههههههههههه

مراسلة حبيبنا الفاتح فريجون من داخل الدورة:
طارق كيفك
مساء اليوم إتأهل المعلمين بهدف عاطف شرك في شباك الدينمو بعد مباراه جيده من الطرفين إلا ان فارق المهارات مال لصالح المعلمين بقياده الخبير حسن جعفر...الفريق المرافق للمعلمين لدور الأربعه مفروض يكون الأصدقاء بعد ان سحق سلام 11 بثلاثيه إلا ان الأخ بابكر منظم الدوره كان له رأي آخر قضي بتأهل سلام 11 المهزوم في مباراتين ..كيف ماعارف..لكن العالمون ببواطن أمور الدوره ارجعوا الامر الي ان المشرف علي فريق سلام 11 قريب لبابكر..أهل وكده..بعضهم ارجع الامر لتأثر الأخ بابكر بشخصيه كمال شداد في قراراته الإرتجاليه..علي العموم يا دكتور مرسل ليك مع الإيميل ده صوره لحسن جعفر وأخري تجمعه بمحمد صاح الصبي وأزهري سيداحمد وايمن حمد...ناس من الذمن الجميل يا طارق...بالمناسبه حسن جعفر لسه بجضم الكفر ذي ذمان يعني لو عندو شووويه لياقه بلعب في المريخ جنب العجب والنفطي بررراحه....سلامي لجميع الأخوان.
فريجون



حسن جعفر


ايمن حمد ومحمد الصبي وازهري سيد احمد وحسن جعفر

فعلا يادكتور سمعنا بالدورة دي وهي دورة ناجحة تخليدا لزكري رحيل كوكبة من الشباب خالدة في زاكرتنا تغمدهم الله بواسع رحمتة وادخلهم فسيح جنانة مع الصديق والشهداء .
بس بعيب علي القائمين علي امر الدورة لعدم اشتراك فرق عريقة مثل الردستار
وسلام 4 ,,, طيب يادكتور كان تدوهم فرصة عشان الجيرة وكده .
ربيع 3 وناس 3 وكل فرق الامتداد من 1الي 14 فرق عريقة لها صولات وجولات في رابطة الامتداد وخرجت افزاز من اللاعبين المهرة الذين كان لهم دور في الحركة الرياضة في السودان ,,, وحسن جعفر خير دليل علي ذلك .
وفقكم الله لما فية الخير كله للامتداد الحبيب

بدر يعقوب كتب:فعلا يادكتور سمعنا بالدورة دي وهي دورة ناجحة تخليدا لزكري رحيل كوكبة من الشباب خالدة في زاكرتنا تغمدهم الله بواسع رحمتة وادخلهم فسيح جنانة مع الصديق والشهداء .
بس بعيب علي القائمين علي امر الدورة لعدم اشتراك فرق عريقة مثل الردستار
وسلام 4 ,,, طيب يادكتور كان تدوهم فرصة عشان الجيرة وكده .
ربيع 3 وناس 3 وكل فرق الامتداد من 1الي 14 فرق عريقة لها صولات وجولات في رابطة الامتداد وخرجت افزاز من اللاعبين المهرة الذين كان لهم دور في الحركة الرياضة في السودان ,,, وحسن جعفر خير دليل علي ذلك .
وفقكم الله لما فية الخير كله للامتداد الحبيب

والله يا بدر الدين دي المعلومة الوصلتني انه اتأخروا في الرد
بس الشي الكويس انه المبادرة حلوة
ونتمنى انها تتكرر
وحقيقي جهد مقدر من شباب مربع 3

مراسلنا الجسور الفاتح فريجون:

سلامات يادكتور....يوم الأمس كما هو متوقع تأهل فريقي النجوم والمعلمين للمباراه النهائيه بعد فوز النجوم علي سلام 11 ب 6/3 ... والمعلمين علي اللواء بضربات الترجيح بهد إنتهاء الزمن الرسمي بالتعادل هدفين لكل بعد ملحمه قويه...النهائي يادكتور غالبا يكون السبت القادم وعلي حسب كلام بابكر حيكون نهائي عالمي من حيث التحضير والإهتمام.
سلامي للجميع

مراسلة اخونا الهميم الفاتح فريجون:
دكتور طارق سلام كميات...اولا حمدالله علي سلامه البوست الراح وجمع...وبرضو شكرا علي تذكير اخونا بكري بالحسابات الموقفه..ربك يهون.
بخصوص الدوره يادكتور النهائي لسه ما إتلعب لأنو في ترتيبات شغالين في ناس بابكر لإنجاح مهرجان الختام..
عندهم كم مرشح كده داعينهم للحضور وبجهذو برضو لي حشد راسو عدييل يوم الختام...شغل إنتخابات وكده ياعمك..لكن المؤكد إنو يكون الجمعه الجايه دي حسب آخر كلام للجنه المنظمه..واوعدك إنشاءالله ارسل ليك منو كميه من الصور.
وقول لي أخونا عمار عبدالله بعد التحايا الطيبه الردستار للأسف ماعاد ردستار ذمان حالو حال معظم فرق الرابطه الآن ..
ماعارف حواء الإمتداد عدمت المواهب ولا المشكله في الناس القايمين علي امر الكوره في الإمتداد..
اما بخصوص مشاركه لردستار في الدوره دي فهم ماشاركو رغم إنو اللجنه المنظمه حسب علمي رسلت ليهم خطاب دعوه...
لكن مايفوتك ياعمار الأستاذ حافظ خليل ممثل الردستار خير تمثيل هو طبعا لاعب في تيم المعلمين..وحاتك مارضم مرض شديد..
رغم إنو بدخلوهو في المباراة دقيقتين ويطلعوهو إلا إنها كافيه جدا عشان يجوط فيها لعب التيم كلو يقوم المدرب يتطر يسحبو مصحوب بلعنات وتريقه الجمهور.
يادكتور ناس الإمتداد هنا مبسوطين من فكره منبركم ده وبتمنو إنو الناس دوام تكون متواصله لأنو بالجد الإمتداد متفرد...رضو ناس اركويت ولا ابو.
سلامي للجميع.

مبروك لى شباب 3 بتنظيم الجميل والف مبروك لحامل الكاس الردستار وهدافه الاستاذ حافط وحارس مرمى الردستار اللبس اخضر واسود فى الصوره اعلاه !!!
ومشكور يا دكتور على النقل الحى ومشكور الاخ الفاتح فريجون وتقول لى الردستار تعبان برضوه !! يعنى تعبان وبشيل ليكم الكاس

ألف مبروك ختام دورة الوفاء ...
وشباب 2 & 3 دائما سباقين للروائع ...
ربنا يرحم جميع موتانا ...
التحية للجنة المنظمة ...
الفاتح فريجون ...
شكرا للتغطية العظيمة وكما عهدناك دوما شعلة نشاط ...
بس معقولة صاحبى جمال حيدر بعيد من الدورة دى كنا نمنى النفس بشوفتوا ...
اشتقنا لنادى مربع 2 انشاء الله تكونا مواصلين ووستيك اتطور
الاجازة قربت يامان

ونواصل

الحكام
الخير الماحي حارس الاتحاد والامتداد سابقا وكان مشهور بصد ضربات الجزاء من زمن الدرقات

نصر الدين ميًنق جناح ربيع 3 المرعب كان مشهور بالسرعة

نسأل الله لهم الرحمة والمغفرة ولحميع موتى المسلمين وأن يغفر لنا ويرحمنا اذا صرنا الى ماصارو اليه الهم امييييييييين