برلوم المنتدي من الصحافة يا ناس الامتداد لكنو ( امتدادي بالتجكيس)

شى غريب كلما حاولت ان احكى عن ذلك الخميس العجيب فى سنوات مضت صادف خميس هذه الايام الذى فقد كثيرا من بريقه واضحى مثله مثل كل الايام باهت كئيب موحش والناس بتنوم فيه من الساعه 10 عكس تلك السنوات التى مضت والتى كانت خميساتها مولعه ومشتعله وكلها مشاعر وتواصل وزقاقات عامره وملفات كل الناس فيها اتنين اتنين وجانى حنين الكون اتكوم وكده وهذه هى المشاعر التى كان يحسها صديقى قبل ان يعود من مشوار الجامعه الاهلية يجر خلفه الحسرة والالم وفى ذلك اليوم سهرنا للصباح وانا استمع لتلك المشاعر التى تبددت فجاة واضحت سراب يعنى يااخوانا بالواضح كده وزى مابقول محمد وردى صاحبى وصاحبكم قبض الريح من ذلك المشوار وجلس بجوارى وهو مصاب بحالة من الزهول وحذائه الذى كان يحرص على تلميعه كل راس دقيقه بقى مدفون بالتراب حتى اننى لم اعد اتبين لونه الحقيقى كان من الواضح انه قد جاء مشيا على الاقدام من مكان بعيد ام ذلك القميص الانيق الذى كان يرتديه والذى حرص على انتقائه بعنايه فايقه اصبح كالمعراكه وللذين لايعرفون المعراكه قطعه صغيره يمسح بها الصاج ايام زمان لمن كانت فى عواسه وكسرة وقراصه والحاجات ديك وكان الجكس رقيق مع خشونه غير مرئيه تظهر فى ساعات العواسه والطبيخ والمسح ...........

المهم صحبى قعد معاى فى اللساتك حيث يمتد السمر ممزوج بالسهر وبالمناسبه ياقاسم سهر الحب ده كعب خلاص خصوصا ساعات الخصام والفراق والشواكيش اخير منو وجع الضرس على الاقل ممكن تلقى ليك قرنفل ولا سفه ولا اى مصيبه تهدى ليك الالم شويه وتخدر ليك الضرس لحدى الصباح تقوم تمشى الدكتور وتتخارج منو لكن بتاع الحب ده صعب وماعندو اى مسكنات ولو حاولت بالليل داك تتشالق وتفتح راديو ولا قناة عشان تنسى ممكن تذيد الطين بله خصوصا لو صادفتك غنيه كده لى عثمان حسين ولا للكاشف يعنى ممكن بالليل داك تجعر وتصحى الناس معاك وتدخل فيهم خلعه يعنى عليك الله اتخيل معاى بالليل داك وانت متالم شديد اتخيل كده جاتك اغنية بعد ايه بتاعت وردى طاشه وخصوصا لمن يقول (انا حلفتك بشعرى فى زمانك...ياما غنيتك وكان كلو علشانك...كان جزاى منك صدودك وهوانك ..انا استاهل وضعتك فى مكان مامكانك روح القدر بنفسو مابقسوعليك) لاحوله ولاقوة الا بالله والله كلام زى ده مع اللحن مع الليل الهادى مع العذبات ممكن الزول بكل بساطه ينتقل الى مسواه الاخير والله ده وجع الوجع....................
المهم جلسنا فى اللساتك وبدأ الحكاية من البداية من اول مادخل الجامعه وكانت منتظراه تحت تلك الشجرة التى طالما جمعتهم سويا وكنت غاية الشقف فى معرفة التفاصيل بعد ان علمت بالنهاية الحزينة

صحبى ولع سيجارة البرنجى التى كنت استغربها وشرد بنظراته فى الفراغات ومن ثم بدأ الحكاية وقال (خشيت الجامعه ولقيت الحاجه منتظرانى فى نفس المكان بتاع كلو مرة والجو كان رهيب انا دخلت زى الساعه خمسه واول ماشافتنى كانت فرحانه ومبسوطه زى كلو مره وقعدت وسألتنى من حاجات كتيره كده........) مع هبوط الظلام كنت احاول ان اتبين ملامحه وهو يسرد لى الحكاية بالواضح كده كنت تواق للنهاية لان التفاصيل كترت وشعرت بالملل خصوصا وانه كان يصمت لوقت طويل قبل ان يواصل من جديد وكنت من خلال الضوء الخافت المنبعث من السيجارة استطيع ان اتبين ملامحه وكان من الواضح ان عيناه بدأت تدمع وهو يحاول ان يشيح بوجهه بعيدا عنى لكننى لم اكن بحاجه لرؤية عيناه كى ادرك مدى تأثره فصوته المبحوح والمهزوز كان يدل على ان هناك عبرات تحول بينه وبين الحديث تلك العبرات التى من شأنها ان تجعلك غير قادر على التنفس حقيقة حالتو صعبة على شديد وكنت انتظر نهاية القصة حتى ابدأ بدورى مسلسل المواساه الذى تحول فيما بعد الى مسلسل تركى من مليون حلقه

اخيرا جاءت اللحظات الحاسمه وقال لى(اها ياصحبى قمت قلت ليها عايز اقول ليك كلام من زمان وانا متردد لكن الليله قررت اقول ) شعرت بضربات قلبى تتسارع عندما احسست انها اللحظه المفصليه لكننى لم اقاطعه وتركته يواصل بعد ان استرد انفاسه(قامت ضحكت وقالت لى ياسيدى انا عايزه اسمع كلامك قول بسرعه انشاالله خير ،قمت استجمعت كل قوتى من ماولدونى لحدى هسه وقلت ليها بصوت براحه وانا مدنقر وقلبى بيدق فى الثانيه سبعه الف دقه وبعد مقدمات طويله عن علاقتنا قلت ليها انا بحبك) يااخوانا صحبى بعد ماوصل النقطه دى صمت خمسه دقايق وانا بقيت اتململ فى انتظار ردها على الموضوع فكل هذه التفاصيل كنت تقريبا على درايه بها لكن اهم شى هى قالت شنو ولم اجد سبيل لجعله يواصل غير اننى قلت له فى ضجر واضح مالك سكته ياخى الحصل شنو تانى؟؟ نظر لى بطريقه حاده وكأنه يحاول ان يتبين ملامحى فى الظلام وقال لى بنبرة اكثر حده (كلو منك انت ياخى ضيعتنى) ابتسمت رغم حساسية الموقف وقلت ليه انا عملت ليك شنو يازول مالك
لم يرد على سؤالى بل اعتدل قليلا فى جلسته ثم واصل السرد بنفس تلك النبره الحزينه وقال(لمن قلت ليها بحبك زى الصبت فيها مطره وكل الضحك داك اختفى وبقت بس مدنقره فى الارض وانا اتهجمت من طريقة استقبالا لكلامى وبقيت ماعارف اعمل شنو والله العظيم نص ساعه كامله بس مدنقره بدون ماتتكلم) كل هذا الحديث من صحبى ولحدى هسه ماوصل للخلاصه قلت ليه اها هى قالت شنو يعنى ....
وصمت مره اخرى
القاسم راجعين تانى بالقديم الاتنسى مالو زاد الشوق علينا....مودتى

[مدثر قرجاج"]المهم صحبى قعد معاى فى اللساتك حيث يمتد السمر ممزوج بالسهر وبالمناسبه ياقاسم سهر الحب ده كعب خلاص خصوصا ساعات الخصام والفراق والشواكيش اخير منو وجع الضرس على الاقل ممكن تلقى ليك قرنفل ولا سفه ولا اى مصيبه تهدى ليك الالم شويه وتخدر ليك الضرس لحدى الصباح تقوم تمشى الدكتور وتتخارج منو لكن بتاع الحب ده صعب وماعندو اى مسكنات ولو حاولت بالليل داك تتشالق وتفتح راديو ولا قناة عشان تنسى ممكن تذيد الطين بله خصوصا لو صادفتك غنيه كده لى عثمان حسين ولا للكاشف يعنى ممكن بالليل داك تجعر وتصحى الناس معاك وتدخل فيهم خلعه يعنى عليك الله اتخيل معاى بالليل داك وانت متالم شديد اتخيل كده جاتك اغنية بعد ايه بتاعت وردى طاشه وخصوصا لمن يقول (انا حلفتك بشعرى فى زمانك...ياما غنيتك وكان كلو علشانك...كان جزاى منك صدودك وهوانك ..انا استاهل وضعتك فى مكان مامكانك روح القدر بنفسو مابقسوعليك) لاحوله ولاقوة الا بالله والله كلام زى ده مع اللحن مع الليل الهادى مع العذبات ممكن الزول بكل بساطه ينتقل الى مسواه الاخير والله ده وجع الوجع....................

القاسم...تحياتي
ودحلتنا الأحلى من المنقة مدثر قرجاج رسل لي رسالة عابرة للقارات إنو إتداخل معاكم في البوست الخطير دة..وأنا ما خفيف ولفيف في مواضيع الحنان دي..شين آآآآي لكن أخلاقي 100%....والبوست بتاعك دة عامل زي الميس كل ما نجي نخشو نلقى الجماعة بيتصارعوا للدخول ؟..دة سبب... والسبب التاني مغيوظ منك..عدييييييل!.. ياخي حرقت لي بصلة حلٌتي في طبخة ميمونة وكشفت لي حال معاوية الكنت داير ألعبٌو في برشلونة...على العموم مسامحك.... في شاعر (ودلزينا) قال:ـ
أودع بعد عرسك زكرياتي...وأمضي راحلا في عمق زاتي...
كأني ما عرفتك زات يومٍ....وما مارست حبك كالصلاة........
كأنك لم تعيشي في فؤادي... ولم يحكم هواك على حياتي.......
سراباً كان ماضينا ووهماً....وما كان التوهم من صفاتي........
ولكني أردت خداع نفسي.....بتفجير المياه من الصفاة............
وجعل الحنظل البري شهداً؟...وإلباس الذئاب لباس شاة..........
وداعاً لن أقول إلى لقاء....لأنك في عداد الميتات!!................
وفي واحد (ودلزينا) أكتر منٌو قال:ـ
في الليلة ديك..لا هان علي أرضى وأسامحك
ولا هان علي..أعتب عليك
شلت الجراح والإبتسامة وكل حرمان اليتامى؟..
جيت أهنيك وأصافحك جيت أقول مبروك عليك!؟
الكلام واضح وما داير تفسير...الناس ديل مشوكشين؟!..بعد المشاوير المشوها في الزُقاقات والحدائق ديك كلها؟!!..وكضابين ..لأنو الأول نظام ضبح حبيبتو وعمل نايم وكدة؟!.. والتاني بعد جقلبتو وبُكاه من ودٌو قولة الخير للجماعة ، قشقش دموعو وإتقبٌل الموضوع بي روح رياضية وإنتهى الموضوع بالأريحية الزكرها دي؟!الناس ديل لليلة حنانهم لو جا قاطع من بعيد ساي يودي أولادو المدرسة بيرقدوا رُز؟.. وعشان الشاكوش الكرهٌنا لعب البلي دة .. حا أخش ليك يا قاسم من الحتة دي.. جنس شنكبة وعنكبة أسكت ساي؟..
مشوار محبة صغير كدة وعائدون..أجيب لي خشب الله عبدالناشف للدفاية من البردايس دة وأجيك.. أهم شي الدفو والعفو....أعمل قريبك...

محمد عبد الصادق من زمن طوووووويل الليله قبضك وانت بتتصفح المنتدى
مالك حاربتنا سمعتو ولا جابو ليك.................انشالله طيب

القاسم و د الصحافة ده مشى وييييييييييييييييييييييييين

العزيز / مدثر قرجاج
سلامات
تعرف انا متابع مسلسلكم ده لحدى ما وقف في اكتوبر 2009
اها واصلوا الحلقات ونحنا متابعين،،،

لكن لقيتك أصلك ما بتنسى قلت لي شوفت إسم اخونا محمد عبدالصادق ده بيتصفح إتذكرت القاسم ود الصحافة
طوالى إتذكرت الموضوع فرفرت فرفرت جبتوا طوالى

نحنا غايتو الزمن ده حضرناهو وشوفنا الناس الجاكين ديل
بس نحنا ما عملنا الحركات دى يعنى نحنا ناس أمسك لي واقطع ليك (عرس الزين طوالى)
لكم التحية،،،،،،،،،،،،،
محمد عباس عبدالوهاب

محمد عباس
انشاالله طيب
انبارح قريت ليك اسم الزول شكلو جاى بدس كده ومشتت لكن انا قبضتو وطوالى
اتذكرت البوست ده بتاع ود الصحافة..........................
بجيك راجع تانى
محبتى

ياشيخ مدثر تحايانا ياراقى

أرجع تعـال عـود تـانى -تم تم ترم(أغنية تاور)

منتظرين بس ماتكبر اللفة ههههههههههههههه

مودتى،،،،،،
محمد عباس عبدالوهاب

[quote="مدثر قرجاج"]محمد عبد الصادق من زمن طوووووويل الليله قبضك وانت بتتصفح المنتدى
مالك حاربتنا سمعتو ولا جابو ليك.................انشالله طيب

القاسم و د الصحافة ده مشى وييييييييييييييييييييييييين[
/quote]


[b

]هلا بناس الاداره كلها لا سمعت ولا جابو لي كان سمعت اكيد كل خير و اذا جابو لي جابو حلو بس اهو اندراشه هنا و سرحان هناك و دبرسه بي جاي الا قاعدين نجي بنلقي الدنيا ظلام و النور قاطع
تحياتي حبيبنا [/b]