العريس الداقس (اوعكم تدقسوا)

كالعادة وخلافا لكل دول العالم التى تتم فيها مراسم الزواج فى يوم او اثنين وبأقل التكاليف الممكنة نجد ان الزواج السودانى هو عبارة عن مسلسل مكسيكى يستمر لايام وايام يجتمع فيها الاهل والاحباب والجيران وجيران الجيران والاقارب من الدرجة الخمسمائة بعد الالف وينفق فيه اموال طائلة تكفى لبناء مستشفى حديث او فندق 5نجوم او رواتب المعلمين فى احدى المحافظات تبدأ الحكاية بعد ان تحس بالقلق عندما تجد ان معظم اصدقائك قد دخلوا القفص الذهبى طائعين مختارين_لدى قناعة راسخة بمسألة القفص ولكن لدى تحفظات كثيرة على حكاية ذهبى دى_المهم تحس وتأخذك غضبة حمقاء وتناجى نفسك وانت فى حفلة زواج احد الاصدقاء (والله الواحد بعد دا يشوف ليه مرا. معقول هناى الاهبل دا يعرس وانا لسه قاعد براى زى تور الساقية)


عندها يستعرض خيالك قائمة طويلة من معارفك البنات ابتداء من ناس نونة زميلتك فى الروضة مرورا بصديقات مرحلة المراهقة الكتار وحتى زميلات الجامعة والشغل وبنات الحلة وبنات الاعمام والاخوال وباقى الاهل ثم وبسرعة تنسى كل اولئك النساء فى حياتك عندما تستدعى انتباهك الحسناء الجالسة فى ركن قصى فى حفل ذات الصديق الاهبل,تحبها من اول نظرة وتراقب حركاتها وسكناتها, تلاحظك هى لكن تعمل ماشايفة وتتلاهى بمكالمة وهمية فى موبايلها وهى ترمقك من طرف خفى كما يفعل الصياد المحترف المهم تتعارفوا بواحدة من الطرق الكثيرة وجلسة جلستين فى الكافتريا ثم (ياهناى والله انا ماممكن اطلع وانزل معاك كدا ساى, الناس تقول علينا شنو؟ سمعتى حتبوظ) ثم تمسح دمعة وهمية من عينيها فتأخذك الحماسة وتقول (والله ياسوسو_ودا اسم دا لدلع _انا ناوى اصل بيتكم بس انتى عارفة الظروف والعرس بيكلف كتير وووووو) فتقاطعك سوسو بحنية ثعلبية وبنعومة الافاعى (انا مادايرة منك شى, انت بس تعال اخطب والعرس يتأجل لحد ماالظروف تتحسن)


فتصدق الكلام من عوارتك وتحدد يوم الخطبة وتأخذ ثلة من اهلك وقليل من جيرانك واصدقائك وتقصد بيت الملاك المختار وتفاجأ انت واهلك بحشد كبير فى بيت العروس وخيمة كبيره امام البيت وصوت المايكرفون يردد (تست تست واحد اتنين تلاتة تست تست) تأخذك الدهشة قبل ان يأخذك ابو العروس جانبا, يعدل عمته التوتل ثم يقول (والله ياولدى انحنا خطوبة ومسخرة ودخلة ومرقة ماعندنا,عشان كدا قررنا نعقد ليكم طوالى والعرس بالراحة) ثم بأبتسامة محذرة (ولا رايك شنو؟) وقبل ان تدلى برأيك غير المعترف به اصلا يكون وكيلك ووكيلها قد اتموا عقد القران فى الخيمة وتحولت انت بقدرة قادر من مشروع خطيب الى زوج-مع وقف التنفيذ-بسرعة البرق ثم يغمرك المعازيم (مبروك ياعريس مبروك ياعريس بيت مال وعيال) وانت كاضم ماقادر ترد وتسمع احدى عمات العروس وهى تقول (شوفوا ياخوانى من الفرحة لمن ماقادر يتكلم) ثم تطلق زغرودة مدوية وهى تبتعد تجتاحك معها رغبة فى لكمها فى فمها لتخرس الى الابد .. فرغم انها صارت شرعا حرمك المصون الا انه يجب عليك ان تقوم بطقوس مهولة ومراسم عرس كامل لأستلامها!!!


وعندما تثور على الوضع وتحلف بالطلاق ان تمشى تجرها من شعرها وتجيبا بيتك بدون حفلات او كلام فارغ وتخلص .. تفاجأ بأن المعارضة تأتيك من الداخل أى امك واخواتك (ليه مادايرنا نفرح بيك؟ انحنا اقل من الناس البسوو الاعراس؟ والله لو ماعملت عرس ماعافيين منك؟ عليك الله عاين دا, داير الجارات ياكلن وشنا؟) فترضخ للأمر الواقع وتبيع قطعة ارض ورثتها عن جدك الرابع عشر وترهن بيت ابوك وتبيع الكمبيوتر والموبايل وتزوغ ببعض الصناديق ثم تستلف من 10-15صديق واخيرا جدا تجد نفسك حالق جديد ولابس بدلة سوداء لون الحداد!!!- متأبط شرا هي عروسك المصونة والتى جاءتك فى هيئة فيل صغير بعد ان نجحت وصفات التسمين التى قامت بها العمات والخالات وبعض الصديقات الخبيرات, تأتيك متدحرجة فى فستان ابيض-لون الفرح!!!


فتجلسا تحت بقعة ضوء مزخرفة عليها كرسيان تعرف بالكوشة- والتى لاول مرة تدرك معناها- الجميع فى الحفل فى رقص هستيرى والفنان يصدح بسعادة غير مبررة (شن بتقولوا فى الفرح البعذب سيده والريد البضيع زولوا!!) فتلمس الاغنية فيك اوتارا حساسة وتكاد تطفر الدموع من عيونك, وتجول عيناك على الحضور السعيد وتتوقف عيونك على آخر العزاب من اصدقاءك وهو يرنو اليك بحسد تارة وتجول عيناه بين الحسناوات تاره اخرى وتكاد تقرأ افكاره وهو يفكر (هسى فلان الاهبل دا عرس وانا قاعد براى زى تور الساقية؟) فتكاد تصرخ فيه محذرا ولكن صوتا خبيثا فى داخلك يهمس بمكر وحقد (وانا مالى, هو أنا فى زول حذرنى؟)؟"عشان كدا لمن تمشي مناسبة حتلقى الجكس بعاين ليك وبيبتسم ليك أعمل حسابك لأنو بضحك عليك ودنقر راسك طوالي وأعمل فيها أهبل ولو حاولت تتكلم معاك وتشاغلك أبكي عشان تقول عندو نفسيات ولو أصرت وعملت فيها مصلح ودكتورة أصرخ وأقطع فيه كف وقوم جاري أخير ليك يقولوا مجنون من يحننوك بالجد" نصيحة من داقس (انتو ما سمعتو بالمثل الساير اليومين ديل البمد صباعو بيجرو من ضراعو والبعاين بعينينو بيجرو من اضنينو)نصيحه من داقس

يا قرجاج يا خي حرام عليك
هههههههههههههههههههههههههاي
قلته لي
البمد صباعو بجرو من ضراعو
وبعاين بعينو بجرو من اضنينو ...

راجع

UP..UP
راجع......

ازيكم وصباحكم عافية
ده شنو البتقولوا فيه ده ياخوانا اعقلوا جابت ليها هبالة وعباطة انشاء الله خير.
اضنين وعينين وكرعين
انتوا من الاول اكان مامقتنعين البوديكم شنو
بعدين تعالوا احنا هينين ليكم ولا هينين الواحد فيكم مرات يجري سنين لمن يحفي بلاهي خلوني من حركاتكم وقصصكم دي هو الواحد جابو الدرب؟ ماجا قاصد قال تعارف قال.
بعدين تعال هو بيت سوسو ده لمن وصلته كنت دايخ ولا نايم ولا رايح عليك الدرب

صباحكم زين يا زينين
موضوع وفكرة جميلة و سخريه خفيفة ظل ياقرجاج يأخ يديك العافية


اخوتنا الجندرية (هادية) اعصابك ، اعصابك
وانا مصداقا لي كلامك اهدى اغنية صلاح مصطفى
اساسق بالدريب 00الجاي بى حداك
اقول إمكن 00يصادف 00مره القاك
اسالمك وينشرح قلبي الاصلوا حباك

(ولا ده كان زمان؟)


مودتى للجميع،،،،،،،،،،،،،،،
محمدعباس عبدالوهاب

سمح

مدثر يا مبدع..أمبارح مريت على البوست بتاعك دة على السريع وحاولت إتصل على أخونا العريس جنابو بريقع وأهنيو على وداع العزوبية بس محاولاتي باءت بالفشل والظاهر العريس غرقان في العسل تحياتي له من خلالك... مملكة العزابة بدأت تتلحس يا الجار والقفص الزهبي بقى (وحدة جاذبة) والجماعة أكيد ما حا يخلوا للعزابة قشة مخارجة واحدة مادام البورة حاصلة....موضوع جميل جدد كثيراً في روح البوست...واصل..

بعد ده ماتلومني تب يابوسارة قدر ماقول اسكت تنضموني اها هسي البورة دي شنو قصتها كمان

ياشباب مافي محاولة اضافة اي عنصر ناعم للمساعدة والدعم (فترته خلااااااص)

لا لا لا

ماتقولى فترتى ، خلي عزمك من حديد

انا ما واقف معاك هسع وعايزه تستنجدى بالجندريات؟

المعروف عن النساء صبورات خلي بالك طويل سلبه

مودتى للجميع،،،،،،،،،،،،،،،،،
محمد عباس عبدالوهاب

قولتو كدي ياخوان ، ماعندي غير اقول سمح وحاضر
(طولت البال ياالله)

Hadia Keroudi كتب:بعد ده ماتلومني تب يابوسارة قدر ماقول اسكت تنضموني اها هسي البورة دي شنو قصتها كمان

الأخت المحترمة هادية...مرحباً بك وأنت تؤكدين حضورك الراقي والأنيق في نقاش هادف ومسئول رغم الغياب الكلي تقريباً للأخوات بالمنبر ورغم إجتهاد ومثابرة الأخت سماح نور التي وفقت في سد النقص الواضح لجانب المرأة بالمنبر بس اليد الواحدة قالوا ما بتصفق...نتمنى أن تكون مشاركاتك دافعاً لأخريات...
بالنسبة للبورة فهي حاصلة يا أختنا...والموضوع أكيد مؤسف ومحتاج دراسة طويلة لظاهرة إحجام الشباب عن الزواج المبكر..أكيد في زواج لكن غالباً ما يتأخر وهو دة البخلي البنات فعلاً وبدافع الهروب من البورة دي للتنازل عن حاجات كتيرة جداً أولها الشريك المناسب الموضوع طويل وبستاهل يتناقش فعلاً..
إحترامي ...

عبدالله عوض عبدالله كع كتب:يا قرجاج يا خي حرام عليك
هههههههههههههههههههههههههاي
قلته لي
البمد صباعو بجرو من ضراعو
وبعاين بعينو بجرو من اضنينو ...

راجع

عبد الله منتظرك ... جر الاضنين ده صعب خلاص
ههههههههههههههههههههههههههههههههههههههه

[quote="فريني"][color=green][font=Georgia]قرجاج العجيب كل التحايا و الود
قلت شنو ؟
لبمد صباعو بجرو من ضراعو
وبعاين بعينو بجرو من اضنينو
هو ذاتو يستأهل البودي هناك شنو
والله الزمن دا البت و أهلها ما بصدقو أنو في واحد أهبل بجي يدق الباب وفي واحدين ما بنتظروك تدق الباب ذاتو
الله يستر الحال[/


فرينى كيفنك
ياخى بس تمد راسك كده تلقاهم عقدوا لمن تحتار زاتو
لكن البدقس منو
محبتى

Hadia Keroudi كتب:ازيكم وصباحكم عافية
ده شنو البتقولوا فيه ده ياخوانا اعقلوا جابت ليها هبالة وعباطة انشاء الله خير.
اضنين وعينين وكرعين
انتوا من الاول اكان مامقتنعين البوديكم شنو
بعدين تعالوا احنا هينين ليكم ولا هينين الواحد فيكم مرات يجري سنين لمن يحفي بلاهي خلوني من حركاتكم وقصصكم دي هو الواحد جابو الدرب؟ ماجا قاصد قال تعارف قال.
بعدين تعال هو بيت سوسو ده لمن وصلته كنت دايخ ولا نايم ولا رايح عليك الدرب

هادية سلام
انتى عارفه الجرى لمن الزول يحفى ده ماهى الدقسه زاتو
الزول قبلى الفاس تقع فى الراس بيكون بيجرى ساكت وهايم وماعارف الجايهو
لمن ماشى بيت ناس سوسو ماواعى قايل الحكاية بتكون خطوبه سكيتى كده ممكن
الزول يفلت منها لكن تمشى يعقدوا ليك ويختوك فى الحديد........غايتو ساعة
القدر يعمى البصر ولاحوله ولاقوة الا بالله

[quote="abo sara"][color=darkblue]صباحكم زين يا زينين
موضوع وفكرة جميلة و سخريه خفيفة ظل ياقرجاج يأخ يديك العافية


اخوتنا الجندرية (هادية) اعصابك ، اعصابك
وانا مصداقا لي كلامك اهدى اغنية صلاح مصطفى
اساسق بالدريب 00الجاي بى حداك
اقول إمكن 00يصادف 00مره القاك
اسالمك وينشرح قلبي الاصلوا حباك


ابو ساره حبابك
شكرا على كلماتك .. هادية غايتو ماقصرت خايضه المعركه براها
لكن نحن برضو مصرين على انو العريس دقس

Badreldin Farou كتب:مدثر يا مبدع..أمبارح مريت على البوست بتاعك دة على السريع وحاولت إتصل على أخونا العريس جنابو بريقع وأهنيو على وداع العزوبية بس محاولاتي باءت بالفشل والظاهر العريس غرقان في العسل تحياتي له من خلالك... مملكة العزابة بدأت تتلحس يا الجار والقفص الزهبي بقى (وحدة جاذبة) والجماعة أكيد ما حا يخلوا للعزابة قشة مخارجة واحدة مادام البورة حاصلة....موضوع جميل جدد كثيراً في روح البوست...واصل..

يا بدر الدين انشاالله كويس
والله العرس كان حاجه جميلة وعشنا ليلة ولا كل الليالى كا ن فاقدك
بس واخونا بريقع خشه القفص باختيارو على امل ان يتكبل باساور
الحنان والحب والاستقرار ونتمنى له حياة وجية سعيده غايتو هو لحدى
هسه قال انا مادقسته لكن نشوف بعد شهر شهرين بحصل شنو؟؟؟؟
التلفون بتاعو فاتح حاول تانى ...
محبتى

يابدرالدين ازيك وانشاء الله طيب فعلاً زي ماقلته لكن السوال العايزه اسالك ليه بقدر ماالناس احجمت عن الزواج بي نفس القدر زادت حالات الطلاق والموضوع ده طويل وداير صحي يتناقش في شنو الحاصل عيب فينا ولا فيكم ولا في الظروف ولا الزمن اتغير

شوف يامدثر وفريني وكلكم والله ان كان دقستو وان كان اتلحستو مابتقدروا بلانا ونحن حلوين ونحن سمحين ومرة مرة مرين لي البدور المر شفته كيف

ياابو سارة ازيك انشاء الله تمام وعافية
لقيناك كده
لكن برضو مابتقدروا بلانا اها كيف

تحياتى ياست هادية يا أم( )
والله أنا كويس والحمد ليك يارب أبسط حاجة على النفس الـ طالع ونازل ده

أنا طبعا من أنصار المرأه وهى حمالة الأسيه وهى الست المدبرة والدينمو للبيت وعموده الفقري

وهى النصف الحلو و ، و، و ،،،،،،،،،،،،،،،ولاشنو؟

وتحياتى للجميع،،،،،،،،،
محمد عباس عبدالوهاب