أسبوع تحت المجهر

و أرشح أن نبدأ بكبار السن
الحمدالله ياما انت كريم يارب يعني انا رقم 219

بعد ده اكان لقيت زول بديت بيه قابلني

اكان كده بدينا بيك يافردة
تعرف موضوع جميل وشوية بحرك الناس

Hadia Keroudi كتب:اكان كده بدينا بيك يافردة
تعرف موضوع جميل وشوية بحرك الناس

وانا كمان برشحك يافريني عاوزين ليك كم صوت من الاعضاء ونبداء بيك

وانا بقول نبدا من السبت ان شاء الله يكون الاعضاء اخدو فرصه يفمرو في الاسئله

وانت تكون جاهز للرد

ولاشنو؟

تمام نبداء بالاستاذه هاديه
مش بقولو ليدز فرست ؟؟


موضوع لذيذ

حقيقي كنت عايزه انسحب من الموقف ده لكن ماعندكم مشكلة بس حااقول ليكم حاجة اخر وصايا الحبيب المصطفي صلي الله عليه وسلم (رفقاً باالقوارير)
هادية الأسم:هاديه محجوب محمد طه

العمر:يعني في داعي

مكان الميلاد: دي معروفة الأمتداد

رحلة الأصدقاء والفرد:اقول ليكم اخر مرحلة صديقات الجامعة صفية والهام وثريا وهنو وخنساءونهلة + صديقات من الامتداد شويه فرد

المراحل الدراسية:الابتدائي الامتداد 4 بنات
المتوسطة الزهور
الثانوي الخرطوم القديمة بنات
الجامعة الاحفاد كلية العلوم الادارية
للاسف ماجستير MBA جامعة الخرطوم وماكملته لظروف الشغل والاولاد


سنة الزواج:18/8/1994

الأبناء:قولوا ماشاء الله
احمد 15 سنة (نازل ثالثة ثانوي السنة دي)
خالد 12 سنة ( نازل ثامن)
محمد 3سنوات ونصف

زكريات مفتوحة: كتيرة ياخواني مالكم علي دفاتر مابتمسكها

الهواية:القراية والاطلاع والمشي (ودي هواية جديدة شوية بتفرق علي الواحد)

متي إنضمامك للمنتدي :18/2/2010

كنت عاوز انزل اعتذار الاخت هادية لكنها سبقتني بضربة البداية نتمنى لها وقتا ممتعا كما نرجو منها سعت الصدر ...

فريني بعد ماجبرته بي خاطركم انت احوص ولاشنو
الحمدالله والدليل

اللون الرياضي ؟
عمل المراة يخذ جل وقتها في هذا الزمن من أين لكي التوفيق بين العمل و البيت ( بيت العزاباء دا يا كافي البلاء بنت ساي تغسل و تقش الحوش ما في ) و الاولاد ؟
نقول مشاء الله ربنا يحفظهم ليك و يرزقك البنت

اللللللللللللللللللللللهم أميييييييييييييييييييييييييييييييييين . البنية

كنت هلالابية (يامريخاب ماتزعلوا) بس هسي ماعندي زمن حتي عشان اشجع اللعبة الحلوة بس لسه بحاول اهتم بي الفايز منو في الاخر لانه ماعندي اعصاب ولا وقت للمتابعة
اما بخصوص تنظيم الوقت حقيقي مشكلة لانها بتجي علي حساب الواحد لكن عموماً الحمدالله منظمة وقتي
اولاً وده طبعاً المهم بطبخ بي الاسبوع النظافة عندي بنات بساعدوني نسبة لبيت العزابة
اما باقي زمني عادي بقوم الصباح مع الاولاد للمدرسة بعد داك بمشي الشغل بجي راجعة بعديهم يعني مابين 4 لي 5 بعد الغداء بنبداء موضوع المذاكرة بنخلص الساعة 8 (طبعاً في الزمن ده صوتي بكون راح من ياولد اقعد ياولد ذاكر)
بعد داك في المجاملات الاسرية والاصحاب وخلافه
طبعاً اليوم في السودان كله جري

البنية انشاء الله لكن بعد العزابة ديل حاتكون بي اخلاق جلابة

يافريني التوفيق صعب لانه احنا كلنا مقتنعين بي انه الدور الاساسي للام هو البيت ومع الظروف الحاصلة دي لازم كل الناس تشارك في صرف البيت عشان تدرس كويس وتسكن وتاكل وتتعالج وتلبس صاح لازم تتساعد لكن المسولئية بتاعت البيت من الداخل وتنظيمه بتختلف غايتو الله يوفق

ربنا يحفظ ليك اولادك
وانشالله غرة عين ابوهم وامهم
.
.
.

يلا يا فريني - عشان انت سيد البوست



ـــــــــــــــــــــــــــــــــ
ممكن نسال الزبائن يا سيد البوست ؟؟؟

تفضل يا كع البيت بيتك دا كلام

نعم الاله علي العباد كثيرةً واجلهن نجابة الابناء
شكراً ليك ياكع

اولا ليك التحيه والشكر اختنا هادية لقبولك الجلوس على كرسي اخونا فريني

وان تتصدي للاسئله \والحية ايضا لصاحب الفكرة او البوست اخونا فريني

والتحية للاخوان المشاركين في البوست\

نخش في الاسئله\

1\ بما انك امراة عامله هل هناك تقصير في العمل او البيت؟ واذا لم يوجد كيف

توفقين بينهما ؟
2\ لو فرضنا انو تم ترشيحك لرئاسه الوزراء (ماعاوزاقول رئيس جمهوريه)

ماهي اول 3 قرارات سوف تتخذيها ؟

3\عندك 6 باقات ورد وطلب منك اهداء 3 باقات لاعضاء في المنتدى هنا؟

والثلاثه الاخري لاشخاص خارج المنتدى (بتاع مشاكل صح؟)

4\لو طلب منك اعادة الزمن للوراء وان تختاري مرحله من مراحل العمر اي

مرحله تختارين ؟

4\ماهي الامنيه التي تحققت والامنيه التي لم تتحقق؟

5\ رساله لشباب الامتداد بنات واولاد

معليش طولت عليك الاسئله

وفي انتظارك

\ بما انك امراة عامله هل هناك تقصير في العمل او البيت؟ واذا لم يوجد كيف

توفقين بينهما ؟
التقصير يا راشد علي حساب صحتي انا لانه بحاول علي قدر الامكان مااقصر لكن مااكذب عليك كتير بكون عايزة ادي بيتي واولادي زمن زيادة لو في ونسة ولو في اكلة جديدة لكن مرات بكون في زحمة بتاعت شغل وماكتير دي بتحصل لكن حقيقي بحس انه انا فيها مقصرة
2\ لو فرضنا انو تم ترشيحك لرئاسه الوزراء (ماعاوزاقول رئيس جمهوريه)

ماهي اول 3 قرارات سوف تتخذيها ؟
مااكذب عليك ده الشي الوحيد البقول اني مابقدر عليه (ياخوي دي حاجة صعبة خلاص بنية تحتية وناس وامانة في الاعناق ) يعني حتي تخيل بيغلبني اتخيلة

3\عندك 6 باقات ورد وطلب منك اهداء 3 باقات لاعضاء في المنتدى هنا؟

والثلاثه الاخري لاشخاص خارج المنتدى (بتاع مشاكل صح؟)
التلاتة الاولي لي الامتداد انا في شخصك بحترم اشخاص
والتلاتة التانية واحدة للوالد والوالدة والتانية لي احمد وخالد ومحمد اولادي الحلوين
والتالتة دي خلوها لي ياخوانا وماتسالوني منها

4\لو طلب منك اعادة الزمن للوراء وان تختاري مرحله من مراحل العمر اي
مرحله تختارين ؟
المرحلة الانا فيها دي لانه حقيقي كل مرحلة بي حلاتها وبي ناسها والمراحل الاولي بتمشي معاي بي ناسها وذكرياتها يعني الجديد بشايل القديم


4\ماهي الامنيه التي تحققت والامنيه التي لم تتحقق؟
تعرف اغلب الاماني بتكون حاجات وقتية لكن الحمدالله انا حاسة انه انا سعيدة من خلال الحاجات الانا حققتها وقنوعة بي القدرته اتحصل عليه بس بتمني سترت الحال دنيا واخرة والتوفيق وربنا يبارك لينا في ذرياتنا ومايمتحنا في عزيز

5\ رساله لشباب الامتداد بنات واولاد
ربنا حباكم بي انكم اتولدوا واتربيتوا في درة احياء الخرطوم فاتمني ان تكونوا خير سفير يمثل الدرة (خلقة واخلاق)

معليش طولت عليك الاسئله

وفي انتظارك

اسفة جداً ياراشد علي تاخير الرد وحبابك الف وشكراً ليك

انا شخصيا ماعندي اضافة ولا بحب حد يقررني ,,, بس من هذا المنبر بتمني
من جوه قلبي ان يوفق الله الاخت هادية في حياتها الان وفي المستقبل ويجعل البركة في ذريتها واهل بيتها وان يدوم علينا العمل الصالح في الدنيا والاخرة .

تشكري اخت هاديه على الاجابات وربنا يديك الصحه والعافية

ويحفظ ليك ابنائك وان شاء الله يكونو امتداداب وهلالاب زي والدتهم

ولكي كل الشكر