البورة الشديدة دي

البورة كلمة تطلق علي الفتاة التى فاتها قطار الزواج ( بايرة ) ، و في أيامنا هذه أصبحت لا تقتصر علي الفتاة وحدها بل أصبح لدينا شاب باير أيضا
هل فعلا هناك سن معينة يتم بيها تحديد البايرة أو الباير ؟
و يا ترى ما هي اسباب البورة لدا الفتاة و الشاب ( اسباب مادية ، اسباب اجتماعية ...... ) ؟
موضوع للنقاش
مع شوية شعر منقول للامانه

البايرة أول :

لي إيــدينا بنــــــــرفع *** والعازب كلو بيســــــــمع

نفوسنا كتير مشــتاقة *** للراعي دوام نتضـــــــــرع

شعارنا عريس متواضع *** ياخي ياقدر اسمع أجمع
نحن البايرات في لهفة *** والعمـــــــــر ولـــى وودع
نحن مساكين ياجماعة *** وللجنة دوام نتطــــــــــلع
لو واحد قام وأتقــــــدم *** في لحظة نلبي ونسمع
***
بلاش عربيــــة خصوصي *** مالو الكداري دا هســـع
بلاش من شبكة وشيلة *** بي أبســط حاجة بنقنع
البيت ماشــــــرط عمارة *** دي مظاهر ساكت تخدع
لي جنة نضيرة نحــــــول *** البيـــت الخرب البجمـــع
ما شـــــرط تجيب تلاجة *** كفاية الزيـــــــــــر البنقع
***
ما دايرين كبدة وشـية *** بي ويكة تقيلة بنشـــــــبع
ما أصلو شــبابنا الودع *** ما ممكن تانــــــي بيرجــــع
أحلامنا الكانت بــدري *** ما عادت تانـــــي بتنفــــــع
دايرين الشاب الأغبش *** حتى لو فقــــــران ومقطع
لانو الفيهو الفايــــــــدة *** ليهــــــــــــو دوام نتطلــــع
حياة الســــــترة أملنا *** انشاء الله ربنــــــا يجمــــع
يحن الله عليــــــــــــنا *** ونشــــــيل أيدينا ونرفـــــع

الشباب :

للرب شـــــكوانا بنرفع *** والبايـــر كله بيســـــــــــمع

في دربك يامـــا جرينا *** والعين الســــــاهرة بتدمع
كم مرة ايدينا اتمـدت *** والرد الجــــــارح اقنــــــــــع
احلامكم والله غريبــة *** وللعـــــــين بتزغلل وتذلــــع
طلباتكم لينا تحيــــــر *** جايين تتواضعوا هســــــــــع
ما جينا زمان شن قلتو *** يافقير يامقطـــــــع أرجــــع
***
ما عندك حق الســــــــفة *** لابس دمـــــــور ومرقع
دايرين العنــــــــــدو مصانع *** لو كان لي غيروا بيركع
ما جينا زمان شــــــن قلتو *** يافقير يا مقطـــع أرجع
في جيوبك ساكنة عناكب *** لو كان باعوك ما بتنفع
دايرين العنـــــــدو الفـــــلة *** لو كان حنكوش ومدلع
ما جينا زمان شـــــن قلتو *** يا فقير يا مقطـــع أرجع
***
لو ماشـــي لآخر الدنيا *** تركــب رجليك تتبرطــــــع
دايرين العنــــــــدو البنز *** لو يبقى عجـــــــوزاً أصلع
ما جينا زمان شن قلتو *** يافقير يامقطع ارجـــــــــع
يا البيتـــك مبني زبالة *** ومن غير فيضــــان يتزعزع
دايرين العنــــــدو الفيلا *** لو كان صغيـــــر بيرضــــع
ما جينا زمان شن قلتو *** يا فقير يامقطـــــع أرجــع
***
وموكيتاً فخـــماً فاخــــــــر *** ونجفاً بالـــدر مرصــــع
والكندشة فريون ضــــاربة *** وثلاجة فريــــــزر تجمع
بي فيديو كاسـيت وأتاري *** نتسلى لوكتنا نضيع
ما جينا زمان شـــن قلتو *** يافقير يامقطع أرجــــع
***
دايرين زنقيل ومقنــــــدل *** لو كان تمســـــاحا يبلع
والعملة الحرة ضــــــروري *** والمهر دولارا يدفــــــــع
وبشرط الشــيلة العامـرة *** والكرسي الجابر يلمـــع
وذهباً مختوم وأســـــــاور *** مليانة الإيد للأصـــــــبع
وضروري الحفــــــلة بوردي *** والكابلي اللحنو موقـع
ونقضي عسل في أوروبــا *** ونطوف العالم أجمــــع
بي لندن وروما وموســـكو *** وفيينا المدن الأربــــــــع
نلبس في الكاسي العاري *** ولو طلعت موضة بنتبع
وناكـــل فاكهة طـــــــازجة *** وبالخير نتمتع ونشـبع
أفلامـــكم والله عجيبـــــــة *** خلونا نحمض ونطبـــع
ماجينا زمان شـــــــن قلتو *** يامبهدل أوعك تطمـع
***
مد رجليك قـــــدر لحافك *** وشوف ليك طـورية وأزرع
لي مين تتقــــــــدم انت *** يا قرد ياقبيح يا مبرقـــــع
كيفن بتحـــــب يا أغبش *** من غير شاكوش تتفرقع
لو كان بنحــــــــب الزيك *** ما أخير الموت الأســـــرع
لو مت وفاتك تفــــــــــرح *** ولو عشت حياتك تفجـع
ولو تبقي ضراعي الأيمن *** في لحظة بنقطع ونجدع ***
ما قلنا الدنيا دي فانية *** وآمالنا مظاهـــــر تخــــدع
اختاروا العندو ديانـــــة *** الديمة وشـــــــو بيلمـــــع
قلتولنا خلاص انتظـــرو *** الحــور في الجنة بتنفـــــع
الليلة قطـــــــركم صفر *** والعمـــــــــــــــر ولى ودع
عجزتو قعــــــدتو تقولوا *** واشبابنا الأغبـــــش أجدع
ماجينا زمان شن قلتو *** يافقير يا مقطــــع أرجــــــع
*** ما جينا زمـــان ليه كنتو *** جاهــلننا زي الشــــــــفع
ما خلاص الليلـة وقعتوا *** من قد القفة الأوســـــــع
والليلة قطركــــــــم دور *** وقعتوا في وش المدفــــع
رافعين الراية البيضـــــاء *** لكن هيهــات ما بتنفــــــع
رافعين لعرس جماعي *** وفي العشرة ألف ما بنطمع
وهنياً ليكم كبدة وشية *** بعـــد الأضراس تتخلــــــــع

مولانا عوض الجاك ومولانا عبدالجليل النذير الكاروري خففوا شوية من حكاية البوران ده بحاجة سموها زواج إسبار .... مسيار .... خيار!!!!! حاجة ذي دي ولخبطوا عقولنا وعقول البايرين والبايرات .... وبالمناسبة البوره نوع من أنواع السيارات (عائلة الفلوكسواجن).

يافريني
أحوالك ياخي....ههههههههه
والله البوست بتاعك دة خطير خلاص كل ما
أمشي لي مشوار صغير ألف وأجيهو راجع...ياخي
زولك دة ما شفت لكن! يمين
ما خلٌى للجماعة الحبة...البوست
دة مفروض يقعد شهرين ثبوتة فوق يا
معلم...جاييك
راجع...أكيد

[quote="فتح الرحمن أبوراس"]مولانا عوض الجاك ومولانا عبدالجليل النذير الكاروري خففوا شوية من حكاية البوران ده بحاجة سموها زواج إسبار .... مسيار .... خيار!!!!! حاجة ذي دي ولخبطوا عقولنا وعقول البايرين والبايرات .... وبالمناسبة البوره نوع من أنواع السيارات (عائلة الفلوكسواجن).[/quote


الاخ الغالي فتح الرحمن أبوراس أجمل تحية و احترام
رغم بعض المشايخ حللو حكاية زواج المسيار لكن مازلت البورة حاصلة ما معروف ليها سبب

Badreldin Farou كتب:يافريني
أحوالك ياخي....ههههههههه
والله البوست بتاعك دة خطير خلاص كل ما
أمشي لي مشوار صغير ألف وأجيهو راجع...ياخي
زولك دة ما شفت لكن! يمين
ما خلٌى للجماعة الحبة...البوست
دة مفروض يقعد شهرين ثبوتة فوق يا
معلم...جاييك
راجع...أكيد

فرو الغالي ليك وحشه يا حبيب
الموضوع فعلا خطير جدا و المجنني المشكلة ما في بورة البنات المقادر أفهمو بورة الراجل دي جديدة مع أنو الامثلة كثيرة الواحد لو عاين كويس في جيرانو بلقي اثنين ثلاثة راجل تجاوزت اعمارهم الاربعين ولم يفكرو بالزواج حاجة تخوف
برجع

Majdi AbdulRahim fadul Mo كتب:باير ميونخ

ده كلومن الريال ومدينة مدريت

في ريده مافي بوره

بوست يحكي الحال تماماً

قود شوت فريني في التمنيات.



،،،،أبوقصي،،،،

الرائع دوما أبو قصى

فضل فيها تنميات تعال نشوف منى سليمان دي قالت شنو !

ديمقراطية سيدنا (عمر) وتواضع العظماء في دواخله، هما ما دفعاه - رضي الله عنه - للاعلان على الملأ بأن (أصابت امرأة وأخطأ عمر)، رغم أنه لو كان لهذه المرأة سبيل لبوابة السفر عبر الزمن، وعبرت من خلالها ذات صباح لعالمنا اليوم، فقابلتها في الطريق زفة فطور عريس بـ (الكيتا)، أو عبرت خلالها ذات مساء فوجدت نفسها في مقدمة ركب (سد مال) تحفّها على الجنبين حاملات سُباتة رزم المهر المزينة بالورود وورق السولفان، وخلفها أثقال الشنط المحملة بالعطور والديباج والحرير، أو أناخ بهذه المرأة بعير عابر للأزمان أمام واحدة من صالات الأفراح فرأت ما بداخلها من بذار وخسار وبوبار .. لو رأت تلك المرأة - والتي اعترضت سيدنا (عمر) عندما تحدث عن تقليل المهور - تلك البدع والبدائع، ربما لعادت وأناخت بعيرها في حدائق القصر الجمهوري، وطلبت من (عُمرنا) ممارسة دكتاتورية حميدة يحدد بموجبها مهر العزباء بـ (خمسين قرشاً) والفتاية بـ (جنيه)، وأن لا يستنكف أن أستدعى سوء الحال وتحول الزواج في عيون الشباب إلى عقبة دونها المحال، أن يعلن عن مكافأة تحفيزية للشباب الراغبين في العفة تقول:
تزوج فتاية واحدة بـ جنيه نعقد ليك على الثلاثة الباقيات بالمجان!!
ياربي .. هل يعلم مخططو استراتيجياتنا للمستقبل أن إيجار صالة الأفراح (بي عشاها) قد تجاوز سقف العشرين مليوناً بالقديم؟ الا يعتمد تخطيطهم للمستقبل على شباب اليوم العاجزين عن مواصلة حمل أمانة الاستخلاف في الأرض، لأن البنات اعتصمن بشرط (العريس يا مطر الرشاش .. العرس يا كدا يا بلاش)، فلم يجد أؤلئك الشباب ما يحفظ ماء وجوههم سوى مداراة حرمانهم والقول للعرس (بلاش) على طريقة الكديسة الما لحقت اللحم؟!
كلنا نعلم أن تزايد أعداد اللقطاء ووارد الكوش من منهوشي الرؤوس بأنياب الكلاب، انما هو نتاج طبيعي لتحول الزواج في عيون الشباب للخانة الرابعة في قائمة المستحيلات، ليس هذا فحسب فهو أيضا سبب رئيسي من أسباب تزايد ظاهرة التحرش والاعتداء على الأطفال والقاصيات من البنات .. طبعا مع الوضع في الاعتبار أن (المال السايب يغري بالسرقة)!
تردي الحال وتزايد تلك الاحصاءات، تجعلنا لا نمانع بل نبصم بالعشرة، على أية دكتاتورية حميدة تسن بموجبها قوانين تردع النساوين عن الفشخرة والبوبار وفك الزرار .. غايتو - أنا شخصيا - عندي مقترحات فظيعة .. كدي أسمعوها ولو ما عجبكم كلامي أدوهو البحر:
أولتن بالتبادي بقترح اصدار قانون رادع يمنع بموجبه ارسال أي فطور لعريس، وأن تقوم الشرطة بدوريات صباحية، تجوب طرقات ودروب الأحياء السكنية - بالذات الأحياء الراقية - وتقوم بالتصنت لرصد ومطاردة أي دفّار أو بوكس تصدر منه أصوات آلات النفخ الكيتية أو النحاسية، وتفوح منه روائح ملاح التقلية والشعيرية والسكسكانية وتتطاير منه نكهة الفطائر والفطير .. ريقكم جرى ؟ استغفروا .. استغفرتك يا مالك روحي ..
اقترح مصادرة تلك (المعروضات) الشهية فورا، شريطة أن لا يقوم بيها ناس الدورية بل يقوموا بتوزيعها على جوعى المواطنين الذين غادروا بيوتهم من النجمة على لحوم بطونهم طلبا للرزق، وأن يقيموا بتلك المعروضات موائد رحمنة في ميادين أبو جنزير وجاكسون وسوق ستة وسبعة والمايقوما وأبو حمامة وأم طيور!
تانيا: بقترح انزال كل الحريم التريانات والنديانات الراكبات في الحافلة المع الفطور، واللاتي تسابقن من صباح الرحمن للقشرة والخروج في ركب فطور العريس طمعا في العودة بالهدايا والارياح .. طبعا في واحدين بيشطحوا ويهدوا لكل واحدة من نسوان الفطور خاتم دهب!! قلنا ينزلوهم من الحافلة و..... وللا بلاش، لو قلتا يجلدوهن كل واحدة شحطتين يقوم (ساركوزي) يقبّل علي، أحسن عقاب ليهن عشان تاني ما يبارن البوبار انو كل واحدة يرجعوها بيتها (جكة) منها رشاقة ومنها توبة لـ حبوبة.
تالتا: تحديد سقف للمهور وتكاليف الزواج لا يتجاوزه اهل العروسان،ومن كان عنده فضل قروش فليعد بها على من لا قروش له عشان يعرس بيها ..
رابعا: حصر (الزواجات الجماعية) على طلبة وطالبات الجامعات وبس ! كذلك تقديم اعانات للمتزوجين منهم، وأن تخت كل أسرة في قلبها الرحمن وتدق صدرها وتعزم على تزويج ابنائها الشباب بـ الفي والمافي، وأن تآمن أمهات البنات بأن قلة المهر ملازمة لكثرة البركة، وأن كل ما زاد عن حده انقلب إلى ضده، فكم من زيجة صرفت عليها عشرات ومئات الملايين ولم تعمر طويلا وعادت العروس بعدها لبيت أهلها و(وشها يلعن قفاها) !