حنة عواطف

حنة عواطف
كان ذلك فى منتصف تسعينات القرن الماضى




فى نفس العمارة التى كنا نقطنها كان يسكن صديقنا (سعيد)

فى الطابق الأعلى للشقة التى أسكن فيها حينها




وسعيد هذا ينتمى إلى أحدى القبايل التى تتكسر فى (الزوجة)
تكسير شديد وتجعل (طلباتها) مستجابه فى (لمح البصر)

بل تجعل الزوج كما (الرموت) يسير وهو مبرمج تماماً

… يمين يمين .. شمال شمال .. كان (سعيد) ينصاع إنصياعا

تاما لزوجته (عواطف) والتى أسميناها (الحكومة)

فما أن يسمع سعيد صوت (الحكومة) وهى تنده له إلا و(يرمى)

ورق (الويست) الذى كنا ندمن لعبه فى العطلات ذاهباً

نحو مصدر صوتها ملبياً لأوامرها تماماً .

كان سعيد يهيم حباً بزوجته (عواطف) حتى تخاله حمل وديع

فأنت إذا ما قدر الله وذهبت معه للتبضع فى السوق فاجأك قائلاً :

- والله التوب (المشجر) داك أريتو فى (عواطف) !

- شفت (أحفظ مالك ) الفى البترينه داك يجنن أنا ح أشتريهو لى عواطف !

فى أحد الأيام وبينما أنا أصعد درجات السلم نحو (شقتى)

مرورا بشقة (سعيد) وجدته أمام باب شقته عائداً من

(الشغل) وهو يحمل فى يده (بطيخة) وعددا من (الأكياس)

وبعض الصحف والأوراق ونفسو (طالع ونازل) من الشيل .

- مالك يا سعيد واقف متحير ؟

- (وهو يشير بنفس مقطوع نحو شقته) :

الشقة مقفولة والمفتاح جوه مع (عواطف)

- طيب ما تكورك ليها !

- لا .. لا .. ما أصلو هى قاعده محننة

- ويعنى شنو؟ ما تخليها تطلع الحنة و تجى تفتح ليك

- كيفن تجى تفتح ليا أكان جات فتحت ليا حنتا ما بتبوظ !

قالت ليا إنتظر الحنة لامن تشيل و(أخرتا) حتين أجى أفتح ليك !

- وأنت هسه قاعد راجى حنة عواطف لامن تشيل ليك بعد ساعتين ؟

- ساعتين شنو؟ فى أقل من ساعة ح تشيل .. دى أصلو

(حنة التاج) جايبا ليها أنا (من السودان)

والمحلبية (نمرة واحد) أصلية (ميسو) …

أنا حاجات (عواطف) دى ما بلعب فيه كلو كلو!



- طيب خلاص وكت ما عايزا (تفرتق) حنتا تعال أطلع معاى

فوق فى الشقه لحدت ما (حنتا) تشيل وتطلعا وتفتح ليك الباب !

وطلع معى (سعيد) إلى شقتى وهو يحمل (البطيخة)

وكل تلك الأكياس والأوراق والصحف وما أن جلسنا ورأى

علامات الإندهاش على وجهى حتى بادرنى قائلاً :

- كل حاجه ولا بشتنت عواطف دى .. أنا عاوزا لمن تمشى

عرس ناس سعاد بت بابكر بعد بكرة النسوان ديل لمن يتضايرن

- هى لاكن .. أنت كده الوقفه البره دى عليك ما حارة ؟

- لا حارة ولا حاجة أنا كل شئ ولا زعل عواطف دى ..

لازم حنتا دى تطلع سمحه وذى سواد الليل !



رفض (سعيد) رفضا قاطعا مبدأ ان يتناول معى طعام (الغداء) قائلا لى :

- عواطف دى لو أنا ما أكلت معاها ما بتاكل !

إنقضت حوالى ساعة من الزمان كان يحدثنى فيها (سعيد)

عن علاقته مع زوجته (عواطف) وكيف أنه حريص

على تجنب (زعلها) ودائم العمل على إرضائها كما عرج

على موضوع (حنة عواطف) وكيفية إختيارها (للنقشات)

وعدد (الحنانات) اللواتى كن يقمن بعملية رسم الحنة لها فى

السودان .



وبعد أن إستمعت له قلت له مندهشاً :

- ياخ معقول فى راجل بيهتم بالحاجات دى كده !

- كيفن ما أهتم ؟ دى (عطوفه) ياخ !

- طيب قوم شوف (عطوفه) بتاعتك دى (حنتا شالت) !؟

عشان تدخل المأوراق والملفات الشايلا ليك ساعتين دى !

خرجت مع (سعيد) وهو يحمل الذى إتكأ مرة أخرى على

الأنبوبه وقال مخاطبا (عواطف) فى رقه زأئدة :

- عواطف .. عواطف .. حنتك ما شالت؟

- (جاءه الرد سريعا فى حده) :

ياخى كرهتنا الحنة ذاتا .. ما قلنا ليك لسه ما شالت !

أحمر وجه سعيد وإصفر ثم إحمر مرة أخرى

ونظر لى مبتسماً وهو يقول :

عواطف دي بتزعل سريع .

هههههههههههه الله يجازيك يا عدولة لكن
سعيد ده ما خليتو زي واحد اخونا في الدوحة
اسمه صلاح ده برضو ما بقدر يزعل سامية

تسلم يا عدولة شايف الرادار اقصد الشعلة
سافر السودان لحضور زواج اخته اصلاح
ربنا يوصله بالسلامة غايتو رادارتكم بتعرف
اخبار الناس اوي

دي مبالغة زي مبالغة حنان سكليب
ههههههههههههههههههههههههههههه

رهيبة يا عادل ... شاهدت في بعض محطات حياتي أحد الرجال وهو يكحل زوجته وقريباً كنا في زيارة أحد الأسر ... الزوجة جلست معانا في المجلس والزوج ذهب ليعد الشاي ويقدمه لنا ....... ما قلنا ليكم الزمن بقى مشقلب..............

Majdi AbdulRahim fadul Mo كتب:عادل محمود يااااخي الحنة مباااااااااالغة .
،،،،أبوقصي،،،،

دى حنة التاج يا ابوقصى مزروعة فى بربر والدامر هههههههههه؟

بنقوري كتب:هههههههههههه الله يجازيك يا عدولة لكن
سعيد ده ما خليتو زي واحد اخونا في الدوحة
اسمه صلاح ده برضو ما بقدر يزعل سامية

تسلم يا عدولة شايف الرادار اقصد الشعلة
سافر السودان لحضور زواج اخته اصلاح
ربنا يوصله بالسلامة غايتو رادارتكم بتعرف
اخبار الناس اوي

تعرف يابقورى ابو السعود ده لو ماكان دخل البيت معاى كنت حا ارسل ل امى بت عائشة بت سعدين تمشى العشرة وترسل لى قفة بتاعت سعف وكان شيالتها ليهو

تعرفو يا حلوين دا نحن الخايفين منو زاتو وباقي لينا سبب في تأخر الزواج ، رجال آخر زمن والواحد حاسي انو سيظل اسد الى اخر يوم في عمرو لكن الشايفنو بقول غير كده وحتى اخواتي والحاجة بقولوا لي بدق لينا جرس هسي ساكت في المشاوير نشوفك بعدين حالك حايكون زي ما هو ولا .. وانا بكلام عادل دا ابقى( ولا )
يا ريت نشوف راي ناس عبدالله كع وخالد لولو الأسد وعادل تنقو شنو في الكلام دا وبقية العقد الفريد من ناس الرياض

الاخ : الصادق

تحياتى ،،،،،،،

ياسيدى الاسد أسد .

يالصادق دايرين نشوف الاسد لولو ده بالله بلغوا تحياتى هو ماعندوا نت ولا نشنو فى البيت قول ليهو دولى قال ليك خش مقهى

يادولى .

شكلو صاحبك دة ماعندو نت ومابيمشى مقاهى

إتصل عليهو ياخى .

امكن مابقدر ياماردونا ههههههههههههههههه

خلاص نتصل عليهو مع بعض

أههه

من ناحية بقدر انا متأكد انو بقدر عشان كدة انا سميتو الاسد والدليل انو حسب الاتفاق والوعد كان اول الحاضرين لدار الامتداد ليلة الخميس المنصرم حتى قبلنا نحنا العزابه والباقي على اللي قالوا حانجي وما قدروا وبراهم اذا دخلوا البوست دا وعلقوا حاتعرفوهم وتحياتي لـ .................. ( اظهر وبان وليك الامان )

الصادق ياخوى .

خلى الطابق مستور على الباقين يمكن عندهم ظروف وكدة .

تحياتى ،،،،،،،،

MARADONA. كتب:خلاص نتصل عليهو مع بعض

أههه

ادينى رقموا الاصلى ما المزور اصلوا هو عندوا كم رقم

ادينى رقموا الاصلى ما المزور اصلوا هو عندوا كم رقم


رقمو زاتو ماغيرو

أهههههه

انت يااخ عادل يعني ما عارف مردونا دا منو اوع يلعب عليك ويكون مردونا بالجد .
ويا لولو وري الزول دا

لكن حنة عواطف خطيرة
قلبت اسود ونمور وووووووووووووووووو

والله دى حنا تهد الجبال هههههههههه

الصادق خليفه الصادق كتب:انت يااخ عادل يعني ما عارف مردونا دا منو اوع يلعب عليك ويكون مردونا بالجد .
ويا لولو وري الزول دا

كيف ما بعرف ماردونا ههههههههههه انا دايروا يفاجى اخونا امير ويرد ليهو

دولى ـــ الصادق

روقو اللعب شوية ياشباب شكلو البوست قلب جو بقالة وكده.

لانو امير كبر وعجز وكل يوم بفتش وبسالنى منو ماردونا قلت ليهوا رداندوا بيوريك ليهو ؟ههههههههههه
ياماردوانا اتصل على فضل فضل
وخلى يمرق من البقالة

اخونا عادل .. مسئول من الخير وين أشرف محمود وعلى ما اذكر لو انت بيتكم واقع في الشارع شمال ناس عادل تنقو يبقى انك ممكن تكون شقيق اشرف وعلى فكرة اشرف كان الدفعة الورانا مباشرة مع ناس ماهر جعفر مربع 2 .
كدة كيف معاك يا ابو اللول

ههههههههههه بس ياهو ذاتوا بشناتو يالصادق نعن انا شقيق اشرف محمود بالضبط
اشرف يا عزيزى طبعا كان فى روسيا وخلص وذهب الى هولندا واستقره بها وطاب له المقام وتزوج من هولندية واكرمه الله بها ان اسلمت ودخلت الاسلام وهو دائم الوصول فى اجازاته الى الخرطوم بعد ماطاب له المقام ببلجيكا ونال الجواز البلجيكى وهو له بنتان صفاء ومروة
بس زوجتوا اتحننت مره واحده والحنة عملت ليها حساسية بسبب ميسو وحلفت من الحنة هههههههههههه مازى عواطف