الكلب بن الكلب نجح في الامتحان

اي والله نجح بامتياز وكمان استلم الشهاده وشربنا شربات الفرح وقدم لينا الشكر وهو اخر انبساط
جاني وقالي شكرا قلت ليهو لقيتها يانجس بن النجس عل مبروك النجاح ....

الله دا كلام شنو ياعمدة؟

أفصح وأشرح .. عشان يانبارك يا نبرك

والله يامحمد يااخوي ذي مابقوليك عل داير اسالك ...كملة كلب شتيمة ؟؟
وهل الكلب نجس ؟؟
غايتو لو شتيمة زولك ده التراب كالو..
نواصل ...
لك مني اسمي ايات الوداد

[

شكرا ياكعو وانشاءالله عقبال للوليدات واولاد الجيران والحي ونبارك ليك في الكبيرة
وانا بوصل التهاني للكلب ..
بس ماقلت لي شتيمة واللا ما شتيمة ؟؟؟
ونواصل ...

ســلام .. للكل .. وعماد عويس

تصدق يا عويس ذكرتــنـي حاجه قديـــــمه :

تتذكر الشــاويش ( البوليس ) كـتــال الكلاب لما يجــي حــايم في شــوارع
الامتــداد بالكومــر !!!

خير.. اللهم آجعله خير.

مرحبتين حبابك يحي النضيف واليوم السعيد الليلة جابك
الراجل ده كتل كلبنا وقدقد الحيطة غايتو الله يسامحه اظن اسمه عثمان
لكن لو جاء هنا مابيكل عيش ..
من ناحية خير خير اطمئن خالس
بجيكم برواقة

عماد عويس كتب:اي والله نجح بامتياز وكمان استلم الشهاده وشربنا شربات الفرح وقدم لينا الشكر وهو اخر انبساط
....

عمدة سلامات مليون مبروك وعقبال بقية العقد الفريد
لكن يا اخوي ما بنخليك لمن تكمل الحلقة الاخيرة وبرجع ليك

عماد عويس
سلامات
الف مبروك النجاح
وعقبال الدكتوراه

عماد عويس كتب:شكرا ياكعو وانشاءالله عقبال للوليدات واولاد الجيران والحي ونبارك ليك في الكبيرة
وانا بوصل التهاني للكلب ..
بس ماقلت لي شتيمة واللا ما شتيمة ؟؟؟
ونواصل ...

الاخ الفنان الرقيق ... عماد عويس اولاً نترحم على روح الوالد عويس وربنا يرحمه
رحمة واسعة ويجعله من اهل الجنة ويجعله مع الصديقين والشهداء
ثانياً الف مليون مبروك ....والبيت الكبير الامتداد منتظرين نهاية الحلقة
وسلامي لاسرتك الكريمة واقبل سلام الاولاد ....... بنقوري

الاخوة الكرام اعتذر عن التأخير للمشغوليات ..
اواصل معكم اليوم ..لعلكم فكرتم في هذا العنوان والذي ربما فكر البعض باني استهذأ او اكتب قصة من نسج الخيال انها الدنيا بخباياها واسرارها وتطورها الراقي ..
لقد ميزنا الله بالعقل لنفكر ونصل غايات مهمة تساعدنا في حياتنا رغم اننا لم نؤتي الا القليل ..
عليكم بالصبر ..لحدي ماارجع تاني ...
اترككم في رعاية الله وحفظه

سلام ياروحي الحبيبة درة احياء الخرطوم ...
رومان شاب يبلغ من العمر 24 عاما .مصاب بفقد التوازن يترنح كالسكران يمينا وشمالا ..
ضعيف النظر يكاد لايري الا القليل وبعد تركيز شديد ..
حول اذنية سماعتان لايسمع الا القليل بعد تركيز ..او يستخدم الكتابة علي الكف( احدي طرق المخاطبة )
يتحدث بصعوبة يحتاج منا التركيز الشديد لفهمه ..
هذا نصيبه في الحياة ..يعمل ويكد ويرفه عن نفسه ويعيش مثل اي شخص عادي في الحياة يستخدم الكمبيوتر
مثلي مثلك تماما مع اختلاف انه يسمع ويكتب في الكمبيوتر ولا يقرا يستخدم الانترنت عادي ..وهذا هو الرقي والتقدم العلمي .. حكمة المولي الكريم ..اللهم اشفي كل مرضانا
تربطني به علاقة حميمة ..في يوم صباح وصباح هناء اثناء مروري ..ناداني بشدة ..تعال انا عايزك ضروري. في حاجة مهمة ...اللهم اجعله خير ..
ذهبت معه في غرفته ,جلس علي الكمبيوتر ,وقال لي كلام ما معقول !!! واية المامعقول ؟؟؟
قال لي اقرأ وانت تعرف ..هو انا اعرف شنو واللا اخلي شنو؟؟؟
تخيلوا معي ..موضوع في جريدة تخص اقليم ( مسقط رأسه) عبارة عن تضامن مع شابة وبجوارها كلب!!
الموضوع ياصحابي كالاتي ...
رفضت المدرسة قبول كلبها ..وعللت المدرسة بأن الكلب عنده شوية عدوانية لابد ان يدخل مدرسة خاصة
لمدة 8 شهور (وهي مدرسة يعالج فيها الكلاب العندها حلات نفسية ). ثم يقدم للمدرسة مرة اخري ..
مسكينه انت لازم تتضامن معاها ..قلت جوه قلبي والله بالحيل اتضامن ليه لا ..
..اديني العنوان اتضامن ..
بالمناسبة ده ما موضوع العنوان. العنوان يخص الكلب بن الكلب جيني
ودعتكم الله والرسول .العفو والعافيه ونواصل ...

شكرا يحي نحن مازلنا نترنح في عتبات القرون القابرة وعايزين زمن طوييييييل عشان نفتح ونفهم العالم من حولنا ..لكن برجع تاني واواصل مع الكلاب التي حباه الله قدر عالي من الزكاء والوفاء الذي لاتجده عند البشر ...
سلام اخي يحي وكل الاحبة ؟؟؟

قي يوم ماطر وانا ذاهب للعمل وقبل وصولي بخطوات من داخل العربة شاهدت كل العاملات معي في الشرفة
فقلت في نفسي اللهم اجعلة خير النسوان ديل مالن الليله متلمين ..طلعت السلمه الاولي نادتني استر وقالت لي تعال بي هنا انا حقك مجهزة ليك !!هييييع كأس سسسسسساقط من البرتقال ,,قلت ليها وليه يعني انا الوحيد برتقال ؟؟ما انا برضو عايز من البتشربوه ده ..قالت لي ما انت مابتشرب عشان كده عملنا حسابك ..انا بهزر ساكت ..اه المناسبة شنو؟؟ انت ماقريت في الايميل بتاع المكتب انا رسلت رسالة يبدو انك ماقريت !!طبعا بي زعل شوية ,,, قلت ليها بالحيل قريت يااخت لكن قريت البهمني والباقي خليتو,,
قالت بأبتسامة جيني نجح ...انا لو ماعارف جيني ده منو ..كان افتكرته ابنها ,,,
جيني هو الكلب بن الكلب ..طبعا لما قلت جيني ,,فاذا بجيني يجيني ويهز لي ضنبه ويتمسح ويعاين لي
قلت ليهو لقيتها ياكلب لكن برافو عليك طالما نجحت
وبعدها قلت لازم انا ادخل عالم الكلاب واشوف الحاصل شنو ..كلاب متعلمة في مدارس !!!
وفعلا دخلت ولقيت الحكاية عجيبة ..ياحليلك ياكلاب بلدنا وياحليلنا وحليلنا يابلدنا ,,مع الاعتذار للاغنية ,,
برضو نواصل ..فتكم بعافيه ..

الأخ سلام والله دخلت انا قايلك بتشكر ليك في واحد سوداني نجح وجيت خاشي عشان أبارك يطلع كلب ، لكن مافي مشكلة برضو مبروك لكلبكم بتاع جيرانكم ، لكن مافي مفاجأة لأنو في سودان برضو بقولو بالله شوف ابن الكلب ده عملها كيف يعني ما طريقة نبذ اعجاب اي حاجة كده يعني نقول غلبو التعبير ، برضو نهنئ ونقول عقبال (جرقاسنا)و(بوبينا)

عماد عويس
السرد جميل بس سليت روحنـا-تم القصه و لا نجيب لي كلبك دا قتال الكلاب (الشاويش مهاه البندقية )وعينك ما تشوف الا النور

جيتمكم مهكر لي كم يوم مشاغل والكميبوتر عطلان غايتو قطيت ايام شينه خلاس ماعارف اسوي شنو ..!!

الحمدلله لقيتكم تاميين وسالمين وبرجع ليكم ياابوالزهور انت قايل الحكاية ساااااااهلة كده انت ماعارف حاجة ساكت....الكلاب دي تلفوناتها شغاله 24 ساعة 365 يوم !!!!!!!!!!!!!!!!!!!!!!

الكلب إبن الكلب(الذي ما دخل محو أمية زاتو!؟...)
الأستاذ والفنان المبدع عماد عويس..
تحياتي لك وعبرك ...وكل عام ومزيكتك مدورة في سويسرا..أتمني أن تكون مواصلاً لإبداعك فأنت موهوب بالفطرة..
لا يمر يوم إلا ويتحفنا أبناء العم سام بكل ما يشيب له الرأس ..هاجت الدنيا وماجت لدينا في الأيام الماضية إحتفاءاً بمخترع (نسيت إسمه!) وهو يعرض إختراعه العجيب لكل وسائل الإعلام..فقد توصل المخترع الداهية لإختراع (صابونة حمام) يستطيع المرء عند إستحمامه بها (فتح عيونه) للآخر بكل أمان والإستمتاع بكل مناظر الفقاقيع الملونة دون أن تسبب له الصابونة أي نوع من الحرقان أو(الأكولة) في عينيه!!..أي والله....فأبناء العم سام أغلقوا عيونهم طويلاً وآن لهم مشاهدة تفاصيل حمٌامهم المدهش خطوة بخطوة؟...
تزكرت مقالك الرائع وأنا أشاهد في طريقي لأداء ماتش مهم تلك الحسناء التي تهادت أمامي تسحب كلبها (الناجح بامتياز) والرقيق كالسحابة والذي ألبسته تي شيرت أنيق يحمل الرقم(7) وكأن إبن الكلب راؤول غونزاليز!!..
وتزكرت كذلك كلباً آخر...لم يدخل أي إمتحان..كلباً ربض طويلاً في الشارع قبل الأخير من الإمتداد مربع(13) في منتصف الطريق مابين منزل عبدالمجيد منقة والأخ يونس ملاح..وهو كلب الأخ ناصر سعد..كلب لم يسلم منه أحد..يباغتك بعد مرورك منه بخطوات ثم تبدأ (البشتنة والمساسقة والكوراك) والغريب في هذا الكلب أنه كان ينتقي زبائنه دائما من المعترين والمفلسين..(يعني لو جيت ماري بالشارع قاشٍر وريحتك معبية الجو لا يحفل بك إبن الكلب!..حتى نوعية السجاير بيفرزها ..يعني ما تقطع قدامو شايل ليك سيجارة Winer يا إما بينسون ولا تغير الشارع؟...
ولما كان شارعي المفضل هو شارع ناس عاطف القوز(شارع الشامية) أي نفس الشارع كثيراً ماتعرض لي إبن الكلب وأقسم أنني كنت زبونه المفضل!..
قررت خداعه في أحد الأيام(لبست وقشرت وكمٌلت فتيل ريحة في ملابسي وجيت مارق)..إبن الكلب راقد في نص الشارع كأنما ورثه عن أبيه؟..تمهلت في خطوي حتى لا يستيقظ...عبرت من أمامه بأمان..إسترقت النظر نحوه سعيداً بانتصاري وخداعه ...كان إبن الكلب يضحك؟!...........
يديك العافية يا عمدة...وخليك قريب

سلام للكل

خلي بالكم انا اكون سعرت من الكلب دية

كدي احاول تاني .....

الحمدالله لقيناكم جميعا بخير الا من فقدناهم في هذه الدنيا الفانية فليتقبلهم جميعا المولي عزوجل قبولا حسنا
شوفوا الناس دي بالله بتكرم الحيوانات دي كيف ؟؟ في بلدنا حتي الانسان الكرمه الله سبحانه وتعالي يذل ويهان
ادخلوا علي عمي قوقل واسألوه عن Pet airways شوفوا رده ليكم شنو؟؟

لكن مارديتوا علي !!!هل كلمة كلب اساءه ؟؟ ولماذا ؟؟

انت كالكلب في الوفاء !!!!!!

برجع تاني من تاني والقاكم ياحبايب وكلي اشواق

سلام يا عمدة :
قبل كل شي .. رايك في الحمار شنو - برضو اساءه او انه رمز للغباء ؟؟!!
عموما قرابت السنتين انا خاتي في خلفيه الكمبيوتر صورة حمار .. لكن ما حمار
شخصيه كل من شاف هذا الصورة استكر علي هذا الوضع - لماذا تخت رمز الغباء خليفيه لجهازك ؟؟ حتي المرة في البيت امتعضت هذا الامر .. ولكني كنت اري فيه ابداع من المولي عز وجل - وسبحان الله
ما عندي اجابه علي سؤالك .. ولكن شي متعارف عليه ان كلمة كلب اساءه !
ــــــــــــــــــــــــــــــــــــــ
ما عرفته انزل صورته هنا .. لو اتقابلنا هناك بتلقي حماري واقف .. يعجبك

احترامي

لا يمر يوم إلا ويتحفنا أبناء العم سام بكل ما يشيب له الرأس ..هاجت الدنيا وماجت لدينا في الأيام الماضية إحتفاءاً بمخترع (نسيت إسمه!) وهو يعرض إختراعه العجيب لكل وسائل الإعلام..فقد توصل المخترع الداهية لإختراع (صابونة حمام) يستطيع المرء عند إستحمامه بها (فتح عيونه) للآخر بكل أمان والإستمتاع بكل مناظر الفقاقيع الملونة دون أن تسبب له الصابونة أي نوع من الحرقان أو(الأكولة) في عينيه!!..أي والله....فأبناء العم سام أغلقوا عيونهم طويلاً وآن لهم مشاهدة تفاصيل حمٌامهم المدهش خطوة بخطوة؟...
عزيزنا بدرالدين الناس ديل ماشين في طريق بحث لكل جوانب الحياة لتسهيل امورهم والاستمتاع بخترعاتهم الراقيه
لكن نحن بنكابر ونشتم فيهم كل يوم بانهم كفار ويجب قتلهم وهم حطب النار ..لو جيت قارنت الحياة هنا في اروبا وعندنا
في بلدانا المتخلفة تلقي المسافة بيننا وبينهم ملاييين المسافات الضوئية ..اختراعات مسهلة فيها السمعنا بيها وقليلا جدا
وفيها ما سمعنا بيها ولا بالصدفة ..يااخوي خليها علي الله ساكت

حبيبنا كعو يااخي الحمار ما غبي منو القال انه غبي ؟؟ حيوان اليف وظريف ومساعد للانسان علي مر الدهور منذ بدأ الخليقه .الحمار ذيو وذي كل الحيوانات وذي كل البشر في اختلافاتهم .فيه الفوائد وفيه مالا يفيد ..
يقوليك ده بشتغل ذي الحمار معناة الحمار عنده قوة تحمل ماعادية ما بشكي ولا بحكي ياكلها علي اللباده واذا وجهته بمشي معاك ذي السكر وعلي الاقل ما بيأذيك.. اه الناس دي بتأذي بعضها بصورة ماعادية !!
الحمار عايز واحد يعلموا اي يدربو عشان يفهم وبالفعل يفهم ويلبي كل طلبات الانسان الظالم ليهو..
اه يابدرالدين شوف هنا الحمير تعيش في بحبوحة ومبسوطة شغالة وبتنتج ذيها وذي صاحبها الانسان
بس شغلها غير العندنا ...فقط في المناسبات يعني ثلاثة او اربع مرات في السنة وباقي السنة معززةمكرمة في حظيرتها كل يوم يمسحوا ليها جسمها ويتمشوا بيها تاكل تشرب تتعالج عندها طبيب خاص بلمف وعندها شهادة ميلاد
شغلها انه لمده اسبوع او كم يوم يكون مربوط في مكان الكرنفال يجوا الاطفال عشان يعرفوا الحمار يركبوه لمده 5دقائق بالشي الفلاني وقبل الركوب لازم يجي الطفل يمسح ليهو شعر الرقبة ويداعبة عشان الطفل مايخاف وبرضو الحمار يضمئن علي نفسه ..
فياكعو لاننا ربطنا الغباء بالحمار عشان كده بقت سبة. هناك حيوانات برضو عندها غباء ذي الفار مثلا اذا الشرك ضرب الفار حتي لو سال دمو يرجع تاني للشرك !!اه دي الحمار ما بسويها ...
سلمتم احبائ من كل سوء

الأخوة الأعــزاء .. و عـمـاد ..
تحياتي.
دروس وعــبــر .. من مأســـاة هــايتي وفرق الأنقـاذ ودرء الكوارث من الدول المتقدمـة والإستعانة بمهارة االكلاب المـتـفـوقه علي قدرات بـني البشرفي حاســتي الـشـم و السـمع بمراحل وذلك لـتحديد أماكن الضحايا و المـصــابين تحت الأنقاض و البنايات المهدمة من جراء كارثة الزلزال المدمر.

الشيء المحيرني .. يا ..عــماد .. هل الكلاب حول العالم مجتمعة تـمتاز بنـفس المهارات الفطريه .. مع إمكانية التعلم لإكتساب المزيد من المهارات زات الطابع المهني.

ياربي .. الأحــساس المرهف للعالم المتقدم تجاهـ كلابهم .. هو نفس إحــساس السودانيين .. تجاهـ كلابهم ( جـرقــاس .. مثلا ) .

نلاحظ الميل الفطري لدي شريحة الأطفال وحبهم وتعلقهم بالحيوانات ( أرانب –
طيور زينة - حمام –دجاج – غنم – قطط - كلاب).

في كتاب المطالعة بالمدارس الأولية.. قصة (كلب عبد الجليل) .. زمن التعليم في المدارس الحكومية والمناهج التربوية لإعداد أجيال المستقبل علي نسق تربوي سليم مبرأ من كل هوس ودجل.

وملخص ســينــاريو القصة ( لإنعاش الذاكرة قليلآ) :

يــروى .. إن كلب عمنا / عبد الجليل وكما العهد به كـلـب .. ثـقـة .. آمين..
لا ينافق في محبتة ... وبينما .. عمنا عبد الجليل في غيابه لآمــر مــا
ترك كلبه .. عند متاعه .. وطفل رضيع .. وبينما الحال كذلك , إذ تـراءى للكلب
شبح الضبع الذي لا تخطئه غريزة التي فطر عليها وآنه لا محـال من العراك, فعلي الكلب القيام بالترتبات الأمنية آولا .. وذلك بأن وضع الطفل تحت الغطاء وحال بينة و بين ذلك الضبع (المرفـعين) الجائع المفترس( و بســب التوازن البيئي .. فأن الضبع يأكل كل شئ .. فهو من الحيوانات الرمامة .. آكلة للجـيـف).

و ..لك ان .. تـتخيل .. يا عــماد .. و الأخوة المشاركون .. عندما .. تتم تنشئة الأطفال ( فلذات آكبادنا .. قــرة أعيننا) علي هذا النسق من الفهـم و الاداراك...!!!

( أطفال السودان .. إتعلموا .. الأكروبات الصينية ..في .. فترة .. وجيزة بمهارة وإقتدار ... وبعد مده .. الجماعة .. قالوا ..دي .. حــرام )....؟؟؟

عليه ..فأن .. المستوي الحضاري لأى شــعب من الشعـوب.. يحدد بطريقة تعاملهم مع حيوناتهم وخاصة الكلاب,
لذلك ,.. فأن كلمة ..كـلـب.. لن تكون لفظ شتيمة في ذلك المجتمع المتحضر.
:
:
إلى .. اللـقـاء .. ولـنا ..عوده إن شــاء الله.
:

الاخ الحبيب يحي ودالنضيف لك كثير شكري للاهتمام وكثير محبتي لشخصك الكريم

اعجبني كلامك المنظوم المرتب الذي يجعل القارئ يفكر في المعني والمغزي الكبير

لكني ااسف لعدم الرد الكافي والنقاش حول ما كتبته ولكني مؤكد ساعود ..نسبة لظروف العمل

وماكتبته جدير بالنقاش مع كل المتداخليين ...

قلت لي حرام!!!!!!!

اكيد احترامي ومحبتي