أي بت شديدة بتحب ليها طُلبة (صبي بناي)

عبدالله عوض عبدالله كع كتب:

يلا يا دكتور ...
زكرتني المسلسلات البجوبها في رمضان .. ونقعد نتابعه لمن روحنا تتسلا .. ونستنج البحصل شنو في حلقة بكره .. لحدي ما تكمل القصه ... يقومو ناس التلفزيون يعودوها لينا تاني بعد العيد ... وبنفس الاحساس الاول نتااااااااااااااااااااااااااااااااااااااابع

هسي كمان حضرنا الحلقه الاولي .. علي كما نالله الا نصل الحلقه الاخيرة بس ما سل روحنا في الانتظار .

عامر تيتاوى كتب:الريس طارق جبريل
والعملاق كعكوعى سلاما سلاما
ويابقاوون شااااايفك
ربنا يرحمك ياجنابو

بدر يعقوب كتب:اها ياولد جبريل انا ماشي الامتداد قريب عايز اتم القصة دي قبل ماامشي لاني ماتبعتها بي هناك

طارق جبريل كتب:

عشان الناس الحلوة في الامتداد
عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة) يمين ان بقا ما بلاها ما تتلبس... والعرق الفيها لو كبوهو في بطارية عربية نازلة تولع...اما بنطلون الشغل بالله تقول ضربوا لغم كله مقدقد تقول غربال دراب..
يتكلموا عن كفاح الطلبة والديفييشن وكلاما غلاد غلاد كدي نحن مانا فاهمين منه اليكتحنا....

Admin كتب:والله قصة شيقة يا طارق ..
وتمكُن حقيقي من المفردة والسرد ..
عيشتنا في جو القصة كأننا حاضرنها لايف ..

أما وصفك لقميص الشغل بتاع عوض ..
فدي مبااااااااااالغة ..

ما إتمنيتك تبقى مكسيكي يا طارق إلا اليوم بس ..
عشان تعمل لينا مسلسل من 1700 حلقة ,,

واصل .. ونحن في تلهّف لإكمال القصة
لا فض فوك !

عوض كمباء كتب:ودجبريل الله يديك الصحة والعافية والتقدير ما انت نجتنا والدليل

محمد مصطفى كتب:معاك ياطارق .. الحلقة التانية ..
مستنين نشوف عوض عرّس البت ولا كان إعجاب كفاح ساي ...

الغريب ياطارق وإنت بتحكي عن عوض صاحبك وأنا بجيني شكل
عوض كمباء ..
ماعارف لو في علاقة بين يوم السبت وعين الحسود

أميقو كتب:التحية لك ياطارق انتظر اجيب لي قرطاس تسالي للقصة الممتعة دي
انا خايف يكون عوض بتاع الشايقية الضاع
يا ساري الليل : ما شفت عوض تابع النجمات فات لي قدام ؟؟
يا ساري الليل لقد ذهب عوض في ليلة من فيضان 1988م
من يوم البحر الجانا وتسب وقام
يوم دخل الحلة وهدم بيوتنا ترا وهدام
صبحنا ضيوف ما خلاّ وراهو صلة أرحام
يوم داكا عوض خلاها مرق سفره طويل مع الأيام
ثم يسترسل في أوصاف عوض
درويشاً صغير عشرة أعوام
الزول زول الله من الصلاح الرفعت عنهم الأقلام
من غرث الرسل الدارو الآخرة أم خيرن دام
التركو نعيم الدنيا الزايل للعبدوها وللحكام
ثم يبدا في وصف ملابس عوض وما كان زاده يوم خروجه
متجلبب بي تيبان الرحمة غتا وهندام
متنعلت بي أرض الله الواسعة خطى الأقدام
متزود شايل خير الزاد تقى وإلهام
يا ساري الليل ما شفت جناح جبريل غتاهو بقالو مظلة جلوس وقيام
يا ساري الليل أين ذهب عوض هل غرق في جوف الليل أم رحل في رحلة تصوف
يبقالي نجع متوجه قاصد أرض الشام
ما شفتو هناك مع الحجاج لابس الإحرام
بين يثرب ومكة وفي بيت الله المكسي رخام
يبقالي هناك يكون مندسي مع الخدام
يا ساري أبل جهدك نحنا فتشنا في كل محل ما خلينا بكان
فتشنا سما أرض ما شفنا منام
في التمر الشايل تكا سبيطو مدلول خام
في الجرف الأخضر في لوبيهو وفي النجام
في جدول جاري تسرسر مويتو نعيماً دام
ومع ذلك لم نجده وقد طال الغياب ولن نيأس فالحلة في الانتظار فاينما وجدته بلغه السلام
يا ساري الليل أنا داير أوصيك وأديك كلام
الروح إين صعدت لي باريها وفي جنات الخلد مقام
لو لاقيتو في إي مكان في إي زحام
روح كلمو قولو الحلة بكت من شوقا إليك تغريك سلام

MAAZELSIR كتب:يا دكتور ،،،
انا جني وجن الحلقات.
الحلقة الاخيرة متين؟؟

معاذ

الفاتح الجوص كتب:يا دكتور سلامات وكيف حالك
والله حاولته كتير اكون متابع لى القصه فى سودانيز لكن ربنا ما سهل لكن دى فرصه عشان الواحد يقدريتابعه لقيت النهايات
بمناسبه ليك كم يوم ما ظاهر ان شاء الله المانع خير
منتظرنك

طارق جبريل كتب:

(3)
عوض بقى يطلع في الرملة ويتشجع لامن البنية تديهو بسمة من بعيد... جملة الايمان الزول ان بقينا قلنالوا ترفع رملة الحرطوم دي كلها هنا كان رفعها... بس مرات لامن البت تبقى ماها في وتشوفو طالع بي صفيحتو يمين لسانو ماديهو زي كلب الحر... وعيونه من التعب زي عيون ام سيسي... ولامن البنية تكلمه... يا زول جضومه تتنفخ زي العندو برنبوفي (ابوعديلات عشان ناس كردفان)... وتحلف تقول الزول دا ان بقى مات وهو في الحالة دي حا يدفنوهو وهو ضاحك لا قعر اضانو..
الايام الاولى كلها وانا اتاوق فيهو من فوق زي الزول الصابة فوقو مطرة البت تتونس معاهو وهو مبلم زي ولد الطهور ... بعد اسبوع كدة حتا لسانو اتفك... وشوف عيني بقى يقول ليها صباح الخير... عوض يقول صباح الخير.. ايوة والله... عوض الناشف داك زي عود الطلح بقى يجي ممسح وشعره مسرح.. ومريح كمان بالرغم من انه الريحة عاملة زي النفتالين... لكن اهو عوض بقى يتريح بعد ما كانت ريحتو مع العرق ترمي الصقر.. والله ان بقيت مريت بي جنبو ساكت ريحتو تخليك تدخل في غيبوبة.... يا جماعة خير زولكم اشترى ليه مراية شخصية لانه لو ختاها مع اخوانه الكتار ديك الا يوزعوها زرة زرة بيناتهم... وبقى بعد نضرب الفول في الديم يشيل باقي الزيت ويتمسح بيهو... عشان يظهر ناعم وكدة...