أي بت شديدة بتحب ليها طُلبة (صبي بناي)

(14)
أها يا الحبيبين مرت الاسبوعين وبقينا في الكلام الجد
شفنالنا تلات عربيات وبوكسي عشان البلتون أليل عوض دة
انا اندرعتلي في بنطلون وقميص كان عاجباتني جايبن معاي من مصر
ومشيت من دولاب الحاج اتريحت ومشيت بيت ناس عوض
أها الرجال جاهزين.. خيلانه واعمامو اتنين واخوانه الكبار علي النسوان
ما جهزن لي هسا وأبوهو ينقنق في التأخير... ونحن ما عايزنه يحرِن...
- فجأة: يا طارق... طارق تعال... اخت عوض نادتني
- شنو يا حنان مالكم ما جهزتو لي هسا
- ياخي امي قالت إلا تشيل معاها حُقة الصعوط
- يا حاجة صعوط شنو كمان التشيلي معاك في العمارات
- نان يا ولدي إن بقيت خرمت هناك أسوي شنو
- كمان عايزة في يوم خطوبة ولدك تقنطري سفتك زي الكبريتة المفتوحة
- الله يقلعك.. نان ان خرمت اسوي شنو
- عضي طرف توبك
- طيب بدل ما اعضيهو ما اختلي فيهو سفايي فرد ويحيدي
- انت قايلاها حلاوة كرملي... امرقي انا اصلي عارفك خرفتي
- هو الشي الهسا ماشين نسوي دة ما ياهو الخرف ذاته
- سمح امرقي لامن نجي بوريك الخرف كيفنهو
... ومشينا يا الحبان.... تيت تيت تيت... لامن وصلنا العمارات
... اهلا مرحب شرفتو
... اتفضلوا اتفضلوا
دخلنا لقينالكم الدنيا هايصي... والبيت مليان رجال غلاد غلاد
يمين حسين الجسمي بالنسبة ليهم ناعومي كامبل
النصايب تقول بياكلوا تِبِنْ منفخين زي شواويل الكاويق (شواويل مليانة بي ورق شجر المنقة)
... والنسوان سمحات ومتمرات عكس رجالن.. شوف عيني الواحدة فيهن تقول
للقمر قوم وأنا أقعد مكانك وباين عليهن مستلمات رجالن...
أما إن كان للقرمبوز أليلُم يمين من سماحتن
قلب الواحد ينتِل دق دق دق دق زي مروحة الطربيزة...
أماني صحبي ما وقعلو وقعتن سمحي خلاص...
أنا علي العلي مشيت أعاين في الحيط البنيناهن وبقلَنا سبب في الشي الحاصل دة
... جات جنبي خالة البنية: إنت ما عايز تنسى إنك طُلبة؟؟
- أنسى كيفن وهي كانت سبب الشي دة...
- امشي اقعد انا بعدين عايزاك
... يا سيدي الحسن تنجدني من المرة دي
شكلها كدي ناويالي علي نيي....
عوض انجعص جنب ابوهو... الحقيقة شكله اتغير بس يكتل من الضحك
لابسلو بنطلون رمادي وقميص ابيض وبابيون احمر وجكيت رمادي
انا الكاتلني من الضحك البابيون المشنط في رقبتو دة لأنه ذكرني عيد الضحية
لامن يختولك دهن الكرشة وفوقه اب دمام ويقولولك ودو للنسوان...
... اتوهطو الرجال وبدوا الكلام..

(15)
واحد من خيلان عوض قعد يفلعص في الكلام ويعوج فيهو...
انا في سري اقوله: ياخينا اكشح كلامك فسراع خلنا النمش نشوف بوشنا.. الفلهمة العليك شنو انت جايي ايد ورا وايد قدام
المهم الزول قعد يطول في الكلام ويعوج فيه لامن وصل حتة: يشرفنا ويسعدنا إننا نناسبكم
يمين ابو البت بس قال: مرحب بيكم وشرفتوا... النسوان فقعن الزغاريد .... ايويييييييييي يو يو يو
انا طوالي عرفت إنه الرجال ديل قاعدين دلاليك ساكت..
وووب عليك يا عوض اماني ما وقعت وما سميت... انا خايف اجي القاك مزرزر زي أبين كروش ديل لا تهش لا تنش
... مبروك مبروك ربنا يكمل على خير
... شرفتونا والله بي وجودكم
... د. عوض في عيونا إن شاء الله
سبحان الله هو عوض متين بقى دكتور وهو لليلي الاسبرين ما كملو
.. المهم يا الحبان صواني الخبايز والعصاير بقن ينطاقشن وانا اسكت ابلع واشرب
اخدنالنا صني كدي عشان الجماعة يتعارفوا وجات خالة العروس قالت الشباب لازم يلبسوا الدبل
بس يا الحبان يجن خالات العروس وبنات خالاتها وبنات عمها مقدمات العروس والدنيا هاصت تاني
النصيحة لي الله البنيي سمحة سماح يكتلو زول
قعدوها هي وعوض في كراسي ماهلات كدي
وخالة العروس طلقت البخور وجابوا الدبل والحاجات
وعوض من شدة الفرح عيونو يتحركن زي البليي الخاتنها في كوريي
لبسوا دبلم
وفجأة دخلت غنايتا غليييدي قالوا اسمها حواء قندران ولا ترلا ما عارف
الزولة دي قعدت تلعلع والشباب دة هاص وختوا عوض وخطيبتو في النص وهاك يا رقيص
خالة البنية جات جرتني من يدي ودخلتني الدائرة واختلي قلدي مع عوض شديدي والله من قلبي
وبدينا نسكسك وخالة العروس تلزني وسط البنات
وانا اقول يا ربي تمرقني سالم الليلي
وفجأة شفتلي واحدا ليه فقهة كدي زي التلكي (الخشبة البيكسروا فيها الجزارين اللحم)
زولكم منجعصلو في كرسي واللحم عليه كتير لامن مدفق من الكرسي بس تقول عجين خميرتو زايدي نازل من الماعون
الولد عيونه محمري وشكل وشه ينعل قفاهو
ونحن في الهجيج دة وسط البنيات السمحات ديل
همست في اضان خالة البنيي: انت الزول المنفخ ابو نخرة كبييري زي وحيد القرن دة منه ومالو فارز عيشتو بعيد من الناس كدي
ياخي حرام عليك... دة ما ود عمها الكان عايزها
اتاريهو يشرب في العصاير يبرد في جوفه وعيني ليهو قزازة الببسي يشرب فيها زي الماسورة المفتوحة في زير
حمدتك يا مالك روحي الما حبيت
- انت ما حبيت لكن في ناس عينها عليك
أهااا قمنا تاني... يا سيدي الحسن تمرقني لي أهلي سالم من العيلة دي...

(20)
رجعنا لي بيوتنا وخيلان عوض واعمامو كل زول مشى علي بيتو...
- عوض: اسمع اقلع هدومك وتعالي نتونس برة..
- كويس كدي نشوف الجو كيفن لا جوة وبطلعلك..
دخلت لقيت جبيرين منقطر في سريرو وخالف رجلينو تقول شِعب ألات كَرِقِي (عيدان الراكوبة)
والرادي تحتو تلعلع فيهو مذيعة اسمها المدفعجي من لندن.. وانا خايف من مدافع كلامه ارمش في عيوني..
- أها مشيتو لي خطوبة الجن دي..
- أيوة.. (ماني قادر ازيد كلمي تاني يقوم يهيج فوقي لا ايدي لا كراعي.. عوض يخطب وانا اتزرزر)
- والله مسخرة وشغل نسوان وكلام فارغ وعمك عبد الله ذاته مطرطش
-......
دخلتلي في سروال وعراقي ومرقت علي عوض..
وقعدنا في الحجرين القدام البيوت... ياهم مكانا المفضل من زمن بعيد..
- هسا اليشوفك هسا ما يشوفك قبيل..
- ليه...
- قبيل مهندم وعندك قيمي شوف هسا بي بنطلونك المقطع دة لاهو لامي ردا ولاهو بنطلون
وفنيلة الحمالات المقدقدة علي سلك كفاي الجداد كدي...
- (يضحك) ياخي هسا نحن في شنو وانت في شنو..
- شنو تاني كمان خطوبة وخطبت وورطني سبعين ورطي... شنو تاني...
- هسا الجمعة الجاية كيف؟
- لا جمعة ولا خميس تموت موتك يا ابو الشباب... انا عايز اشوف البنا عشان نبدأ ندور تاني
- أها وبعداك..
- بعداك امشي اشوف قرايتي كمان..
- انت ما عايز تقعد مع سحر لي؟؟
- أها يا مرسال الشوق... شوف يا عوض انت عارف رايي كويس في الحتة دي..
انا لاني فاضي لي حب ولاني قادر علي خطوبة والأيام دي اسمع نصيحتي
إن بقيت لاقيت عمك جبيرين لا تكتر معاهو الكلام شي..
- ياخي والله البت حلوة وشكلها بتريدك والناس ديل ناس كويسين...
- (غلبني أقوله سمحة لامن تخلي الزول يتقلَّم حتت حتت).. ما قلنا شي.. انت الناس
ديل العاجبهم فينا شنو... لانا زينين متل الناس ولا اهلنا منغنغين... شي يحير..
- ياخي يضع سره في أضعف خلقه..
- إيي سر شنو إنت باقيلي بوم... هسا نحن سرنا شنو؟؟ اماتنا مقابلات الصيجان
ليلِن ونهارِن... وابهاتنا يعافروا من تصبح لامن تشرق وياهو قدح القراصي
وصحن الفول ولامن يقدحولنا بيض زي العندنا كرامي... نقرب نزغرد.. تقولي سِر...
- ياخي بي حالتنا البنيات عايزاتننا وراقدات خل... انت بس باركها وبتتعدل..
- عوض... انت باقيلي جنيت... انا جنس شيتك دا آآبسوي... يمين جبيرين علي
يطردني من البيت وانت بيتكم مافيهو محل لي إبري... وقتين داك أقبل وين انا...
- ياخي هي قالت بس نفسها تقعد معاك وتتونس معاك... لاها دايري خطوبي
لا شيتين.. وهي عارفاك سنيح وراسك دمق... دحين ياخي اجبر بي خاطرها بس
- انتو باقيلي حددتولي اعرسها متين... اتاريهو ضحكك القبيل عندو معني
وانا اقول عوض مالو يتبسم لا قعر اضانو...
- والله الكلام دة من زمان بس انت عامل اضان الحامل طرشة...
- عوض اقولك شي قوم نوم واحلم زي ماك عايز... انا خلني ماني وش نعمي..
وانت اصبر ساكت علي الراجيك...